உறவுகளை தொலைத்தோரின் ஆறாத வடுக்கள்

ஒரு இரத்தக்கறைகூட என்மீது படவில்லை- அருட்தந்தை ஜோய் அற்புதசாட்சி

 ஏப்ரல் 21ம் திகதி உயிர்த்த ஞாயிறு தினத்தன்று  இலங்கையின் பல பாகங்களிலும் தற்கொலைத்தாக்குதல்கள் இடம்பெற்றன. கொழும்பு கொச்சிக்கடை புனித அந்தோனியார் தேவாலயத்தின் மீதே முதலாவது தாக்குதல் நடத்தப்பட்டது. இதன்போது தேவாலயத்தில் திருப்பலியை ஒப்புக்கொடுத்துக்கொண்டிருந்த அருட்தந்தை ஜோசப் ஜோய் மரியரட்ணம் ஆதவனுக்கு வழங்கிய நேர்காணல்

யுத்தத்தால் விதவைகளானோருக்கு விமோசனம் யார் தருவார்?

வவுனியாவிலிருந்து 
அருண் ஆரோக்கிய நாதர்



யுத்தம் நிறைவடைந்ததாக அறிவிக்கப்பட்டு ஏறத்தாழ ஒன்றரை ஆண்டுகள் கடந்து விட்டநிலையில் குண்டுச்சத்தங்கள் மௌனித்துவிட்ட போதிலும் யுத்தம் ஏற்படுத்திய வடுக்கள் வடக்கு கிழக்கு பகுதியில் துலாம்பரமாக தெரிகின்றன.

இதில் யுத்தத்தால் கணவனை இழந்து விதவைகளானோர் நிலைமை பரிதாபகரமானது .இலங்கை அரசாங்கத்தின் தரவுகளுக்கு அமைவாக கிழக்கு மாகாணத்தில் 49000 விதவைகளும் வடமாகாணத்தில் 40000 விதவைகளும் உள்ளதாக சுட்டிக்காட்டப்படுகின்றது

இந்த விதவைகளுக்கு புனர்வாழ்வளிப்பதற்கு வெளிநாடுகளின் உதவியை எதிர்பார்த்துள்ளதாக இலங்கை அரசாங்க அமைச்சர்கள் கடந்த மாதத்தில் அறிவித்திருந்தனர் .இவர்களுக்கு உதவியளிக்க இந்தியா ஏற்கனவே முன்வந்திருப்பதாகவும் சுட்டிக்காட்டப்பட்டிருந்தது

விதவைகள் விபரம் 

கிழக்கு மாகாணம் -49000

வடமாகாணம் -40000

இந்த நிலையில் கொடூர யுத்தத்தினால் விதவைகளான சாந்தி உமா மற்றும்  ஜான்ஸி ஆகிய மூன்று இளம் பெண்களை சந்திக்கின்ற வாய்ப்பு அண்மையில் கிட்டியிருந்தது .

 அச்சம் மடம் நாணம் பயிர்ப்பு என்ற நற்பெண்களுக்குள்ள உயரிய குணத்தால் இவர்கள் ஆரம்பத்தில் பேசத்தயங்கியபோதும் இரண்டு நாட்களின் பின்னர் மனந்திறந்து பேசத்தொடங்கினர்.

சாந்தி( 21வயது )
'அண்ணா எனக்கு 2006ஆண்டு ஏப்ரல் 12ம்திகதி 16வயதில் திருமணமானது .எனது பள்ளித்தோழிpயின் அண்ணாவைத்தான் நான் விரும்பித் திருமணம் செய்திருந்தேன் . திருமணத்தின் பின்னர் விசுவமடுவிலுள்ள என்னுடைய பெற்றோருடன் தான் வாழ்ந்துவந்தோம். கணவர் வியாபாரத்தில் ஈடுபட்டிருந்தார் 2007ம் ஆண்டு ஜுலை 21ம்திகதி எங்களுக்கு மகன் பிறந்தான் .கணவன் என்னை நல்லா பார்த்துக்கொண்டார்.எந்த உதவிக்காகவும் நான் வேறுவீடுகளைத்தட்டியது கிடையாது. இப்படி சிறப்பாக வாழ்க்கை நடத்திக்கொண்டிருந்தபோதுதான் யுத்தம் வெடித்திருந்தது. விசுவமடுவில் இருந்து இடம்பெயர்ந்து ஒவ்வொரிடமாக சென்று போன வருசம் (2009)ஏப்ரல் மாதம் 7ம்திகதி புதுமாத்தளனிலிருந்து முள்ளிவாய்க்காலுக்கு சென்று கொண்டிருந்தபோது தான் ஷெல் வீச்சில் கணவர் பலியானார். இடம்பெயரும் போது எங்களை முன்னுக்கு அம்மா அப்பாவுடன் போக சொல்லிவிட்டு அவர் சைக்கிளின் சமான்கiளை சுமந்துவருவார். ஷெல் வீச்சில் அவர் பலியானபோது நான் உடனிருக்கவில்லை முதலில் அவருடைய தம்பிதான் இறந்துவிட்டதாக சொன்னாங்க உண்மைய எல்லோரும் மறைச்சிட்டாங்க பிறகு தம்பி வந்து நடந்ததைக் கூறியவுடன் நான் மயங்கிவிழுந்துட்டேன் .பிறகு நாங்க இருந்த இடத்திலேயே அவரது சடலத்தை புதைத்துவிட்டு முள்ளிவாய்காலுக்கு போனோம் .அங்கிருந்து போனவருசம் மே 17ம்திகதி இராணுவ கட்டுப்பாட்டுப்பகுதிக்கு வந்து மெனிக்பாமில் ஒருவருடத்திற்கு மேல் இருந்தோம் மூன்று மாதங்களுக்கு முன்னர் தான் மீண்டும் விசுவமடுவிற்கு சென்றிருந்தோம் '

உமா( 30வயது)
'நாங்க கிளிநொச்சி ஊற்றுப்பாலம் பகுதியை சேர்ந்தவங்க. நானும் எனது கணவரும் விரும்பித்தான் திருமணம் செய்திருந்தோம் .எங்கட அப்பாவிலுள்ள உயர் குணங்கள் இருப்பதைக் கண்டுதான் நான் அவரை விரும்பினேன் .2007ல் திருமணமானது .2008ம் ஆண்டு ஜுலை மாதம் 26ம்திகதி மகள் பிறந்ததும் கணவர் கிளிநொச்சி மருத்துவமனைக்கு வந்து பார்த்து தூக்கி மகிழ்ந்தார் அதற்கு பிறகும் பல தடவைகள் வந்தார்.இரண்டு நாட்கள் கழித்து ஜுலை 28ம்திகதி எங்களை மருத்துவமனையில் பார்த்துவிட்டு சென்ற பின்னர் தான் ஷெல் தாக்குதலில் உயிரிழந்தார். அதற்கு பிறகு என்னுடைய வாழ்க்கை இருண்டுவிட்டது. ஷெல் தாக்குதல் எங்கட பிரதேசத்திற்கு அருகில் அதிகரிக்க அதிகரிக்க அவர் செத்து ஒரு மாதத்திற்கு பிறகு நாங்க இடம்பெயர்ந்து ஒவ்வொரிடமாக சென்றோம் இறுதியில் மாத்தளனில் இருந்து மார்ச் மாதம் நாங்க மெனிக் பாம் வந்தோம் .பிறகு ஒன்றரை வருஷத்திற்கு பிறகுதான் சொந்த இடத்திற்கு திரும்பினோம் '

ஜான்ஸி ( 26வயது )
'இரணைப்பாலை தான் எங்கட சொந்த இடம் எனக்கு 2007ம் ஆண்டு திருமணமானது நாங்க புதுமாத்தளனுக்கு இடம்பெயர்ந்த போது போன வருசம் (2009) மார்ச் 22ம் திகதி அவர் ஷெல் தாக்குதலில் உயிரிழந்தார். ஒரு குழந்தையும் நானும் எங்கட அம்மா அப்பாவும் தற்போதும் மெனிக் பாமில் தான் இருக்கின்றோம் .இன்னமும் எங்கட பகுதியில் மீள் குடியமர அனுமதிக்கப்படவில்லை'

தம்மை நன்கு பார்த்துக்கொண்ட தமது கணவர்மார் உயிருடன் இருந்திருந்தால் தம்மை எந்தவேலைக்கு செல்லவும் அனுமதித்திருக்கமாட்டார்கள் எனக்கூறும் இந்த இளம் விதவைகள் தற்போது மிதிவெடி அகற்றும் நிறுவனமொன்றில் ஆபத்துமிக்க மிதி வெடி அகற்றும் தொழிலில் ஈடுபட்டுள்ளனர் .

ஏனையோரைப்போன்றே தமக்கும் சில நிறுவனங்கள் உதவிப்பொருட்களையும் சிறுதொகைப்பணத்தையும் வழங்கியுள்ளபோதிலும் கணவனை இழந்த பெண்கள் என்ற நிலைமை கருதி இதுவரையில் விசேடமான உதவிகளோ நிவாரணங்களோ கிடைக்க வில்லை எனக்கூறும் இவர்கள் தமது குடும்ப நிலைமை கருதி தமது வாழ்விட சூழலுக்கு வெளியே தொழிலுக்கு வந்துவிட்ட நிலையில் தாம் இல்லாத காரணத்தால் ஏனையோருக்கு கிடைத்துள்ள சில நிவாரணப் பொருட்களும் தமக்கு கிடைக்காது போயுள்ளதாக இவர்கள் கூறுகின்றனர்.

கணவன் உயிருடன் இருந்த காலத்திற்கும் தற்போதைய நிலையிலுவும் சமூதாயத்தில் எத்தகைய வேறுபாட்டை உணருகின்றீர்கள் என வினவியதற்கு பதிலளிக்கையில்

சாந்தி
' அவர் உயிருடன் இருக்கும் போது யாருடன் வேண்டுமானாலும் கதைக்கலாம் எங்கவேண்டுமானாலும் போகலாம் ஆனா இப்ப நான் சொந்தக்காரர்களிடம் பேசினால் கூட ஏன் அவ அவரோட பேசுறா இவரோட பேசுறா என குத்தலா பேசுறாங்க எங்கட அம்மா அப்பா கூட மகள் நீ அவங்களோட பேசினா சமூதாயம் அப்படி இப்படி பேசும் என்று கட்டுப்பாடு விதிக்கிறாங்க'

உமா
' அவர் இருக்கையில் நான் கேட்கிறத்திற்கு முதலே எல்லாத்தையும் வாங்கித்தந்திடுவார்.இப்ப கடைக்களுக்கென்றாலும் ஏனைய இடங்களுக்கு என்றாலும் நாங்கள் தான் போகணும் .நிவாரணங்கள் கொடுப்பவர்கள் உரிய ஆளே நேரில் வரவேணும் என்று கூறுவதால் எல்லாத்திற்கும் நாங்கள் தான் போகவேண்டியுள்ளது வெளியே போய்வரும் போது சிலரது கேலி கிண்டலுக்கு ஆளாக வேண்டியிருக்கின்றது என்னசெய்கிறது எல்லாவற்றையும் சகித்துக்கொள்ளவேண்டியிருக்கின்றது'

ஜான்ஸி
'என்ற கணவர் நோய்வாய்பபட்டு ஊனமுற்றவராய் இருந்திருந்தாலும் உயிரோடு இருந்திருக்க வேண்டும் என்று நினைக்கின்றேன் .இப்ப ஒவ்வொரு செயலுக்கும் விளக்கம் சொல்லியும் சந்தேகத்தோடுதான் பார்க்கிறாங்க '

யுத்த்தால் பாதிக்கப்பட்ட பல்வேறு தரப்பினரில் மிகவும் துர்ப்பாக்கிய சாலிகளாக காணப்படும் கணவனை இழந்த இளம் பெண்களின் இளம்தாய்மாரின் எதிர்காலம் எதிர்ப்பார்ப்புக்கள் குறித்து அவர்களிடமே வினவியபோது

சாந்தி
' என்னுடைய பிள்ளையை நன்கு வளர்த்தெடுக்கவேண்டும் நல்ல கல்வியை கொடுத்து சிறந்த எதிர்காலத்தை வழங்கவேண்டும் அதுதான் எனது எதிர்பார்ப்பு'

உமா
'நான் பட்ட கஷ்டத்தை சொல்லி பிள்ளையை வளர்ப்பேன் ஆனால் எல்லாவற்றிலும் சிறப்பானது கிடைப்பதற்கு நான் என்னால் இயன்றதை செய்வேன். எங்கட ஒன்றவிட்ட அக்கா ஒருவரும் யுத்தம் காரணமாக 1996ம் ஆண்டு கணவனை இழந்தவ அப்ப அவங்கட குழந்தைக்கு 6மாதம் மட்டும் தான் அவ நல்ல முறையில் பெண்குழந்தையை வளர்த்தெடுத்திருக்கிறா அதுபோல என்னுடைய பெண் குழந்தையையும் நான் நல்ல முறையில் வளர்த்து நல்ல ஒருவரது கையில ஒப்படைக்க வேண்டும் என்பதே எனது நோக்கம்'

ஜான்ஸி
'பிள்ளையை ஒழுங்கா வளர்த்தெடுக்கணும் என்பதே என்னுடைய ஒரே எதிர்ப்பார்ப்பு அதனைத்தவிர நோயுற்றிருக்கிற என்னுடைய பெற்றோரை நன்கு உழைத்து பராமரிக்க வேண்டும்'

தமது எதிர்பார்ப்புக்கள் குறித்து இவ்வாறு கூறியவர்களைப்பார்த்து தயங்கியவாறே கோபித்துக்கொண்டுவிடாதீர்கள் நீங்கள் இளம் வயதினராய் இருப்பதனால் மீண்டும் திருமணம் செய்துகொள்வீர்களா என்று வினவியபோது

சாந்தி
 'எங்க சமூகத்தில் மீண்டும் திருமணம் செய்வதை அனுமதிக்க மாட்டாங்க சொந்தக்காரங்களே பிரித்துவைத்திடுவாங்க அவங்க ஏற்றுக்கொள்ள மாட்டாங்க என்னைப்போல நிறையப்பேர் கணவன் இல்லாம இருக்கிறநிலையிலே இப்படி இருப்பதே பழகிப்போய்விட்டது '


உமா
' அம்மா அப்பாவிடம் நான்கைந்துபேர் வந்து திருமணம் கேட்டிருக்கிறாங்க அவங்க எனக்கு எதையும் உடனே கூறமாட்டாங்க நான் ஏசி விடுவன் அல்லது வீட்டை விட்டு பிள்ளையைக் கூட்டிக்கொண்டு போய்விடுவேன் என்று அவங்களுக்கு பயம் . மெனிக்பாம் முகாமில இருக்கும் போது கணவனை இழந்த மனைவியை இழந்தவர்கள் மீண்டும் திருமணம் செய்ததை பார்த்திருக்கின்றேன் . தங்களுக்கு என்று பிள்ளைகள் பிறந்த பிறகு அவர்கள் நடந்துகொள்வதையும் பார்த்திருக்கின்றேன் .முன்னைய பிள்ளையை ஏதோ மாற்றாந்தாய் பிள்ளையாக பிரித்து பார்ப்பதுடன் அந்தப்பிள்ளையிடம் வேலைவாங்கிறதும் அடித்துதைப்பதையும் பார்த்து வெறுத்துப்போய்விட்டது .இதனால மீண்டும் திருமணம் முடிப்பதென்றால் பயமா இருக்கின்றது .அதைவிட இருக்கிற பிள்ளையை நன்கு வளர்த்தெடுத்தா போதும்'

ஜான்ஸி
'நினைத்தேன் நீங்கள் இந்த கேள்வியை கேட்கத்தான் சுற்றிவளைக்கின்றீர்கள் என்று ஆனா எனக்கு இந்த நிலையில் அது குறித்து சிந்தித்துபார்க்கமுடியாது என்னுடைய கணவரின் நினைவுகள் இப்போதும் அதிகமாக என்னை ஆட்கொண்டிருக்கின்றது அதiனைத்தவிர பிள்ளையை நன்றாக வளர்க்கவேண்டும் என்ற நோக்கமும் உள்ளது '


 நீங்கள் எல்லோரும் இளவயதினராய் இருக்கின்றீர்கள் கணவனை இழந்தது நீங்கள் செய்த தவறல்ல காலம் செய்த தவறு ஒருசில உதாரணங்களுக்காக மீண்டும் திருமணம் செய்யக்கூடாது என்ற முடிவிற்கு வந்துவிடுவதுதானா தீர்வு என வினவியபோது ?

சாந்தி
'சமூகத்தின் நிலைப்பாட்டில் மாற்றம் வரவேண்டும்'

உமா
' நல்லது வந்தால் பார்க்கலாம்'


ஜான்ஸி
'இப்ப பிள்ளையை வளர்ப்பதுதான் முக்கியம் '


யுத்தம் காரணமாக எமது நாட்டில் குறிப்பாக வடக்கு கிழக்கில் விதவைகளானவர்களுக்கென இதுவரையில் உருப்படியான உதவிகள் வழங்கப்படவில்லை என்பதையே ஒருபானைச் சோற்றிற்கு ஒருசோறு பதம் என்பது போன்று இந்த மூன்று இளம் விதவைகளுடனான கலந்துரையாடலின் மூலமாக உணரமுடிந்தது

இவர்களுக்கு வழங்கும் உதவிகளுக்கு மேலாக உளவியல் ரீதியான ஆற்றுப்படுத்தல் சிகிச்சைகளும் வழங்கப்படுவதுடன் தாம் இழைக்காத தவறிற்காக விதவைகளாகிப்போயுள்ள இவர்களுக்கு நிரந்தரமான தீர்வாக விதவைகள் மறுதிருமணம் போன்ற விடயங்களில் சமூக எண்ணக்கருவில் மாற்றங்கள் ஏற்படவேண்டும்

புறக்கணித்து இருப்பதற்கு விதவைகள் எண்ணிக்கை ஒன்றிரண்டல்ல மாறாக ஆயிரக்கணக்காக இருப்பதன் காரணமாக சமூகத்தில் கருத்துருவாக்கத்தை ஏற்படுத்தும் பணியில் சமூக நிறுவனங்கள் தொண்டர்கள் மனிதாபிமானமுள்ளவர்கள் ஊடகவியலாளர்கள் தீவிரமாக ஈடுபடவேண்டும்

• இரகசியத்தன்மையைப் பாதுகாப்பதற்காக உண்மையான பெயர்கள் மாற்றப்பட்டுள்ளன

Sri Lanka brews world's largest cup of tea-A Unique Guinness World Record

உலகின் மிகப்பெரிய தேநீர் கோப்பைக்கான கின்னஸ் உலக சாதனை

http://www.youtube.com/watch?v=wXHSLmo71kg

One of the world's leading tea-producing nations, Sri Lanka, has just become the scene for a new world record - the largest cup of tea.

A giant red mug was filled with 1,000 gallons (4,546l) of water, 141lb (64kg) of tea, 1,929lb (875kg) of malted milk powder and 353lb (160kg) of sugar.

 previous record was 660 Gallon(3000 liters), set last year in Kansas city ,USA.

The tea was later driven around the Sri Lankan capital, Colombo, and handed out to locals in small plastic cups.

The tea came from Sri Lanka's famed estates, and was brewed for hours in 44-gallon (200l) urns in a way that is popular in South Asia - with sugar and malted milk powder.

The mixture was then slowly pumped into the mug - which had a capacity of about 32,000 normal cups - until it was full,

A representative from Guinness World Records certified the feat.

மாபெரும் தேநீர் கோப்பைக்கான புதிய கின்னஸ் உலக சாதனை இலங்கையில் நிலைநாட்டப்பட்டுள்ளது 

4000 லீற்றர்கள் ( 1000 கலன்கள்)தேநீர் தயாரித்ததன் மூலமே உலகத்திலேயே மாபெரும் தேனீர் கோப்பைக்கான சாதனை இலங்கைக்கு உரித்தாகியது 

2009 ம் ஆண்டு செப்டம்பர் மாதம் அமெரிக்காவின் கன்ஸாஸ் நகரில் போர்ட் ஸ்கொட் சுகாதார நிலையத்தினால் தயாரிக்கப்பட்ட தேநீர்கோப்பையின் சாதனையே இதற்கு முன்னர் உலக சாதனையாக பதிவுசெய்யப்பட்டிருந்தது. அப்போது 3000லீற்றர்கள் (660 கலன்கள்)  தேநீரைத் தயாரித்து இந்த சாதனையைப் படைக்கப்பட்டிருந்தமை குறிப்பிடத்தக்கது

இலங்கையின் மிகவும் பிரபலமிக்க மோல்ட் பானமாக திகழும் வீவா இதற்கான முயற்சியில் இறங்கி பெற்றி பெற்றுள்ளது. இந்த சாதனைக்கான கருத்திட்டத்தை ஜிஎஸ்கே நிறுவனத்தின் சந்தைப்படுத்தல் பணிப்பாளர் ஸ்ரீகாந்த செல்லத்துரை பிரதம நிறைவேற்று அதிகாரி சச்சி தோமஸ் ஆகியோர் வகுத்திருந்தனர் 

கின்னஸ் சாதனையின் போது வீவாவின் சிறப்புத் தூதரன இலங்கை கிரிக்கட் அணியின் தலைவர் குமார் சங்ககார, மற்றும் ஜனாதியதின் மகன் ஜோசித ராஜபக்ஷ ஆகியோர் உட்பட பலரும் கலந்துகொண்டார்.

இலண்டனில் இருந்து வருகைத்தந்தி கின்னஸ் பிரதிநிதியால் இந்த நிகழ்வு முழுமையாக கண்காணிக்கப்பட்டு சாதனை நிகழ்த்தப்பட்டமமைக்கான உறுதிபடுத்தல் சான்றிதல் வழங்கப்பட்டது.

கற்றுக்கொண்ட பாடங்கள் நல்லிணக்க ஆணைக்குழு :ஓர் பார்வை

                                                               அருண் ஆரோக்கியநாதர் 

                    

நல்லிணக்கம் என்பது யுத்தம் முடிவிற்கு வந்ததாக அறிவிக்கப்பட்ட பின்னர் இலங்கையிலே அடிக்கடி உச்சரிக்கப்படுகின்ற வார்த்தையாக இருக்கின்றது .

நல்லிணக்கம் என்பதன் உண்மையான அர்த்தம் என்ன என்று  இணையத்தளத்தில் தேடிப்பார்த்த போது அதற்கு ஏராளமான அர்த்தங்கள் இருந்தன.

 அவற்றை பொதுப்படுத்தி பார்த்த போது நல்லிணக்கம் என்பதற்கு 'ஏற்கனவே மோதலில் ஈடுபட்டிருந்த இரு தரப்பினருக்கிடையில் சமாதானமான அன்றேல் இணக்கப்பாடான உறவுகளை மீள ஸ்தாபித்தல்' என அர்த்தம் வழங்கப்படுகின்றது 

நல்லிணக்கத்தை ஏற்படுத்துவதற்கான காத்திரமான நடவடிக்கைகளை அரசாங்கம் மேற்கொள்ளவில்லை என சர்வதேச சமூகத்தை சேர்ந்தவர்களடங்கலாக பல்வேறு தரப்பினரும் சுட்டிக்காட்டிய நிலையில்   நல்லிணக்கத்தை ஏற்படுத்துவதற்காக தாம் எடுத்துள்ள முக்கிய நடவடிக்கையாக கற்றுக்கொண்ட பாடங்கள் மற்றும் நல்லிணக்க ஆணைக்குழுவின் நியமனத்தை இலங்கை அரசாங்கம் குறிப்பிட்டிருந்தது 

இந்த ஆணைக்குழுவின் அமர்வுகள் ஆரம்பமாவதற்கு முன்னரே இதன் நம்பகத்தன்மை குறித்து பல்வேறு தரப்பினராலும் சந்தேகங்கள் வெளியிடப்பட்டன

இலங்கையில் இதற்கு முன்பாக நியமிக்கப்பட்ட ஆணைக்குழுக்களின் செயற்பாடுகள் அவற்றின் நடவடிக்கைகள் முடிவிற்கு கொண்டுவரப்பட்ட விதம் தொடர்பில் இருந்த அனுபவங்கள் மற்றும் கசப்புணர்வுகள் காரணமாகவே இவ்வாறான சந்தேகங்கள் வெளியிடப்பட்டன.

நல்லிணக்கம் என்பது ஒரு நீண்ட பயணம் அது ஏதேனும் ஒரிடத்தில் ஆரம்பித்தாகவேண்டும் என்பதற்கமைவாக கற்றுக்கொண்ட பாடங்கள் மற்றும் நல்லிணக்க ஆணைக்குழுவின் நியமனத்தை அனேகரைப்போன்று முன்கூட்டியே கொள்கை அளவில் எதிர்க்காமல் சந்தேகிக்காமல் இதிலாவது நன்மை நடக்காதா என எதிர்பார்த்திருப்பர்கள் பலருள்ளனர் .

இந்த ஆணைக்குழு கடந்த 11ம்திகதி அதன் அமர்வுகளை ஆரம்பித்திருந்த போதிலும்

இன்று 

செவ்வாய்க்கிழமை சர்வதேச கற்கைகளுக்கான லக்ஷ்மன் கதிர்காமர் நிலையத்தில் இடம்பெற்ற அமர்வு ரொய்டர்ஸ பிபிஸி ஏபி போன்ற சர்வதேச ஊடகங்கள் இராஜதந்திரிகள் உட்பட பலரது கவனத்தையும் ஈர்த்திருந்தது

அன்றையதினம் பிற்பகல் இடம்பெற்ற அமர்வில் கலந்துகொள்வதற்கு பாதுகாப்பு அமைச்சின் செயலாளர் கோட்டபாய ராஜபக்ஸ வருகைதந்திருந்தமை காரணமாகும்.

பாதுகாப்பு செயலாளர் முதலில் வந்தமர்ந்த பின்னர் ஆணைக்குழுவின் தலைவர் முன்னாள் சட்டமா அதிபர் சித்திராஞ்சன் டி சில்வா உள்ளிட்ட ஆணைக்குழு அங்கத்தவர்கள் அமர்வு நடைபெற்ற மண்டபத்திற்குள் நுழைந்தபோது பாதுகாப்பு செயலாளர் எழுந்து அவர்களுக்கு மரியாதை செலுத்தினார் .

பாதுகாப்பு செயலாளர் வழங்கிய அந்த மரியாதையைத் தவிர ஆணைக்குழுவில் அங்கம் வகிப்பவர்களது செயற்பாடுகளில் பெரும்பாலானவை நகைக்கும்படியாகவே இருந்தன

பெருந்தொகையான ஆவணக்கோவைகளுடன் வந்திருந்த பாதுகாப்புச்செயலாளர் தனது மிகக் கொடூரமான பயங்கரவாத இயக்கத்தையே அரசாங்கம் தோற்கடித்தது என்பதை பலரும் மறந்து போயுள்ளனர் .அதுதான் வரலாறாகும் என்று கூறி தனது இரண்டரை மணிநேர சாட்சியத்தை தொடங்கினார் .

மிகப்பலம் பொருந்திய இராணுவபலத்தைக் கொண்டிருந்த விடுதலைப்புலிகளையே தோற்கடித்ததாக தெரிவித்த பாதுகாப்புச்செயலாளர் ஒருகட்டத்தில் விடுதலைப்புலிகளிடம் 30 ஆயிரம் நிரந்த போராளிகள் இருந்தமை உள்ளிட்ட விபரங்களை விபரித்தார் .

விடுதலைப்புலிகள் மோசமான அட்டூழியங்களை இழைத்தாக குறிப்பிட்ட பாதுகாப்புச்செயலாளர் அதுதொடர்பான ஆவணக்கோப்புக்களை ஒவ்வொன்றாக எடுத்துவைத்தபோது அதிலுள்ள விடயங்கள் இதுவரை வெளிவராத புதிய அம்சங்களை உள்ளடக்கிவை என்ற பாங்கில் ஆணைக்குழுவின் தலைவர் அந்த ஆவணக்கோப்புக்களைத் தரமுடியுமா என பாதுகாப்புச்செயலாளரிடம் கேட்க அவரும் ஒவ்வொரு ஆவணக்கோப்புக்களாக கையளித்தார்.

விடுதலைப்புலிகளுக்கெதிரான யுத்தத்தை தொடங்கியபோது எவ்வாறு தம்மிடம் தெளிவான இராணுவத்திட்டம் இருந்ததோ அவ்வாறே பொதுமக்களைப் பாதுகாப்பதற்கான திட்டமும் இருந்ததென அவர் குறிப்பிட்டிருந்தார். இதன் காரணமாகவே கடந்த காலங்களைப் போன்று இராணுவ நடவடிக்கைகளுக்கு தனியான பெயர்களை இடாமல் இது மக்களை விடுவிக்கும் நடவடிக்;கையாதலால் இதனை மனிதநேய நடவடிக்கை என்றே அழைக்க வேண்டும் என ஜனாதிபதி பணித்ததாக கூறிப்பிட்டார்.

 இது பார்ப்பதற்கு சிறு விடயமாக இருக்கும் போதும் முக்கியமான ஒன்றாகும் என அவர் சுட்டிக்காட்டினார்.

படையினர் துப்பாக்கிகளை ஒருகையிலும் மனித உரிமைகள் சாசனத்தையும் மறுகையிலும் ஏந்திக்கொண்டே தமது பணியை முன்னெடுத்தாக குறிப்பிட்ட பாதுகாப்பு செயலாளர் மனித உரிமைகள் பற்றி இராணுவத்தினருக்கான பயிற்சிகள் 2003ம் ஆண்டில் ஆரம்பிக்கப்பட்டதாகவும் இதற்காக பிரத்தியேகமான இராணுவ பணியகம் ஸ்தாபிக்கப்பட்டிருந்ததாக கூறினார் .

தமக்கு முன்பாக இருப்பவர் அதிகாரம் மிக்கவர் பெருமதிப்பிற்குரியவர் என்பதை ஆமோதிக்கும் பாங்கிலேயே ஆரம்பமுதலாக ஆணைக்குழுவின் அங்கத்தவர்கள் நடந்துகொண்டனர் . மனித உரிமைகள் விடயத்தில் இராணுவத்தினருக்கு பயிற்சி அளிக்கப்பட்டமை தொடர்பாக பாதுகாப்புச் செயலாளர் கூறும் போது ஆணைக்குழுவின் தலைவரோ ' இது உலகத்திற்கே முன்மாதிரியானதொன்று என ஐசிஆர்சி தெரிவித்திருந்ததென தனது தரப்பில் எடுத்துக்கொடுத்தார் . அப்போது பாதுகாப்புச் செயலாளர் ஆம் என்று கூறியதுடன் ஐசிஆர்சி உதவியதாக குறிப்பிட்டு மற்றுமொரு ஆவணக்கோப்பை சமர்பித்தார் .அதில் மனித உரிமை மீறல்கள் தொடர்பில் இராணுவத்தில் நடத்தப்பட்ட உள்ளக விசாரணைகள் தொடர்பான சான்றுகள் என உள்ளதாக அவர் குறிப்பிட்டார்.

இராணுவரீதியாக நோக்கும் போது பயங்கரவாதத்தை தோற்கடித்த விடயத்தில் இலங்கை பின்பற்றிய அணுகுமுறைகளை முன்மாதிரியாக கொள்ளவேண்டும் என மக்கள் பேசுகின்றனர் ஆனாலும் மனித நேய உதவிகளை வழங்குவதற்காகவும் பொதுமக்கள் இழப்புக்களை குறைப்பதற்காகவும் பாதிக்கப்பட்டவர்களுக்கு உதவுவதற்காகவும் அரசாங்கம் எடுத்த நடவடிக்கைகள் திட்டங்கள் என்பனவற்றில் இலங்கையின் முன்மாதிரியை எடுத்துப் பயன்படுத்துவது முக்கியமானதென பாதுகாப்பு செயலாளர் கோட்டபாய ராஜபக்ஸ தெரிவித்தார் . 

பாதுகாப்புச் செயலாளர் தனது சாட்சியத்தில் பொதுமக்களின் இழப்பைத்தவிர்ப்பதற்காக யுத்த சூனியப்பிரதேத்தை பிரகடனப்படுத்தியமை அதனை மக்கள் நலனுக்காக நகர்த்தியமை ஆகாயத்தில் இருந்து துண்டுப்பிரசுரங்களை வீசியமை கனரக ஆயுதங்கள் பாவிப்பதை தவிர்த்தமை மக்களை மீட்டு பாதுகாப்பான வழியமைத்துக்கொண்டுவந்தமை பற்றியெல்லாம் குறிப்பிட்டார்.

பாதுகாப்பு செயலாளர் தனது சாட்சியத்தை தொடங்கிய ஆரம்பத்தில் இராணுவ நடவடிக்கை தொடர்பான வீடியோ காட்சிகள் இருக்குமா என அவரிடம் முதலாவது கேள்வியை ஆணைக்குழுவின் தலைவர் தொடுத்திருந்தாலும் பாதுகாப்பு செயலாளர் தனது சாட்சியத்தை முடித்துக்கொண்டபின்னர் ஆணைக்குழுவின் தலைவரான சி ஆர் டி சில்வா தொடுத்த கேள்வி அந்த மண்டபத்தில் இருந்தவர்களை ஒருவர் மற்றவரை பார்த்து சிரித்துக்கொள்ளும் வகையில் இருந்தது 

முன்னாள் சட்டமா அதிபராக இருந்தவரது கேள்வி இவ்வாறு அமைந்தது ' கடந்த வாரம் எமக்கு முன்பாக சாட்சியமளித்த  விடுதலைப்புலிகளின் முன்னாள் போராளிகள் சிலர் மிதிவெடிகளை தவிர்க்கும் வகையில் இராணுவத்தினர் தமக்கு வழிகாட்டிக்கொண்டுவந்ததாக கூறினர். 

அவ்வாறு மக்களை வழிநடத்திக்கொண்டுவருவதற்கு நீங்கள் ஏதேனும் விசேட உத்தரவுகளை வழங்கியிருந்தீர்களா ? என வினவினார். இந்தக் கேள்வி பதிலுக்கு வழிசமைக்கின்ற கேள்வி என்பதை சராசரி அறிவுள்ளவர்கள் கூட விளங்கியிருப்பர் 

இந்தக்கேள்விக்கு பதிலளித்த பாதுகாப்புச்செயலாளர் ' ஆம் நாங்கள் பாதுகாப்பான பயணத்திற்கு வழிவிடுமாறு உத்தரவு வழங்கியிருந்தோம் இதன் காரணமாக நாம் இழப்புக்களையும் எதிர்கொள்ள வேண்டியிருந்தது' எனக் குறிப்பிட்டார் .

இதன்போது கடைசி யுத்தத்தில் ஏற்பட்ட பாரிய இழப்புக்கள் தொடர்பான ஓர் உள் உணர்வை பெற்றுக்கொள்ளமுடிந்தது 

பாதுகாப்பு செயலாளர் தனது பதிலின் போது 'இராணுவத்தரப்பில் மனிதநேய யுத்தகாலத்தில் ஏறத்தாழ 6000 பேர் கொல்லப்பட்டதுடன் 30 000 வரையில் காயமுற்றிருந்தனர்.படையினர் தரப்பில் இழப்புக்களின் எண்ணிக்கை இவ்வளவாக இருக்கின்றவிடத்தில் நடைபெற்ற மோதல்களின் உக்கிரத்தன்மையை உங்களால் கற்பனைசெய்துகொள்ள முடியும் .ஏனென்றால் அவர்கள் பயன்படுத்திய ஆயுதங்கள் சாதனங்களே இதற்கு காரணமாகும். இது சிலரால் மறக்கப்பட்டுள்ள மற்றுமொரு விடயம் என்றவகையிலேயே இந்த உண்மையை நான் முன்வைக்கின்றேன்.

 சிலர் பொதுமக்களுக்கு ஏற்பட்ட இழப்பு தொடர்பாக பேசுகின்றனர் .பொதுமக்களின் இழப்பை அடையாளம் காண்பது கடினமான விடயமாகும் ஆனால் படையினர் தரப்பிலேயே இழப்புக்களின் எண்ணிக்கை இவ்வளவாக இருக்கும் என்றால் விடுதலைப்புலிகள் தரப்பில் ஏற்பட்ட இழப்புக்களை நீங்கள் கற்பனை செய்து பார்க்க முடியும் எவரும் விடுதலைப்புலிகளுக்கு ஏற்பட்ட இழப்புக்கள் தொடர்பாக பேசுவதில்லை .இவையனைத்தையும் பொதுமக்களின் இழப்புக்களுடனேயே சேர்த்துப்பார்க்கின்றனர் .இராணுவமே அந்தளவு இழப்பை எதிர்கொண்டதென்றால் ஆகக் குறைந்தபட்சம் அதே அளவான இழப்புக்களை விடுதலைப்புலிகள் சந்தித்திருப்பர் .ஆனால் அது (விடுதலைப்புலிகளின் இழப்புக்கள்) அதிகமானதாகவே இருக்கும் என்பது எனக்கு நிச்சயம் ஏனென்றால் அரச படையினரின் சூட்டுப்பலம் அதிகமாக இருந்தமையே இதற்கு காரணமாகும்.இது எவ்வளவென்பது யாருக்கும் தெரியவும் மாட்டாது யாரும் இதைப்பற்றி பேசுவதுமில்லை'  எனத் தெரிவித்தார்.

பொதுமக்களின் உயிரிழப்புக்கள் ஏற்படவில்லை என்ற விடயத்தினை ஆரம்பமுதலே ஒரேதொனியில் பாதுகாப்புச் செயலாளர் வலியுறுத்தியிருந்தபோதும் விடுதலைப்புலிகள் இயக்க உறுப்பினர்கள் பொதுமக்களின் உடையில் இருந்ததாக அவர் குறிப்பிட்ட விடயங்களைப் பார்க்கையில் பெரும் ஆளிழப்பு ஏற்பட்டுள்ளமை துலாம்பரமாகின்றது 

நல்லிணக்க ஆணைக்குழுவின் அங்கத்தவர்களில் ஒருவரான இலங்கையின் சிரேஷ்ட இராஜதந்திரி எச் எம் ஜி எஸ் பலிக்கார பாதுகாப்பு செயலாளரைப்பார்த்து ' நீங்கள் மனித நேய செயற்பாடுகள் குறித்து சிறப்பான விபரிப்பை வழங்கியுள்ளீர்கள் .நாங்கள் ஓமந்தையில் தடுத்துவைக்கப்பட்டுள்ள வர்களை சென்று சந்தித்தோம் அவர்கள உண்மையில் விடுதலைப்புலிகளின் கடும் போக்கு உறுப்பினர்கள் அவர்கள் விசாரணைக்கு முகங்கொடுத்தும் சிலர் புனர்வாழ்வளிக்கப்பட்டும் வருகின்றனர் .அபாயங்களையும் மிதிவெடிகளையும் தவிர்த்து தாம் சரணடைவதற்கான வழிமுறையில் பாதுகாப்பு படையினர் எங்கனம் உதவினர் என அவர்கள் குறிப்பிட்டனர். இந்த விடயத்தில் நிறைய ஊகங்கள் இருக்கின்ற காரணத்தால் அந்த சரணடையும் படிமுறை குறித்து எமக்கு விபரிக்க முடியுமா  ? இவ்விடயத்தில் ஏற்கனவே தடுத்துவைக்கப்பட்டுள்ளவர்கள் விலாவாரியாக தகவல் வழங்கியுள்ளதுடன் தாம் முன்சென்ற கிரமமான படிமுறை குறித்து அவர்களே விபரித்துள்ளதால் இது விடயத்தில் நீங்களும் உங்களது களநிலை தளபதிகளும் ஏதேனும் சிரமங்களுக்கு முகங்கொடுக்க நேரிட்டதா ? எனக் கேள்வி எழுப்பினார் 

இந்தக் கேள்வியும் பதிலுக்கு வழிசமைக்கும் கேள்வியாகவே அமைந்திருந்தது ஆணைக்குழு உறுப்பினர்கள் சாட்சியை குறுக்கு விசாரணைக்கு உட்படுத்தும் வகையிலான கேள்விகளைக் கேட்பதை விடுத்து சாட்சிகள் கூறுவதை ஆமோதிக்கும் பாணியிலேயே கேள்விகளை வடிவமைக்கின்றமை தெளிவாக தெரிந்தது.

இந்த கற்றுக்கொண்ட பாடங்கள் நல்லிணக்க ஆணைக்குழு நடைபெற்ற சம்பவங்கள் தொடர்பில் விசாரணை நடத்துகின்ற பணியைச் செய்யாமல் நடைபெற்ற சம்பவங்கள் தொடர்பான விபரிப்புக்களை பதிவுசெய்கின்ற ஒன்றாக அமைந்துவிடுமோ என்ற ஐயப்பாடுகள் அங்கு வந்திருந்தோரிடையே எழுந்தன .

இந்த ஆணைக்குழு அதன் விசாரணைகளை நிறைவுசெய்வதற்கு முன்னதாகவே முடிவுகளை தீர்மானித்து விட்டதாகவே எண்ணத்தோன்றுகின்றது யுத்த நிறுத்த ஒப்பந்தம் விடுதலைப்புலிகள இயக்கம் ஐக்கிய தேசியக்கட்சி நோர்வே அனுசரணை யாவுமே தவறுகளாக அறிவிக்கப்படப்போகின்றன என்பதற்கான தெளிவான அடையாளங்கள் தென்படுகின்றன.

 ஒரு தரப்பு சரியென்றும் மற்றத்தரப்பு தவறென்றும் முன்கூட்டியே நிலையெடுத்துக்கொண்டு நல்லிணக்கத்தை நோக்கிய பாதையில் பயணித்துவிடமுடியாது அப்படிப்பயணிப்பின் அது உண்மையான நல்லிணக்கத்திற்கு வழிவிடாது என்பதை வரலாறுகள் உணர்த்திநிற்கின்றன 

நல்லிணக்கம் சாத்தியமாவதற்கு அதனை அடைவதற்கு எடுக்கப்படும் முயற்சிகள் தொடர்பில் சம்பந்தப்பட்ட தரப்பினருக்கு போதிய நம்பிக்கை இருக்க வேண்டும் அன்றேல் அந்த நம்பிக்கையை கட்டி எழுப்புவதற்கான முயற்சிகள் எடுக்கப்படவேண்டும் .

ஆனாலும் இலங்கையில் அவ்வாறான மற்றுமொரு சந்தர்ப்பமும் கைநழுவிச் சென்று விடுமோ என்ற சந்தேகத்தை வலுப்படுத்துவதாக தற்போது இடம்பெறும் கற்றுக்கொண்ட பாடங்கள் மற்றும் நல்லிணக்க ஆணைக்குழுவின் ஆரம்பகட்ட அமர்வுகள் கோடிட்டுக்காட்டுகின்றன .

இறுதியாக இந்த கட்டுரையை முடிக்கு முன்னர் நல்லிணக்கம் தொடர்பாக பிலிப்பைன்ஸ் நாட்டின் முன்னாள் ஜனாதிபதி கொரஸோன் அக்கியுனோ கூறிய கூற்றை மீட்டிப்பார்க்கின்றேன் .

'நல்லிணக்கமானது நீதியுடன் கூடிவருவதாக இருக்கவேண்டும் .அப்படியில்லாவிட்டால் அது நின்று நிலைக்க மாட்டாது நாம் அனைவரும் சமாதானத்திற்காக நம்பிக்கை வைக்கின்றோம் .ஆனால் அந்த சமாதானம் என்னவிலைகொடுத்தும் பெறப்பட்ட சமாதானமாக இருந்துவிடமுடியாது அந்த சமாதானம் கொள்கையின் அடிப்படையில் நீதியின் அடிப்படையிலானதாக அமைந்திடவேண்டும்'

-------------------------------------------------------------------------------------------------------------


வடக்கில் கணிசமான இராணுவப்பிரசன்னம் இருக்க வேண்டும்
                                                                                  பாதுகாப்பு செயலாளர் 



விடுதலைப்புலிகள் இயக்கத்தினர் மீள ஒருங்கிணையும் சாத்தியக்கூறுகளை தடுத்துநிறுத்துவதற்காக வடக்கில் கணிசமான இராணுவப்பிரசன்னம் இருக்க வேண்டும் என்ற நிலைப்பாட்டைத்தாம் கொண்டுள்ளதாக பாதுகாப்பு அமைச்சின் செயலாளர் கோட்டபாய ராஜபக்ஸ தெரிவித்தார்


விடுதலைப்புலிகளது  சர்வதேச வலையமைப்பானது இன்னமும்   கணிசமான அளவிற்கு அப்படியே இருப்பதாகவும் அவர் எச்சரித்துள்ளார்
கற்றுக்கொண்ட பாடங்கள் மற்றும் நல்லிணக்கத்திற்கான சாத்தியக்கூறுகள் தொடர்பாக ஆராய்வதற்கான ஆணைக்குழுவின் முன்னிலையில் இன்று கருத்துவெளியிடும் போதே அவர் இந்த விபரங்களைத்தெரிவித்தார்


கொழும்பிலுள்ள சர்வதேச கற்கைகளுக்கான லக்ஸ்மன் கதிர்காமர் நிலையத்தில் இன்று நடைபெற்ற இன்றைய அமர்வில் பாதுகாப்பு அமைச்சின் செயலாளர் கோட்டபாய ராஜபக்ஸ பங்கேற்பதனை அறிந்து பெருமளவான உள்நாட்டு வெளிநாட்டு செய்தியாளர்கள் அங்கு கூடியிருந்தனர்
சுமார் இரண்டரை மணிநேரங்கள் கருத்துக்களை தெரிவித்ததுடன் கேள்விகளுக்கும் பதிலளித்திருந்தார்


இலங்கை நேரப்படி இன்று பிற்பகல் இரண்டு மணிக்கு இந்த அமர்வு ஆரம்பமாகியது இதன் போது கருத்துவெளியிட்ட பாதுகாப்புச்செயலாளர் கோட்டபாய ராஜபக்ஸ
பாரிய இராணுவ பலத்தைக் கொண்டிருந்த விடுதலைப்புலிகளை அமைப்பையே இலங்கை படையினர் தோற்கடித்தனர் என்பதை பலரும் இன்று மறந்துபோயுள்ளனர் எனக்குறிப்பிட்டதுன் பாதுகாப்பு அமைச்சின் செயலாளராக தாம்; 2005ம் ஆண்டில் பதவியேற்றபோது வன்னியின் பெரும்பகுதியும்; கிழக்குமாகாணத்தின் பலபகுதிகளும் விடுதலைப்புலிகளின் கட்டுப்பாட்டிலேயே இருந்ததாக குறிப்பிட்டார் சிறுவர் போராளிகள் அடங்கலாக விடுதலைப்புலிகள் இயக்கத்தில் 30000 நிரந்தர போராளிகள் இருந்ததாக பாதுகாப்பு செயலாளர் சுட்டிக்காட்டினார் 


விடுதலைப்புலிகளிடம் இராணுவப்பிரிவு கடற்படை விமானப்படை என அனைத்து பிரிவுகளும் இருந்தன அவர்களிடம் தற்கொலைப்படை இருந்தது உலகில் எந்தவொரு அமைப்பிலும் பார்க்க அதிகளவான தற்கொலைக்குண்டுத்தாக்குதல்களை அவர்கள் நடத்தியிருந்தனர் அவர்களிடம் பயங்கர ஆயுதங்கள் இருந்தன ஆட்டிலறிகள் ஏவுகணைகள் யாவும் இருந்தன மக்கள் படையென்ற பெயரில் பொதுமக்களுக்கும் அவர்கள் ஆயுதப்பயிற்சிகளை வழங்கியிருந்தனர் இப்படியாக பாரிய இரர்ணுவப்பலத்தைக்கொண்டிருந்த விடுதலைப்புலிகள் இயக்கத்தையே இலங்கைப்படையினர் தோற்கடித்திருந்தனர் அவர்கள் சிறுகுழுவிற்கு எதிராக போரிடவில்லை விடுதலைப்புலிகளின் இராணுவ பலத்தின் பாரிய தன்மையை விளங்கிக்கொள்ளாதவர்களாக ஏதோ சிறுகுழுவிற்கு எதிராகவே யுத்தம் செய்தது போன்று பலர் கருத்துக்களை வெளியிடுகின்றனர் விடுதலைப்புலிகளைத்தோற்கடிப்பதற்கு இலங்கை அரசாங்கத்திடம் தெளிவான திட்டம் இருந்ததைப்போன்றே மக்களைப்பாதுகாப்பதற்கும் ஆரம்பமுதலே தெளிவான திட்டம் இருந்தது விடுதபை;புலிகள் மிகக்கொடுரமான பயங்கரவாத அமைப்பாக இருந்ததாக குறிப்பிட்ட அவர் விடுதலைப்புலிகள் இழைத்ததாக கூறப்படும் அட்டுழியங்கள் தொடர்பான ஆவணங்களை ஆணைக்குழுவின் முன்பாக கையளித்தார்  விடுதலைப்புலிகளுடனான இறுதியுத்தத்தின் போது முப்படையினரையும் சேர்ந்த 6000பேர் கொல்லப்பட்டிருந்ததுடன் 30 ஆயிரம் பேர் வரை காயமடைந்திருந்தனர் பாதுகாப்பு படையினருக்கும் இத்தகைய அளவில் இழப்புக்கள் ஏற்பட்டிருப்பின் நடைபெற்ற மோதல்களின் உக்கிரத்தன்மையை உணர்ந்துகொள்ளமுடியும் என பாதுகாப்பு அமைச்சின் செயலாளர் கோட்டபாய ராஜபக்ஸ குறிப்பிட்டார் பொதுமக்களையும் விடுதலைப்புலிகளையும் இனங்காண்பது மிகவும் கடினமானதாக இருந்தது அரச படையினரின் தரப்பில் 6000 பேர் உயிரிழந்தும் 30000 பேர் காயமுற்றுமிருந்தால் விடுதலைப்புலிகளின் தரப்பில் எந்தளவிற்கு இழப்புகள் ஏற்பட்டிருக்க வேண்டும் என அவர் கேள்வி எழுப்பினார் இராணுவத்தினரின் பலம் அதிகமாக இருந்தமைகாரணமாக விடுதலைப்புலிகள் தரப்பில் இழப்புக்கள் அதிகமாகவே ஏற்பட்டிருக்கும் எனக்குறிப்பிட்ட பாதுகாப்பு அமைச்சின் செயலாளர்; விடுதலைப்புலிகளது இழப்புக்கள் தொடர்பாக எவருமே கதைப்பதில்லை எனக்குறிப்பிட்ட அவர் பொதுமக்களின் இழப்புக்கள் தொடர்பாக மாத்திரமே பேசுவதாக கூறினார் இது அபாயகரமானவிடயம் எனச் சுட்டிக்காட்டினார் 


வடக்கில் சிவில் நிருவாகத்தை படிப்படியாக பொலிஸாரிடம் வழங்குவதற்கான நடவடிக்கைகளை அரசாங்கம் மேற்கொண்டுவருகின்றது. ஆனால் வடக்கிலிருந்து இராணுவ முகாம்களை முழுமையாக அகற்ற முடியாது என பாதுகாப்புச்செயலாளர் கோட்டாபய ராஜபக்ஸ தெரிவித்துள்ளார்

விடுதலைப்புலிகள் போன்ற அமைப்புக்கள் மீண்டும் எழாதவாறு தடுப்பதற்காக வன்னிப்பகுதிக்காடுகளை இராணுவ ஆதிக்கத்திற்குள் வைத்திருக்க வேண்டிய தேவை உள்ளது அதேபோன்று ஆயுதங்கள் கொண்டுவரப்படாமல் தடுப்பதற்கு கடல்பகுதியை ஆதிக்கத்திற்குள் வைத்திருப்பது அவசியம் எனவும் அவர் சுட்டிக்காட்டினார்

 விடுதலைப்புலிகள் இயக்கத்தினர் மீள ஒருங்கிணையும் சாத்தியக்கூறுகளை தடுத்துநிறுத்துவதற்காக வடக்கில் கணிசமான இராணுவப்பிரசன்னம் இருக்க வேண்டும் என்ற நிலைப்பாட்டைத்தாம் கொண்டுள்ளதாக பாதுகாப்பு அமைச்சின் செயலாளர் கோட்டபாய ராஜபக்ஸ தெரிவித்தார்
;
கற்றுக்கொண்ட பாடங்கள் மற்றும் நல்லிணக்கத்திற்கான சாத்தியக்கூறுகள் தொடர்பாக ஆராய்வதற்கான ஆணைக்குழுவின் முன்னிலையில் இன்று எழுப்பப்பட்ட கேள்வியொன்றுக்கு பதிலளிக்கும் போதே அவர் இந்த விபரங்களைத்தெரிவித்தார்

வடக்கில் சிவில் நிர்வாகத்தை ஏற்படுத்த நடவடிக்கை எடுக்கப்படுகின்றதா என எழுப்பப்பட்ட கேள்விக்கு பதிலளித்த பாதுகாப்புச்செயலாளர்

வன்னியில் தற்போது சிவில் நிர்வாகம் இடம்பெற்று வருகின்றது. அண்மையில் அமைச்சரவை கூட்டமும் அங்கு நடைபெற்றது. நிர்வாக செயற்பாடுகளை படிப்படியாக பொலிஸாரிடம் கையளிக்க எதிர்பார்க்கின்றோம். எனினும் இராணுவத்தினரை அங்கிருந்து முழுமையாக வெளியேற்ற முடியாது. இராணுவ முகாம்கள் என்பது அம்பாந்தோட்டையிலும் மாத்தறையிலும் உள்ளன. நாட்டின் எப்பகுதியிலும் இராணுவ முகாம்கள் இருக்கும் வன்னியின் கடற்பகுதி மற்றும் காட்டுப்பகுதிகளில் அதிகளவில் பாதுகாப்பு வழங்கவேண்டியுள்ளது. மீண்டும் ஒருமுறை பயங்கரவாத அமைப்பு ஒன்று உருவாவதற்கு இடமளிக்க முடியாது. காரணம் புலிகளின் சர்வதேச வலையமைப்பு இன்னும் செயற்படுகின்றது. எனவே நாங்கள் கவனமாக இருக்கவேண்டும் என கோட்டபாய குறிப்பிட்டார்.

தனியாருக்கு சொந்தமான காணிகள் இராணுவ முகாம்கள் அமைப்பதற்காக எடுக்கப்படுகின்றதா என எழுப்பப்பட்ட கேள்விக்கு பதிலளித்த கோட்டபாய ராஜபக்ஸ

வன்னியில் மக்களினதோ தனியாரினதோ காணிகளில் எக்காரணம் கொண்டும் இராணுவ முகாம்களையும் இராணுவ நிலையங்களையும் அமைக்கும் எண்ணம் அரசாங்கத்துக்கு இல்லை ட அரசாங்க காணிகளிலேயே இராணுவ முகாம்களை மீளமைத்துவருகின்றோம்  அரசாங்கத்திற்கு சொந்தமான பாடசாலை கோவில்கள் போன்ற கட்டிடங்களையும் பொதுமக்கள் பாவனைக்காக இராணுவத்தினர் மீளக்கையளித்து வருகின்றனர்இது இன்னமும் முழுமை பெறவில்லை இருந்தபோதும் துரிதமாக அந்த நடவடிக்கைகள் மேற்கொள்ளப்படுகின்றது எனினும் யாழ்ப்பாணத்தில் ஒரு விடயம் காணப்படுகின்றது. அதாவது பலாலியிலும் காங்கேசன்துறையிலும் சில இடங்களில் அதியுயர் பாதுகாப்பு வலயங்கள் உள்ளன. அது தொடர்பில் தற்போது ஆராய்ந்துவருகின்றோம். அதாவது இராணுவத்துக்கு எந்தளவு காணிகள் தேவை என்பது தொடர்பில் ஆய்வு ஒன்றை நடத்தி வருகின்றோம். அதன்படி தேவையற்ற காணிகள் வழங்கப்படலாம். பாதிக்கப்படுகின்ற மக்களுக்கு நட்டஈடு வழங்கப்படும் என்பதுடன் மாற்றுக்காணிகளும் வழங்கப்படும் எனக் சுட்டிக்காட்டினார்

இராணுவத்தினருக்காக நிரந்தர வீடுகள் அமைத்துக்கொடுக்க நடவடிக்கை ஏதும் வன்னியில் மேற்கொள்ளப்படுகின்றனவா என எழுப்பப்பட்ட கேள்விக்கு பதிலளிக்கையில்

. இராணுவத்தினருக்கு நிரந்தர வீடுகள் அமைத்துக்கொடுக்கப்படவில்லை. அங்கு பணிபுரியும் இராணுவத்தினர் தங்குவதற்கே இருப்பிடங்கள் அமைக்கப்படுகின்றன. இதனை புரிந்துகொள்ளவேண்டும். இராணுவத்தினரை அங்கு குடியேற்றும் எண்ணம் கிடையாது எனக்குறிப்பிட்டார்

ஊடகவியலாளர் திஸ்ஸநாயகத்திற்கு 20வருட கடூழியச்சிறைத் தண்டனை

By Arun Arokianathan
Virakesari 01.09.2009
Headlines

ஊடகவியலாளர் ஜே. திஸ்ஸநாயகத்திற்கு மேல்மாகாண மேல் நீதிமன்றம் இன்று 20வருட கடூழிய சிறைத்தண்டனை விதித்து தீர்ப்பளித்துள்ளது அரசாங்கப்படையினர் மனிதநேய நடவடிக்கைகளை முன்னெடுத்தபோது இனத்துவேசத்தை பரப்பும் வகையில் வெளியிடப்பட்ட ஆக்கங்களின் மீதான மூன்று குற்றச்சாட்டுக்களில் குற்றவாளியாக நிருபிக்கப்பட்டதனாலேயே இந்த தீர்ப்பு வழங்கப்பட்டுள்ளது




திஸ்ஸநாயகத்தால் வெளியிடப்பட்ட நோர்த் ஈஸ்டன் மன்த்லீ என்ற சஞ்சீகையில் 2006ம் ஆண்டு ஜுலை முதலாம் திகதிமுதல் 2007ம் ஆண்டு ஜுலை முதலாம் திகதிவரையான காலப்பகுதியில் எழுதப்பட்ட ஆக்கங்களின் மூலமாக பயங்கரவாத தடைச்சட்டத்தின் 2.1 ர் பிரிவின் கீழ் சதிமுயற்சியில் ஈடுபட்டமை பயங்கரவாத தடைச்சட்டம் 2ர்ன் கீழ் ஒற்றுமையின்மை வன்முறையை தூண்டும் வகையில் குற்றமிழைத்தமை அவசரகாலச்சட்டத்தின் கீழ் பிரத்தியேகமான பயங்கரவாத நடவடிக்கைகளில் அதாவது சஞ்சிகை விநியோகம் மூலமாக விடுதலைப்புலிகளுக்கு நிதிதிரட்டியமை ஆகிய மூன்று குற்றச்சாட்டுக்களின் மீதே இன்று தீர்ப்பு வழங்க்பபட்டது இதில் முதல் இரண்டு குற்றச்சாட்டுக்களின் மீதும் குற்றவாளியாக தீர்மானிக்கப்பட்டு தலா 5வருடங்கள் கடூழியச்சிறைத்தண்டனை விதிக்கப்பட்ட திஸ்ஸநாயகம் அவசரகாலச்சட்டத்தின் கீழ் சுமத்தப்பட்ட குற்றச்சாட்டிலும் குற்றவாளியாக தீர்மானிக்கப்பட்ட நிலையில் 10வருடகால கடூழியச்சிறைத்தண்டனையுமாக மொத்தம் 20வருடகடுழிய சிறைத்தண்டனை விதித்து மேல்மாகாண மேல் நீதிமன்ற நீதிபதி தீபாலி விஜேசுந்தர

தீர்ப்பளித்தார்.

முன்னதாக காலையில் இந்த வழங்கின் தீர்ப்பை அறிந்துகொள்வதற்காக பெரும் எண்ணிக்கையிலான ஊடகவியலாளர்கள் நீதிமன்றக்கட்டிடத்தொகுதியின் முன்பாக கூடியிருந்தனர்

ஊடகவியலாளர் திஸ்ஸநாயகம் இன்று காலை 9.30மணியளவில் மேல்நீதிமன்றத்திற்கு கொண்டுவருவார் என தெரிவிக்கப்பட்டிருந்த நிலையில் ஊடகவியலாளர்கள் சந்தேகநபர்களைக்கொண்டுவரும் பேருந்துகளின் வரவிற்காக காத்திருந்தனர் .9.30மணியளவில் கூட்டம்நிறைந்த சிறைச்சாலை பேருந்து மேல்நீதிமன்ற வளாகத்திற்கு முன்பாக வந்து நின்றதும் சக ஊடகவியலாளர் ஒருவர் திஸ்ஸநாயகம் இதில் கொண்டுவரப்பட்டாரா என வினவினார் .

அதன்போது சிறைச்சாலை காவலாளர் ஒருவர் இல்லை எனப்பதிலளிக்கவே ஏனைய பேருந்துகள் வரும் வரையில் கலந்துரையாடலில் ஈடுபட்டிருக்கவே ஏற்கனவே கூட்டத்துடன் வந்திருந்த பேருந்திலிருந்து திஸ்ஸ நாயகம் அழைத்துச்செல்லப்படுவதாக அங்கு நின்றிருந்த சிலர் கூறவே ஊடகவியலாளர்கள் முண்டியடித்தபடி ஒளிப்படக்கருவிகளுடன் விரைந்தனர் எனினும் திஸ்ஸநாயகம் நீதிமன்ற வளாகத்திற்குள் கொண்டு செல்லப்பட்டபோது அவரது முழு உருவையும் பதிவுசெய்யமுடியவில்லை தூரத்தேயிருந்தவாறு பக்கவாட்டையே பதிவுசெய்யமுடிந்தது

மேல் நீதிமன்றத்திற்குள் சென்ற போது அங்கு ஊடகவியலாளர்களுடன் மனித உரிமை ஆர்வலர்கள் தூதரக அதிகாரிகளும் அமர்ந்திருந்தனர்.

நீதிபதி தீபாலி விஜேசுந்தர வருகைதந்ததையடுத்து ஊடகவியலாளர் ஜே திஸ்ஸநாயகத்தின் வழக்கு எடுத்துக்கொள்ளப்பட்டபோது அரச தரப்பு வழக்கறிஞர் சுதர்சன டி சில்வா வாதிடுகையில் “குற்றஞ்சாட்டப்பட்டுள்ள திஸ்ஸநாயகம் 2006ம்ஆண்டு ஜுலை முதலாம் திகதி முதல் 2007ம் ஆண்டு ஜுலை முதலாம் திகதி வரை நோர்த் ஈஸ்டன் மன்த்லீ என்ற சஞ்சீகையில் எழுதிய ஆக்கங்களில் கிழக்கில் அரசாங்கமும் அரச படைகளும் முன்னெடுத்த மனித நேய நடவடிக்கைகளின் போது இடம்பெற்ற படுகொலைகளுக்கு அரசாங்கமே பொறுப்பு என்ற வகையிலும் உணவு மருந்து மற்றும் எரிபொருட்களை போதுமான அளவில் கிடைக்காமற்செய்து தடைகளை ஏற்படுத்துவதன்; மூலமாக மக்களை வெளியேறநிர்ப்பந்திக்கின்றது எனவும் எழுதியிருந்தார் இதன் மூலமாக இனங்களுக்கு மத்தியில் குழப்பத்தை பரப்பும் வகையில் அவரது நடவடிக்கைகள் அமைந்திருந்தன அரசியல்சாசனத்தில் கருத்துவெளியிடும் சுதந்திரம் இருக்கின்றபோதும் அதனைப்பாவித்து எவரும் பொய்களைப்பரப்பமுடியாது அதி உயர்ந்த ஜனநாயகம் ஊடகசுதந்திரம் காணப்படுவதாக கூறப்படும் அமெரிக்காவிலும் கூட கருத்துசுதந்திரம் என்ற பேரில் பொய்களைப்பரப்புவதற்கு அனுமதிகிடையாது உதாரணத்திற்கு சனக்கூட்டம் நிறைந்திருக்கும் ஓர் நாடாக அரங்கில் தீ பற்றிவிட்டதாக யாரும் பொய்யொன்றைக் கூறினால் அதனால் ஏற்படும் விபரீதம் எத்தகையதென்பதை நீங்கள் அறிவீர்கள் அதையொத்த வகையில் தான் இவரது செயற்பாடும் அமைந்திருக்கின்றது எனவே இவருக்கு வழங்கக்கூடிய அதிக பட்ச தண்டனையை வழங்க வேண்டும” எனக்கேட்டுக்கொண்டார்.

இதனைத்தொடர்ந்து குற்றஞ்சாட்டப்பட்டவர் தரப்பில் ஆஜரான வழக்கறிஞர் அனில் சில்வா எதிர்த்துவாதிடுகையில் “நீங்கள் தீர்ப்பை எழுதி வந்துள்ளீர்கள். தற்போது பேசிப் பயனில்லை. எனினும் மேல் மாகாணத்தில் உள்ள பிரதான நிதிமன்றத்தில் பிரதான நீதிவான் என்ற வகையில் நீங்கள் வழங்கும் தீர்ப்பு நியாயபூர்வமானதாக குறைந்த தண்டனை காலத்தைக் கொண்டதாக இருக்க வேண்டும் என வேண்டிக் கொள்கிறேன். நீங்கள் அறிந்துகொள்ள வேண்டம் என்பதற்காக எனது கட்சிக்காரர் திஸ்ஸநாயகம் குறித்து சில விடயங்களை இங்கே குறிப்பிட்டாக வேண்டும்.எனது கட்சிக்காரர் திஸ்ஸநாயகம் ஆரம்பகாலத்தில் பணிப்புரிந்த மார்க்க நிறுவனத்தில் சக ஊழியர்களின் உரிமைகளுக்காக குரல் கொடுத்தமையினால் தனது வேலையையும் இழந்தார். 1980 களில் தென்பகுதியிலேயே சிங்கள இளைஞர்களின் மனிதஉரிமைகள் மீறப்பட்டபோது அதற்கு எதிராக குரல் எழுப்பினார் அதுமட்டுமன்றி அக்காலப்பகுதியில் காணமல் போனவர்களின் குடும்பங்களுடன் இணைந்து பணியாற்றி அவர்களுக்காக குரல் கொடுத்தார் இப்படியாக தனது இனத்தை சார்ந்தவர்கள் அல்லாத சிங்கள இனத்திற்காக குரல் கொடுத்த திஸ்ஸ நாயகம் இன்று தமது தமிழ் இனத்திற்காக குரல் கொடுத்தமைக்காக தனது சுதந்திரத்தை இழந்து நிற்கின்றார்.வடக்கிலிருந்து இடம்பெயர்ந்த மக்கள் பற்றி யாரும் தற்போது பேச முன்வருவதில்லை அவர்களை பற்றிபேசினால் ஏற்படும் வேதனை எனக்கு தெரியும், திஸ்ஸநாயகம் இனதுவேசம் அற்றவர் என்பதனை சாட்சியம் வழங்கிய சிங்கள சாட்சிக்காரர்களின் வாக்குமூலங்களிலிருந்து நிரூபணமாகின்றது.அவர் குற்றமற்றவர் என்பதனை எனது வாதமாகும் பிணையேதும் வழங்கப்படாமல் அவரை ஒருவருடங்கள் 5 மாதங்கள் தடுப்புக்காவலில் வைத்திருந்தமை சட்டவிரோதமானது குற்றஞ்சாட்டப்பட்ட திஸ்ஸநாயகம் இனதுவேசி அல்ல சிகப்பு கண்ணாடிபோட்டு உளவு பார்க்கும் போலி தேசப்பற்றாளர்களுக்கு அனைத்துமே தவறாகதான் தெரியும். அவர்களுக்கு இவர் செய்தவையும் தவறாகவே தெரியும் இவர் தமிழர் என்பதனால் தற்போது சிறைத்தண்டனைக்கு ஆளாக்கப்பட்டிருக்கின்றார். தற்போது நாட்டில் இடம்பெறுவன சீரியதாக தென்படவில்லை இவரது விடயத்தில் நிறைவேற்று அதிகாரத்திடமிருந்து நிவாரணத்தை எதிர்ப்பார்த்து நிற்கின்றோம் அவர் எழுதியவை ஏனைய ஊடகவியலாளர்களுக்கும் ஓர் பாடமாகும் கருத்து வெளியிடும் சுதந்திரம் அரசியல் யாப்பில் உள்ளது தமிழர் என்றாலும் அரசியல் யாப்பிலுள்ள அந்த உரிமை இவருக்கும் உண்டு”

இதனைச் செவிமடுத்தபின்னர் நீதிபதி தனது தீர்ப்பை வாசித்தார். .பயங்கரவாத தடைச்சட்டம் மற்றும் அவசரகாலச்சட்டத்தின் கீழ் சுமத்தப்பட்ட மூன்று குற்றச்சாட்டுக்களிலும் திஸ்ஸநாயகத்தின் குற்றம் தெளிவாக நிருபிக்கப்பட்டிருப்பதாக குறிப்பிட்டார் 

நோர்த் ஈஸ்டன் மன்த்லீ என்ற சஞ்சிகையை அச்சிட சதிசெய்தமை திஸ்ஸமீது சுமத்தப்பட்ட முதலாவது குற்றச்சாட்டாகும் இந்த சஞ்சிகையை பிரசுரித்ததன் மூலம் இனங்களுக்கிடையே முரண்பாட்டை ஏற்படுத்தியமை இரண்டாவது குற்றச்சாட்டாகும் மூன்றாவது குற்றச்சாட்டு சஞ்சிகை விற்பனைமூலமாக பயங்கரவாதத்திற்கு நிதி அன்பளிப்புச்செய்தமையாகும் இதில் முதல் இரு குற்றச்சாட்டுக்களும் நிருபிக்கப்பட்ட நிலையில் தலா 5வருட கடூழியச்சிறைத்தண்டனை வழங்கப்பட்டதுடன் மூன்றாவது குற்றச்சாட்டும் சந்தேகங்களுக்கு இடமின்றி நிருபிக்கப்பட்டதால் 10வருட கடூழியசிறைத்தண்டனை விதிக்கப்பட்டது இவ்வாறு மொத்தமாக 20வருடகடூழிய சிறைத்தண்டனை விதிக்கப்பட்டது 

1980களில் அறிமுகப்படுத்தப்பட்ட கடுமையாக பயங்கரவாத தடைச்சட்டத்தின் கீழ் சிறைத்தண்டனை விதிக்கப்பட்ட இலங்கையின் முதலாவது ஊடகவியலாளர் திஸ்ஸநாயகம் என்பது குறிப்பிடத்தக்கது

சர்வதேசம் தலையிடுவதற்கான தருணம் இதுவே

-தமிழ்த் தேசியக் கூட்டமைப்பு



இலங்கையின் வன்னிப்பகுதியில் இடம்பெறும் மனிதப்பேரவலத்தை தடுத்துநிறுத்துவதற்கு இனிமேலும் தாமதிக்காமல் சர்வதேச சமூகம் தலையிடவேண்டும் இதுவே இறுதித்தருணம் என தமிழ்த்தேசியக்கூட்டமைப்பு கோரிக்கை விடுத்துள்ளது .

கொழும்பு ஜனாகி ஹோட்டலில் இடம்பெற்ற செய்தியாளர் மாநாட்டின் போதே இந்த அவசரக்கோரிக்கை விடுக்கப்பட்டது

இங்கு உரையாற்றிய தமிழ்த்தேசியக்கூட்டமைபின் பாராளுமன்றக்குழுத்தலைவர் இரா சம்பந்தன் தெரிவித்ததாவது
(மக்கள் சாவதற்கு இரண்டு காரணங்கள். ஒன்று அரச படைகளால் நடைபெறுகின்ற தாக்குதல்கள் மற்றது உணவில்லாமல் இருக்கின்ற நிலைமை அதனால் இதுவொரு மிகவும் பாரதூரமான நிலைமை தொடர்ந்தும் இந்த தாக்குதல் நடைபெறுமாக இருந்தால் உயிரிழப்புக்கள் இற்றைவரையிலும் நடந்ததைப்பார்க்க மிகவும் கூடுதலாக இருக்கலாம் அதைநாங்கள் ஒருபோதும் ஏற்றுக்கொள்ள முடியாது இந்தமக்கள் பாதுகாக்கப்படவேண்டும் இந்த மக்களுடைய உயிரைப்பாதுகாப்பதற்கு அரசாங்கத்திற்கு ஒரு கடமை இருக்கின்றது எல்ரீரீஈக்கு ஒரு கடமை இருக்கின்றது நிச்சயமாக மக்கள் பாதுகாக்கப்பட வேண்டும் )

இங்கு கருத்துவெளியிட்ட பாராளுமன்ற உறுப்பினர் சுரேஸ் பிரேமசந்திரன் தெரிவித்ததாவது
( இப்படியொரு நாட்டில் இருக்கக்கூடிய மக்கள் அந்த நாட்டின் அரசாங்கத்தாலேயே ஆயிரக்கணக்கில் கொலைசெய்யப்படுவதை நாங்கள் ஒரு இனப்படுகொலையாகவே பார்க்கின்றோம் இட் இஸ் எ ஜெனசைட் இட் இஸ் எ ஜெனசைட் இதுவொரு இனப்படுகொலை இதுவொரு இனப்படுகொலை மூன்று மாசத்திற்குள் பத்தாயிரத்திற்கு மேற்பட்ட மக்கள் கொலைசெய்யப்பட்டு இருபதினாயிரத்திற்கு மேற்பட்ட மக்கள் காயப்பட்டுள்ளனர் ஆகவே அப்படியான ஒருசந்தர்ப்பத்தில் நிச்சயமாக இலங்கை அரசாங்கம் இந்த மக்களைப் பாதுகாக்கத் தவறினால் யாருக்கும் பாதுகாப்பதற்கான உரிமை ரைட்டு புரொடெக்ற் இந்தியாவிற்கும் அந்த உரிமை இருக்கின்றது சர்வதேச சமூகத்திற்கும் அந்த உரிமை இருக்கின்றது இவர்களைப்பாதுகாக்க வேண்டிய கடமை நிச்சயமாக சர்வதேச சமூகத்திற்கு இருக்கின்றது இதுக்கு பிறகு இன்னுமொரு ஐயாயிரம் பத்தாயிரம் மக்கள் செத்ததற்கு பின்பு எங்களோட சேர்ந்து அவர்களும் அழாமல் அப்படியான கொலைகள் நடப்பதற்கு முன்பு அவர்கள் பாதுகாக்கப்பட வேண்டும் என்றே நாங்கள் விரும்புகின்றோம் )

யுத்தநிறுத்தத்தினை அமுல்படுத்துமாறு இலங்கை அரசாங்கத்திடம் பிரித்தானியா பிரஞ்சு வெளிவிவகார அமைச்சர்கள் வலியுறுத்தல்

மோதல்கள் இடம்பெறும் வலயத்தில் சிக்குண்டுள்ள ஆயிரக்கணக்கான மக்கள் பாதுகாப்பாக தப்பிப்பதற்கு வழிகோலும் வகையில் மனிதாபிமான யுத்தநிறுத்தமொன்றை அமுல்படுத்துமாறு பிரஞ்சு மற்றும் பிரித்தானிய வெளிவிவகார அமைச்சர்கள் கோரிக்கை விடுத்துள்ளனர் .

இலங்கை அரசாங்கத்துடன் உடன்பாட்டிற்கு வரத்தவறிவிட்டதாக பிரித்தானிய மற்றும் பிரஞ்சு வெளிவிவகார சுட்டிக்காட்டியுள்ளனர் .

இங்கு கருத்துவெளியிட்ட பிரிதானிய வெளிவிவகார அமைச்சர் டேவிட் மிலிபாண்ட்

(சர்வதேச சமூகத்திலுள்ள எந்தவொருதரப்பினரும் போர்நிறுத்தம் மோதல் தவிர்பு;பு போன்ற கோரிக்கைகளை பிரபாகரனைக்காப்பாற்றுவதற்காக விடுக்கவில்லை பொதுமக்களின் நலன் தொடர்பாக ஒட்டுமொத்தமான கவலைகள் மற்றும் இலங்கையின் நீண்டகால அமைதி என்பவனவற்றை கருத்தில் கொண்டே சர்வதேச சமூகம் இந்தக்கோரிக்கைகளை விடுக்கின்றது பொதுமக்களைப்பாதுகாப்பது இந்தத்தருணத்தில் மிகவும் முக்கியமானது பொதுமக்கள் மோதல் பிரதேசத்தை விட்டு வெளியேறாவண்ணம் தடுப்பதை விடுதலைப்புலிகள் நிறுத்திக்கொள்ளவேண்டும்; மோதல்கள் கட்டாயம் நிறுத்தப்படவேண்டும ஜி8நாடுகளின் வெளிவிவகார அமைச்சர்கள் ஏகமனதாக கூறியபடி மோதல்கள் கட்டாயம் நிறுத்தப்படவேண்டிய நேரம் இதுவாகும் இந்த விஜயத்தின் போது தாம் மூன்று முக்கிய விடயங்கள் தொடர்பாக கவனம் செலுத்தியுள்ளோம் ஐநாவிற்கு செவிமடுப்பது அரச சார்பற்ற நிறுவனங்களுக்கு செவிமடுப்பது செஞ்சிலுவை சர்வதேச குழுவிற்கு செவிமடுப்பது எதிர்க்கட்சிகளுக்கு செவிமடுப்பது அரசாங்கத்திற்கு செவிமடுப்பது என்பன இதில் ஒருவிடயம் இரண்டாவது விடயம் யாதென்றால் மோதல்கள் இடம்பெறும்பகுதியிலுள்ள மற்றும் இடம்பெயர்ந்த முகாம்களிலும் இடம்பெயர்ந்த முகாம்களை நோக்கிவந்துகொண்டிருக்கும் பொதுமக்களது நிலைதொடர்பாக சர்வதேச சமூகத்தின் கவலைகளைப்பகிர்ந்துகொள்வது அடுத்ததாக எவ்வாறு இலங்கையுடன் இணைந்து சர்வதேச சமூகம் இணைந்து பணியாற்ற முடியும் என ஆராய்வது ஏனெனில் சர்வதேச சமூகத்திற்கு சில கடப்பாடுகளுள்ளன இலங்கைக்கும்ம கடப்பாடுகள் உள்ளன அந்தவகையில் இருவரும் இணைந்து பணியாற்றுவது எவ்வாறு என்பது அடுத்த விடயம். கடந்த ஆறுமாத காலப்பகுதியில் இராணுவத்தினர் அடைந்த முன்னேற்றங்கள் கவனத்தை ஈர்ப்பதாக அமைந்துள்ளன ஆனால் யுத்தத்தை வெல்வதை விடவும் சமாதானத்தை வென்றெடுப்பது மிகவும் முக்கியமானதாகும் )

பிரஞ்சு வெளிவிவகார அமைச்சர் பேர்னாட் குச்னர் மேலும் கருத்துவெளியிடுகையில்

(நாம் பொதுமக்களின் நிலைமை தொடர்பாக ஆழ்ந்த கவலைகொண்டுள்ளோம் ஏன்நாம் மிகவும் கவலைகொண்டுள்ளோமென்றால் கடந்த 25வருடகாலங்களுக்கு மேலாக நீடித்த இந்த கடினமான யுத்தத்தின் முடிவில் மனிதர்களே எமக்கு மிகவும் முக்கியமானவர்கள் முற்றுகைக்குள்ளாக்கப்பட்டுள்ள இந்த மக்களின் பாதுகாப்பானது மிகவும் இன்றியமையானது வலயப்பகுதியில் இருந்து வெளியேறிவரமுடிந்த 200 ஆயிரம் மக்கள் எனக்கு இந்த புள்ளிவிபரங்கள் குறித்து சரியாக தெரியாது ஆனால் இவர்களது நிலைதொடர்பாக பல கேள்விகள் எழுகின்றன இவர்களை முகாம்களுக்குள் வரவேற்கப்டுவதுடன் பின்னர் மீளக்குடியமர்த்தப்படவேண்டும் ஆனால் தொடர்ந்தும் அங்கு இருக்கும் மக்களின் எண்ணிக்கை 20ஆயிரமாக இருக்குமோ அன்றேல் சில அரசசார்பற்ற நிறுவனங்கள் கூறுவது போன்று 50ஆயிரமாக இருக்குமோ என எனக்குத்தெரியாது நாம் இவர்களின் கதிதொடர்பாக அதிக கரிசனைகொண்டுள்ளோம் இதுதொடர்பாக பிரான்ஸ்மட்டுமன்றி பிரித்தானியாவும் கோரிக்கை விடுத்துள்ளது மக்களுக்கு எவ்வித கட்டுப்பாடுகளுமின்றி மனிதாபிமான உதவிகள் கிட்டுவதற்கு அனுமதிக்குமாறு நாம் கோருகின்றோம் ஐக்கிய நாடுகள் தரப்பினருக்கும் செஞ்சிலுவை சர்வதேசக்குழுவிற்கும் அரசசார்பற்ற நிறுவனங்களுக்கும் மனிதாபிமான நிறுவனங்களுக்கும் பாதுகாப்பு வலயப்பகுதிக்குள்சென்று மனிதாபிமான உதவிகளை வழங்க வழிவிடுமாறு கோருகின்றோம் இதுமிகவும் முக்கியமானது எமது மக்களுக்கு பிரஞ்சு மற்றும் பிரித்தானிய மக்கள் மட்டுமன்றி உலகிலுள்ள மனிதாபிமானிகள் யாவரும் உதவுவதற்கு அனுமதிப்பது மிகவும் அவசியமானதாகும் )

யுத்தத்தின் கோரத்தைப் பறைசாற்றும் வன்னி...

(கிளிநொச்சி புதுக்குடியிருப்பு புதுமத்தளானில் இருந்து ஆ அருண் )

இலங்கையில் விடுதலைப்புலிகளுடனான மரபுவழியுத்தம் இறுதிக்கட்டத்தையடைந்துள்ளதாக அரசாங்கமும் சர்வதேச ஊடகங்களும் சர்வதேச சமூகத்தின் பெரும்பாலான தரப்பினரும் கூறிவருகின்ற நிலையில் பாதுகாப்பு அமைச்சு முக்கியமான யுத்தப்பிரதேசங்களுக்கு கடந்த வெள்ளிக்கிழமை ஊடகவிலாளர்களை அழைத்துச்சென்றிருந்தது வட இந்தியாவைத்தளமாகக்கொண்ட பல்வேறு முக்கிய தொலைக்காட்சிகளின் செய்தியாளர்களுடன் மேற்குலக மற்றும் உள்நாட்டுச்செய்தியாளர்களுமாக சுமார் 50ஊடகவியலாளர்கள் இந்த பயணத்தில் இடம்பெற்றிருந்தனர் .

ஊடகவியலாளர்கள் யுத்தப்பிரதேசங்களுக்கு அழைத்துச்செல்லப்படுவதாக கூறப்பட்டிருந்த போதிலும் எங்கு போகப்போகின்றோம் என அனேகமான ஊடகவியலாளர்கள் அங்கலாய்த்திருந்தமையை அவர்களுடனான உரையாடல்களின் போது உணரமுடிந்தது .

இரத்மலானை விமானநிலையத்திலிருந்து விமானம் மூலம் அநுராதபுரவிமானநிலையத்திற்கு ஏற்றிச்செல்லப்பட்ட ஊடகவியலாளர்கள் அங்கிருந்து ஹெலிக்கொப்டர் மூலமாக அழைத்துச்செல்லப்பட்டு அங்கே ஒரு திறந்தவெளியில் தரையிறக்கப்பட்டபோதுதான் தாம் சென்றிருப்பது கிளிநொச்சிக்கு என அறிந்து ஊடகவியலாளர்கள் மத்தியிலே ஒருவித ஆச்சரியம் கலந்த உற்சாகம்தொற்றிக்கொண்டது .

நாம் தரையிறங்கியது கிளிநொச்சி விளையாட்டு மைதானம் என்பதும் அங்குதான் சமாதானகாலத்தின் போது வெளிநாட்டு பிரதிநிதிகளை ஏற்றிவந்த ஹெலிக்கொப்டர்களும் தரையிறக்கப்பட்டன என்பதையும் அங்கிருந்த சக ஊடகவியலாளர்கள் கூறியதை கேட்கமுடிந்தது

ஊடகவியலாளர்கள் பின்னர் கிளிநொச்சியில் விடுதலைப்புலிகளின் சமாதான செயலகம் உட்பட முக்கிய பணிமனைகள் அமைக்கப்பட்டிருந்த பகுதிக்கு கவசவாகனங்களில் அழைத்துச்செல்லப்பட்டனர் அப்போது கிளிநொச்சிய+டாக செல்லும் ஏ9பாதை எவ்வித சேதங்களுக்குமுட்படாது புதுப்பொலிவுடன் காணப்படுவதையும் வீதியோரங்களில் அமைந்திருந்த கடைகளில் பெரும் பாலானவை கூரைகளற்ற நிலையில் அன்றேல் சுவர்கள் இடிந்த நிலையில் காணப்பட்டதை அவதானிக்க முடிந்தது எனினும் மைதானத்திற்கு அருகே காணப்பட்ட இந்துக்கோவில் வெளித்தோற்றம் குலையாமல் அப்படியே இருப்பதை காணமுடிந்தது .

விடுதலைப்புலிகளது அரசியல்துறை நடுவப்பணியகம் அமைந்திருப்பதை சுட்டிக்காட்டுதற்கு போடப்பட்டிருந்த குறியீட்டுப்பலகைகு பதிலாக தற்போது 58வது படைப்பிரிவின் தலைமையகத்தை குறிக்கும் குறியீட்டுப்பலகை போடப்பட்டிருந்தது .

ஊடகவியலாளர்களுக்கான காலை உணவுபரிமாறப்பட்ட இடம் முன்பு விடுதலைப்புலிகளின் சமாதான செயலக கட்டிடமாக இருந்ததுடன் அந்தக்கட்டிடமும் வெளியே தெரியக்கூடிய பாதிப்புக்கள் ஏதுமின்றி முழுக்கட்டிடமாக இருந்தது


அதனைத்தொடர்ந்து சமாதானசெயலகப்பணிமனைக்கு அருகே முன்னர் விடுதலைப்புலிகளின் பிரதான நிர்வாகக்கட்டிடமாகவும் தற்போது 58வது படைப்பிரிவின் தலைமையகமாகவும் மாற்றப்பட்டுள்ள மாடிக்கட்டிடத்தில் கட்டளைத்தளபதி பிரிகேடியர் சவிந்திர சில்வா ஊடகவியலாளர்களுக்கு விளக்கமளித்தார்


இதன்போது மன்னார் முதற்கொண்டு புதுமத்தளான் பாதுகாப்பு வலய மண் அரண்தகர்பு நடவடிக்கைவரை 58வது படைப்பிரிவினர் ஈட்டிய வெற்றிகள் தொடர்பாக அவர் விபரித்தார்

ஆரம்ப கட்டத்தில் மன்னாரிலிருந்து படைநடவடிக்கையை ஆரம்பித்த போது அதிகளவான விடுதலைப்புலி உறுப்பினர்களைக்கொன்றொழிப்பதனையே இராணுவத்தினர் குறியாக கொண்டிருந்ததாக தெரிவித்த பிரிகேடியர் சவிந்திர சில்வா
ஆரம்பகட்டத்தில் மன்னார் விளைநிலப்பகுதியைக்கைப்பற்றும் வரையில் இராணுவநடவடிக்கைகள் மிகவும் மெதுவாக முன்னெடுக்கப்பட்டதாகவும் இதன்போது உறுதிப்படுத்தப்பட்ட வகையில் விடுதலைப்புலிகளைச்சேர்ந்த 2000பேரைக்கொன்றொழித்திருந்ததாகவும் குறிப்பிட்டார் இதேவேளை ஊடகவியலாளர்களுக்கு விளக்கமளிக்கப்பட்ட கட்டிடத்தில் இருந்த விளக்கப்பலகையில் 58வது படைப்பிரிவினர் தாக்குதல்களை ஆரம்பித்த 2007ம் ஆண்டு செப்டம்பர் 11ம்திகதி முதற்கொண்டு 2009ம் ஆண்டு ஏப்ரல் 23ம்திகதி வரையான காலப்பகுதியில் 5953விடுதலைப்புலிகள் இயக்க உறுப்பினர்கள் கொல்லப்பட்டதாகவும் 2938பேர் காயமுற்றதாகவும் சுட்டிக்காட்டப்பட்டிருந்தது

மன்னார் விளைநிலப்பகுதி கைப்பற்றப்பட்டதைத்தொடர்ந்து விடுதலைப்புலிகளே எதிர்பாராத வகையில் இராணுவநடவடிக்கை வேகமாக முன்னெடுக்கப்பட்டதுடன் இதன்போது வன்னியின் மேற்குப்பகுதியில் விடுதலைப்புலிகளின் முக்கிய கடற்படைத்தளமான விடத்தல்தீவு உட்பட பல முக்கிய தளங்கள் கைப்பற்றப்பட்டதாக குறிப்பிட்டார் இந்தவகையில் ப+நகரி கைப்பற்றப்பட்டமையானது முக்கியமானது என பிரிகேடியர் சவிந்திர சில்வா குறிப்பிட்டார் யாழ் பலாலி தளத்திற்கு இங்கிருந்து ஏறிகணைத்தாக்குதல்களை விடுதலைப்புலிகள் நடத்தியிருந்ததுடன் யாழ்ப்பாணத்திற்குள் ஊடுருவியிருந்ததாக குறிப்பிட்டார் ப+நகரி கைப்பற்றப்பட்டதுடன் யாழ்ப்பாணத்திற்கான ஊடுவல்கள் நிறுத்தப்பட்டதாக அவர் மேலும் சுட்டிக்காட்டினார்

58வதுபடைப்பிரிவினரே விடுதலைப்புலிகளின் கடுமையான தாக்குதல்களை முறியடித்தும் இயற்கையின் மாற்றங்களை எதிர்கொண்டும் பலத்த சவால்களுக்கு மத்தியில் ப+நகரியைத்தொடர்ந்து பரந்தன் கிளிநொச்சி விசுவமடு தர்மபுரம் புதுக்குடியிருப்பு போன்ற முக்கிய நகரங்களையும் கைப்பற்றியதாக பிரிகேடியர் சவிந்திர சில்வா குறிப்பிட்டார் இம்மாத முற்பகுதியில் விடுதலைப்புலிகள் இயக்கத்தினருக்கு எதிராக புதுக்குடியிருப்பு பகுதியில் இராணுவத்தினர் முற்றுகைச்சுற்றிவளைப்பொன்றை மேற்கொண்டு போரியல்வரலாற்றில் பெரும்வெற்றியொன்றை ஈட்டியதாக தெரிவித்த பிரிகேடியர் சவிந்திர சில்வா ஏப்ரல் 2ம்திகதிமுதல் 6ம்திகதிவரை இடம்பெற்ற இந்த முற்றுகைத்தாக்குதல்களில் விடுதலைப்புலிகளின் வடபோர்முனைத்தளபதி கேணல் தீபன் உட்பட முக்கிய படைப்பிரிவுகளைச்சேர்ந்த 15தளபதிகள் அடங்கலான 602பேர் கொல்லப்பட்டதுடன் 37பேர் காயமுற்றதாக தெரிவித்தார் விடுதலைப்புலிகள் இலங்கை இரர்ணுவத்தினரை குறைமதிப்பீடு செய்திருக்கலாம் எனவும் அதனாலேயே அவர்கள் இத்தகைய பாரிய இழப்பை சந்திக்க நேர்ந்ததெனவும் அவர் கூறினார்

இதன்போது ஊடகவியலாளர்களின் கேள்விகளுக்கு பதிலளித்த பிரிகேடியர் சவிந்திரசில்வாவிடம் விடுதலைப்புலிகள் இயக்கத்தில் தற்போதுள்ள உறுப்பினர்களின் எண்ணிக்கை தொடர்பாக உங்கள் கருத்து என ஊடகவியலாளர் ஒருவர் வினவியபோது “
விடுதலைப்புலிகளிடன் இத்தனை உறுப்பினர்கள் தான் உள்ளனர் என உறுதிபடுத்திக்கூறி என்னுடைய நம்பகத்தன்மையை இழக்க விரும்பவில்லை ஏனெனில் விடுதலைப்புலிகளிடம் உதாரணமாக 500 உறுப்பினர்கள் தற்போது இருக்ககூடும் ஆனால் நாளைக்கே அவர்கள் நினைத்தால் அதனை 5000மாக அதிகரிக்ககூடிய ஆற்றல் அவர்களுக்கு உள்ளதென கூறினார் விடுதலைப்புலிகளின் தலைமையின் உத்தரவிற்கிணங்க தற்போது இயக்க அங்கத்தவர்கள் யாவரும் சீருடைகளைக்களைந்துவிட்டு சிவில் உடையிலேயே சண்டையிடுவதாக பிரிகேடியர் குறிப்பிட்டார்

இராணுவநடவடிக்கையின் போது பெருமளவான பொதுமக்கள் கொல்லப்படுவதாக பல்வேறு தரப்பிலிருந்தும் குற்றச்சாட்டுக்கள் எழுப்பப்படுகின்றதே என ஊடகவியலாளர் ஒருவர் வினவியபோது அந்தக்குற்றச்சாட்டு முற்றுமுழுதாக பொய்யானது எனத் தெரிவித்த 58வது படைப்பிரிவின் கட்டளைத்தளபதி சீரோ சிவிலியன் கசுவல்டி என்ற பொதுமக்களுக்கு இழப்பேதும் ஏற்படாது தவிர்க்கும் கொள்கையை அனுசரிப்பதாக வலியுறுத்தினார்


இதன்போது விடுதலைப்புலிகளின் தலைவர் தப்பிச்செல்வதற்கான வாய்ப்புக்கள் உண்டா என இந்திய ஊடகவியலாளர்கள் கேள்வியெழுப்பினர் இதற்கு பதிலளித்த பிரிகேடியர் சவிந்திர சில்வா தரைவழியாக தப்பிச்செல்வதற்கான வாய்ப்புக்களே கிடையாது எனினும் கடல்வழியாக மாத்திரமே அப்படியான வாய்ப்புக்கள் உள்ளன ஆனால் கடல்வழியாகவும் தப்பிச்செல்லாதவாறு பாதுகாப்பை பலப்படுத்துமாறு கடற்படையினர் அறிவுறுத்தப்பட்டுள்ளதாக தெரிவித்தார்

இராணுவத்தினரிடம் சரணடைந்ததாக கூறப்படும் புலிகள் இயக்கத்தைச்சேர்ந்த முன்னாள் ஊடக ஒருங்கிணைப்பாளர் தயா மாஸ்டர் மொழிபெயர்ப்பாளர் ஜோர்ஜ் ஆகியோர் புதுமத்தளான் வைத்தியசாலையில் சிகிச்;சை பெற்றுக்கொண்டிருந்தபோதுதான் அவர்கள் இராணுவத்தினரால் கைதுசெய்யப்பட்டதாக தென்இந்தியச்செய்திகள் கூறுகின்றனவே இது தொடர்பில் உங்கள் பதிலென்ன என வினவியபோது இல்லை இல்லை அவர்கள் கைதுசெய்யப்படவில்லை மாறாக சரணடைந்தார்கள் என பிரிகேடியர் சவிந்திர சில்வா கூறினார்

விடுதலைப்புலிகள் தலைவர் பற்றி தயா மாஸ்டர் என்ன கூறினார் என ஊடகவியலாளர் எழுப்பிய கேள்வியொன்றுக்கு பதிலளித்த பிரிகேடியர் சவிந்திர சில்வா தாம் இறுதிவரை போராடுவதாக விடுதலைப்புலிகளின் தலைவர் விடுதலைப்புலிகள் இயக்கத்தினரிடம் கூறியுள்ளதாகவும் ஆனால் போராளிகளில் அனேகர் அதனை நம்பவில்லை தலைவர் எப்போதேனும் தப்பிச்சென்றுவிடுவார் என்றே அவர்கள் கருதுவதாக தயாமாஸ்டரை மேற்கோள்காண்பித்து பிரிகேடியர் கூறினார்

விடுதலைப்புலிகளின் தலைவர் தப்பிச்செல்வதற்காக நீர்மூழ்கி கப்பலொன்று நிறுத்திவைக்கப்பட்டுள்ளதாக தயாமாஸ்டர் மேலும் தகவல் வழங்கியுள்ளதாகவும் பிரிகேடியர் கூறினார்

இதனையடுத்து புதுக்குடியிருப்பில் விடுதலைப்புலிகளுடன் இடம்பெற்ற மோதல்களின் போது கைப்பற்றப்பட்ட ஆயுதங்களென ஒரு யுத்த தாங்கி சகிதமாக ஆயுதங்கள் ஊடகவியலாளர்களுக்காக காட்சிப்படுத்தப்பட்டன

உயிரிழந்த விடுதலைப்புலிகள் இயக்க முக்கியஸ்தர்களது புகைப்படங்களும் காட்சிப்படுத்தப்பட்டிருந்தன இதனைத்தவிர விடுதலைப்புலிகளின் தலைவர் உள்ளிட்ட முக்கியஸ்தர்களது குடும்ப ஆல்பங்களும் போர்நிறுத்த ஒப்பந்த காலத்தின் போது பிடிக்கப்பட்ட புகைப்பட ஆல்பங்களும் ஆயுதங்களுக்கு முன்பாக விரிக்கப்பப்டிருந்த தரப்பாளில் பரப்பிக்கிடக்க காணமுடிந்தது

அடுத்ததாக ஊடகவியலாளர்கள் கவச வாகனங்களில் ஏற்றப்பட்டு கிளிநொச்சிக்கு வடக்காக அழைத்துச்செல்லப்பட்டனர் அப்போது பாதையின் இருமருங்கிலும் பார்வையைச்செலுத்திய போது சேதமுற்ற கடைத்தொகுதிகளையும் வீடுகளையும் ஆங்காங்கே அமைக்கப்பட்டிருந்த இராணுவ வீதித்தடைகளையும் பாதுகாப்பு அரண்களையும் அவதானிக்க முடிந்தது பரந்தன் சந்திவரை வடக்கு நோக்கி நகர்ந்த கவசவாகனங்கள் பின்னர் கிழக்கு நோக்கி பரந்தன் புதுக்குடியிருப்பு யு 35 பாதையில் திரும்பி பயணத்தை தொடர்ந்தன வாகனங்கள் மிகவேகமான நகர்ந்தால் கடும் புழுதிமண்டல எழுந்தபோதிலும் புழுதியை விலக்கிக்கொண்டு பாதையின் இருமருங்கிலும் பார்வையைச்செலுத்தினேன் கண்ணுக்கெட்டிய தூரம் வரை மக்கள் வாழ்ந்ததற்கான அடையாளங்கள் வெறுமனே எச்சங்களாக காணப்பட்டன கடைகள் வீடுகள் கட்டடங்கள் என கண்ணுற்;ற அனைத்துமே யுத்தத்தால் சின்னாபின்னமாகியுள்ளமை மட்டும் தெளிவாக விளங்கியது

ஏ35பாதையில் பல இடங்களில் 58வது படைப்பிரிவின் உப முகாம்களும் காவலரண்களும் அமைக்கப்பட்டிருந்ததுடன் அங்கொன்றும் இங்கொன்றுமாக மிஞ்சியிருந்த உடைந்த கடைகளின் சுவர்களில் 58வது படைப்பிரிவினரின் பிரசன்னத்தை குறிக்கும் வகையில் அதன் பெயர்கள் தீந்தையால் ப+சப்பட்டிருந்தன அந்தப்பாதையில் தொடர்ந்து பயணித்தபோது தர்மபுரம் விசுவமடு போன்ற வளமிக்க கிராமங்கள் இருந்தமைக்கு சான்றுகள் காணப்படவில்லை புதுக்குடியிருப்பு நகரை அண்மித்தபோது கண்ணுற்ற காட்சி வேதனையை யுத்தத்தின் கோரத்தை பறைசாற்று;வதாக காணப்பட்டது செல்வம்கொழிக்கும் நகரென புகழப்பட்ட புதுக்குடியிருப்பு நகரின் கட்டிடங்கள் கடைகள் யாவுமே பாரிய சேதங்களையும் கோரங்களையும் சந்தித்திருப்பதற்கு அவற்றின் காட்சிகளே சாட்சி அங்குள்ள வீடுகளுக்கு ஏற்பட்டுள்ள சேதங்களைக் கணணுற்றால் ; கனத்த இதயங்களிலும் இரத்தம் கசியச்செய்துவிடும் தற்போது இராணுவத்தினர் பாதையின் இருமருங்கிலும் கணிசமான மீற்றர்கள் நிலப்பரப்பை கனரக இயந்திரங்கள் மூலம் துப்பரவுசெய்துள்ளதாக எம்முடன் வந்திருந்த இராணுவசிப்பாயொருவர் குறிப்பிட்டார் பாதுகாப்பை உறுதிப்படுத்தும் வகையிலேயே இவ்வாறு சுத்திகரிப்பு மேற்கொள்ளப்பட்டதாக அவர் மேலும் சுட்டிக்காட்டினார்


புதுக்குடியிருப்பிலிருந்து புதுமத்தளான் நோக்கி கவச வாகனங்கள் விரைந்தபோது ஒரிடத்தில் பொதுமக்கள் நின்றுகொண்டிருப்பதை அவதானிக்கமுடிந்தது இரணைப்பாலை சந்தியிலேயே எமது இந்த விஜயத்தின் போது முதன்முறையாக பொதுமக்களைக்காணமுடிந்தது உருவங்களைத்தொலைத்தவர்களை கையிலே உடைமைகளும் இன்றி உடுத்த உடையுடன் வந்த மக்களைக்கண்ணுற்ற ஊடகவியலாளர்கள் இனமொழி பாராது நெஞ்சுருகியதை உணரமுடிந்தது காலில் செருப்பேதுமின்றி பட்டப்பகலில் தட்டாந்தரையிலஅங்கு வரிசையில் நின்று கொண்டிருந்த மக்களுக்கு இராணுவத்தினர் பிஸ்கட் பக்கற்றுக்களை வழங்கியதைக்காணமுடிந்தது

கடந்த ஒரிரு தினங்களுக்குள்ளாக பாதுகாப்பு வலயப்பகுதிக்குள்ளிருந்து வெளியே வந்ததாக கூறப்பட்ட மக்களே இவர்கள் எனவும் முதற்கட்டமாக இராணுவத்தினர் இவர்களுக்கு பிஸ்கட் மற்றும் தண்ணீரை வழங்கி பின்னர் அவர்கள் வவுனியாவிலுள்ள நலன்புரி முகாம்கள் என கூறப்படுவனவற்றிற்கு அழைத்துச்செல்லப்படுவதே வழமை என எமது வாகனத்தில் வந்த இராணவமேஜரொருவர் கூறினார்

வரிசையில் நின்றுகொண்டிருந்தவர்களின் 62வயதான கந்தையா நடேஸ்வரி கருத்துவெளியிடுகையில்
தாம் அரச கட்டுப்பாட்டுப்பகுதிக்குள் வருவதற்கு முன்பாக சுமார் ஒருமாத காலம் பதுங்குகுழிகளுக்குள் இருக்க நேர்ந்ததாகவும் அதிலும் குறிப்பாக இருநாட்கள் முழுமையாக பகுங்குகுழிகளை விட்டு நகரமுடியாதவாறு கடும் எறிகணைவீச்சு காணப்பட்டதாகவும் தெரிவித்தார் அங்கு உணவுபொருட்களுக்கு கடும் தட்டுப்பாடு காணப்படுவதாகவும் தேங்காய் சீனி குடிக்கப்பால் ஏதுமின்றி காணப்பட்டதாகவும் இவற்றைவிட தமக்கு ஆதரவில்லாதநிலை காணப்பட்டதாகவும் வழியிலும் தெருவிலும் மக்கள் இறந்துகிடந்ததை தாம் கண்ணுற்றதாக தெரிவித்த அவர் தாங்களே மிகவும் பயந்து பயந்து இப்பகுதிக்குள் வந்ததாக தனது தளதளத்த குரலில் குறிப்பிட்டார்

தனது வயதுமுதிர்ந்த தாயாரைத்தாங்கியவாறு பிஸ்கட்களை பெறுவதற்காக வரிசையில் நின்றிருந்த அ ரஜனி என்பவரிடம் இன்னமும் மக்கள் பாதுகாப்பு வலயத்திற்குள் எவ்வளவு பேர் இருக்ககூடும் என வினவியபோது தயங்கியவாறு இன்னமும் ஒரு ஒருலட்சம் ஐம்பதாயிரம் அறுபதாயிரம் மக்கள் இருக்க கூடும் எனவும் தாம் முந்தநாள் வந்ததாகவும் கூறினார்

புதுமத்தளன் நோக்கிய பயணத்தினை இரணைப்பாலைசந்தியில் இருந்து தொடர்ந்தபோது எமக்கு சில நூறு மீற்றர்கள் தொலைவில் ஒரிரு தென்னைமரங்களே காணப்பட்ட ஒரு வெட்டாந்தரையில் ஆயிரக்கணக்கான மக்கள் குவிந்திருப்பதைக்காணமுடிந்தது அவர்களில் ஒருசில நாம் பயணித்த பாதையோரத்தில் வெறுந்தரையில் அமர்ந்திருப்பதை வெகுவேகமாக விரைந்த கவசவாகனத்தில் இருந்தவாறே அவதானித்தோம் மேலும் சிலர் அங்கேகாணப்பட்ட நீர் தேங்கிநின்ற ஒரு சிறிய பகுதியிலுள்ள நீரில் குளித்துக்கொண்டிருந்ததையும் மேலும் சிலர் ஒரு பிளாஸ்டிக் நீர்த்தாங்கியில் நிரப்பியிருந்த நீரில் உடல்கழுவிக்கொண்டிருந்ததையும் கண்ணுற்றோம் அவர்களில் அனேகரின் உடற்தோற்றம் வாடி வதங்கியிருந்தது சிறுகுழந்தைகள் சிலரின் முகங்களில் புன்னகை மலர்ந்திருந்ததையும் பார்க்கமுடிந்தது


எனினும் ஆயிரக்கணக்கானோர் குவிந்திருந்த இடத்திற்கு அருகே செல்ல எமக்கு அனுமதி வழக்கப்படவில்லை இதுபற்றி வெளிநாட்டு செய்தியாளர் ஒருவர் எம்மோடு வருகைதந்திருந்த இராணுவ அதிகாரியிடம் வினவியபோது அந்த மக்கள் ஒரிருநாட்பகுதிக்குள்ளாக பாதுகாப்பு வலயப்பகுதிக்குள்ளாக இருந்து வந்தவர்கள் எனவும் அவர்கள் இன்னமும் சோதனைசெய்யப்படவில்லைஎனவும் அவர்களிடமுள்ள பொதிகள் யாவும் சோதனையிடப்பட்டபின்னரே அவர்கள் வவுனியாவிற்கு அனுப்பிவைக்கப்படுவர் எனவும் தெரிவித்தார் அந்த மக்கள் கூட்டத்தினரிடையே தற்கொலைக்குண்டுதாரிகளும் இருக்கக்கூடும் எனவும் அவர்களை சந்திப்பது ஊடகவியலாளர்களுக்கு பாதுகாப்பற்றதென தாம் கருதுவதன் காரணமாகவே அருகில் செல்ல அனுமதி வழங்கப்படவில்லை என அந்த இராணுவ அதிகாரி மேலும் கூறினார்

இப்படியாக பெருந்திரளாக குவிந்திருந்த மக்களை தூரத்தே பார்த்தவாறே புதுமத்தளான் நோக்கிய கவசவாகனங்கள் விரைந்தன

விடுதலைப்புலிகளுடனான யுத்தத்தின் இறுதி கட்ட போர் நடைபெறுவதாக கூறப்படுகின்ற பாதுகாப்பு வலயப்பகுதியின் தென்பகுதிக்கு சில நூறுமீற்றர்கள் தொலைவிற்கு ஊடகவியலாளர்கள் அழைத்துச்செல்லப்பட்டனர் நாம் அங்கே இறுதியாக தரித்து நின்ற பகுதிதான் புதுமத்தளான் புதுக்குடியிருப்பு வீதியில் புதுமத்தளான் சந்திக்கு அருகிலுள்ள இடம் என இராணுவத்தினரால் விளக்கமளிக்கப்பட்டது அண்மையில் பாதுகாப்பு வலயப்பகுதியில் இருந்து பல்லாயிரக்கணக்கான மக்கள் இராணுவகட்டுப்பாட்டு பகுதிக்குள் பிரவேசித்த பகுதியே நாம் நின்றுகொண்டிருந்த பகுதி அங்கே ஆயிரக்கணக்கானோர் முண்டியடித்துக்கொண்டு சென்றமையால் விழுந்துகிடந்த உடைகள் கைப்பைககள் மற்றும் ஆவணங்களும் ஆங்காங்கே சிதறிக்கிடந்தன

இராணுவத்தினரின் பல்வேறு படைப்பிரிவைச்சேர்ந்தவர்களும் அவர்களது வாகனங்களும் ஆங்கே நிறுத்திவைக்கப்பட்டிருந்ததை காணமுடிந்தது அந்த இடத்தில் ஊடகவியலாளர் ஒருவர் எம்முடன் வருகைதந்திருந்த 58வது படைப்பிரிவின் கட்டளைத்தளபதியிடம் விடுதலைப்புலிகள் கரும்புலிகள் படையணியை இன்னமும் கொண்டிருக்கின்றார்களா என வினவியபோது இன்னும் சிலநாட்களின் பின்னர் இங்கு ஒருபுலியும் இருக்க முடியாது இந்தியாவில் இருந்துதான் புலியைக்கொண்டுவரவேண்டும் எனக்கூறினார்

எம்மோடு வருகைதந்திருந்த இராணுவப்பேச்சாளர் பிரிகேடியர் உதய நாணயக்காரவிடம் இன்னமும் புலிகள் நிலைகொண்டுள்ள பகுதியின் பரப்பளவு குறித்து வினவியபோது விடுதலைப்புலிகள் தற்போதுள்ள பகுதி 8கிலோமீற்றர்கள் கடற்கரையைக்கொண்ட பகுதியெனவும் இதில் சிலபகுதிகள் இரண்டுகிலோமீற்றர் அகலத்தையும் சில பகுதிகள் ஒருகிலோமீற்றர்அகலத்தையும் கொண்டுள்ளதாக குறிப்பிட்டார்

புதுமத்தளானில் நாம் நின்று கொண்ட இடத்தில் இருந்து பார்த்தபோது ஓரிடத்தில் கரும்புகை எழுந்தவண்ணமிருந்தது அங்கே மோதல்கள் நடப்பதாக இராணுவத்தினர் தெரிவித்தனர் தாம் கனரக ஆயுதங்களை தற்போது பாவிப்பதில்லை என தெரிவித்த இராணுவத்தினர் விடுதலைப்புலிகள் வசம் இன்னமும் 122மில்லிமீற்றர் 120 மீல்லிமீற்றர் எறிகணைகள் காணப்படுவதாகவும் அவர்களின் தாக்குதல்களாலேயே படையினருக்கு சேதங்கள் ஏற்படுவதாகவும் குறிப்பிட்டனர் நாம் அங்கு சுமார் ஒரு மணிநேரம் நிலைகொண்டிருந்தபோது மெல்ல மெல்ல வெடிப்புச்சத்தங்களைக்கேட்க முடிந்தது நேரம் ஆக ஆக அந்த சத்தங்கள் பெரிதாக ஒலித்து அதிர்வுகளை ஏற்படுத்தவே அங்கிருந்து ஊடகவியலாளர்கள் மீண்டும் திரும்பிச்சென்றோம்



தற்போது இடம்பெறும் யுத்தத்தில் இராணுவத்தினரின் கைமேலோங்கியிருப்பதற்கு சான்று பகரும் வகையிலேயே இராணுவத்தினர் விடுதலைப்புலிகளுடனான இறுதிக்கட்ட மோதல்கள் இடம்பெறுவதாக கூறப்படும் பாதுகாப்பு வலயத்தின் தென்பகுதியில் இருந்து கண்ணுக்கு எட்டிய தூரம் வரையில் ஊடகவியலாளர்களை அழைத்துச்சென்றமையை நோக்கமுடியும் என எம்மோடு வருகைதந்திருந்த வெளிநாட்டு ஊடகவியலாளர்கள் சிலர் கருத்துக்களை வெளியிட்டிருந்தனர்

30வருடத்திற்கும் அதிகமான வரலாற்றைக்கொண்ட விடுதலைப்புலிகளை முற்றாக அழித்துவிடுவதற்கு இன்னமும் சில தினங்களே உள்ளதென இராணுவத்தினரும் அரச தரப்பினரும் பெருமளவான இலங்கைமக்களும் கருத்துக்களை கொண்டிருப்பது உண்மைதான் ஆனால் கடந்த காலங்களிலும் இவ்வாறு யுத்தம் முடிவிற்கு வந்துவிடும் என பல்வேறு கட்டியங்களும் காலக்கெடுக்களும் கருத்துக்களும் கூறப்பட்டிருந்தும் அது நிறைவேறாமற்போன வரலாறுகளுக்கு முன்பாக தற்போதைய கருத்துக்களுக்கும் காலக்கெடுக்களுக்கும் காலம்தான் பதில் சொல்லவேண்டும் .