பும்ராவை போல்ட் ஆக்கிய தமிழ் பொண்ணு!

 

இந்திய கிரிக்கட் அணியின் நட்சத்திர வேகப்பந்துவீச்சாளராக திகழ்பவர் ஜஸ்பிரிட் பும்ரா. துல்லியமான தனது பந்துவீச்சால் எதிரணி துடுப்பாட்டவீரர்களுக்கு சிம்மசொப்னமாக திகழ்பவர் பும்ரா. அவர் கிரிக்கட் வாழ்வில் கைப்பற்றிய அனேக விக்கட்கள் அவரது யோக்கர் பந்துமூலமாகவே வீழ்ந்தன. இதில் விக்கட்டில் நேரில் பட்டு போல்ட் முறையில் ஆட்டமிழந்தவர்கள் பலர் . 27வயதுடைய பும்ராவிற்கு இந்தியாவில் கோடிக்கணக்கான ரசிகர்கள் உள்ளனர். ஆனால் பும்ரா ரசிகராக இருந்ததோ சஞ்சனா கணேசன் என்ற தொலைக்காட்சி அறிவிப்பாளருக்கு என்றால் வியப்பாகவுள்ளதா?

ஸ்டார் டீவியின் பிரபல அறிவிப்பாளரான சஞ்சனா கணேசன் முன்னர் பல தொலைக்காட்சிகளில் முக்கியமான நிகழ்ச்சிகளைத் தொகுத்துவழங்கியுள்ளார்.1991ம் ஆண்டு மே மாதம் 6ம் திகதி பிறந்த சஞ்சனா கணேசன் மகாராஸ்டிரா மாநிலத்தின் புனே நகரைச் சேர்ந்தவர் .இவரது தந்தை கணேசன் ராமசாமி எழுத்தாளராகவும் முகாமைத்துவ குருவாகவும் திகழ்வதுடன் தாயார் சுஷ்மா கணேசன் சட்டத்தரணியாகவும் உடற்திடநிலை பயிற்றுவிப்பாளராகவும் திகழ்கின்றமை குறிப்பிடத்தக்கது.

 

தனது டுவிட்டர் தளத்தில் தான் ஒரு தமிழ் பொண்ணு என்பதை அவர் பெருமையாக பதிவிட்டுள்ளமை குறிப்பிடத்தக்கது.

இந்திய கிரிக்கட் அணியின் நட்சத்திர வேகப்பந்துவீச்சாளர் ஜஸ்பிரிட் பும்ரா ,ஸ்டார் டிவியின் அறிவிப்பாளர் சஞ்சனா கணேசன் திருமணம் இன்று கோவாவில் நடைபெற்றது.

13வது திருத்தம் முழுமையாக நடைமுறைப்படுத்தப்படவேண்டும் : கருணா ,பிள்ளையானிடம் வலியுறுத்தியது இந்தியா

 

இலங்கைக்கான இந்தியாவின் துணைத்தூதுவர் வினோத் கே. ஜேக்கப் கிழக்கு மாகாணத்தைச் சேர்ந்த பிள்ளையான் என அறியப்படும் சிவனேசத்துரை சந்திரகாந்தன் மற்றும் கருணா என அறியப்படும் விநாயகமூர்த்தி முரளிதரன் ஆகியோர் தலைமையிலான தூதுக்குழுக்களை நேற்று செவ்வாய்க்கிழமை தனித்தனியாகச் சந்தித்துக் கலந்துரையாடியுள்ளதாக நம்பகரமான வட்டாரங்களில் இருந்து அறியமுடிகின்றது. 

13வது திருத்தத்தை முழுமையாக நடைமுறைப்படுத்துவதன் மூலமாக அர்த்தமுள்ள அதிகாரப்பகிர்வை ஏற்படுத்துவதன் ஊடாகவே தமிழ் மக்களின் அபிலாஷைகளைப் பூர்த்திசெய்யமுடியும் என்ற இந்தியாவின் நீண்டகால நிலைப்பாட்டை மீள வலியுறுத்தியதாக அறியமுடிகின்றது. 

1987ம் ஆண்டு கைச்சத்திடப்பட்ட இலங்கை இந்திய உடன்படிக்கையின் விளைவாகவே பிராந்தியங்களுக்கு அதிகாரத்தை பகிர்ந்தளிக்கும் வகையிலான மாகாண சபை முறைமை ஏற்படுத்தப்பட்டமை குறிப்பிடத்தக்கது. 

13வது திருத்தத்தின் முழுமையான நடைமுறைப்படுத்தல் என்ற விடயத்தோடு இலங்கையுடனான நீண்டகால அபிவிருத்தி பங்காளராக செயற்பாடும் உறுதிப்பாட்டையும் இந்தச்சந்திப்புக்களின் போது இந்திய துணைத்தூதுவர் வெளிப்படுத்தியுள்ளார். 

இதன் போது போரினால் கைம்பெண் ஆனவர்கள் மற்றும் விசேட தேவை உடையவர்களுக்கான வாழ்வாதார உதவிகளை ஏற்படுத்தித்தரும் விடயத்தில் எதிர்காலத்தில் அபிவிருத்தி ஒத்துழைப்புக்களை முன்னெடுக்கமுடியும் என  கருணா அம்மான் குறிப்பிட்டதுடன் புலமைப்பரிசில்கள் அடங்கலாக கல்வித்துறையிலும் இணைந்து செயற்படமுடியும் என சுட்டிக்காட்டினார்.  

கொரோனாவிற்கு எதிரான உலகின் மிகப்பெரிய தடுப்பூசித் திட்டம் இந்தியாவில் ஆரம்பம்

 

கொரோனா வைரஸிற்கு எதிரான உலகின் மிகப் பெரிய தடுப்பூசித் திட்டமான இந்தியாவின் கொவிட்-19 தடுப்பூசி திட்டத்தை பிரதமர் நரேந்திர மோதி இன்று (ஜனவரி 16, சனிக்கிழமை) காணொளி காட்சி மூலம் தொடங்கி வைத்தார்.

'எப்போது கொரோனா தடுப்பூசி வரும் என எல்லோரும் கேட்டுக் கொண்டிருந்தார்கள். இப்போது கொரோனா தடுப்பூசி வந்துவிட்டது. இந்த நேரத்தில் இந்திய மக்கள் அனைவரையும் வாழ்த்துகிறேன்' என கொரோனா தடுப்பூசி செலுத்தும் திட்டத்தைத் தொடங்கி வைத்துப் பேசினார் பிரதமர் நரேந்திர மோதி.

'பொதுவாக தடுப்பு மருந்துகளைக் கண்டுபிடிக்க பல ஆண்டுகள் ஆகும். ஆனால் இந்தியா இரு கொரோனாவுக்கான தடுப்பு மருந்தை மிக குறுகிய காலகட்டத்தில் தயாரித்திருக்கிறது. மேலும்இ சில கொரோனா தடுப்பு மருந்துகளும் பரிசோதனையில் இருக்கின்றன. இரு டோஸ் கொரோனா தடுப்பு மருந்து அவசியம். இரு டோஸ்களுக்கிடையில் ஒரு மாத கால இடைவெளி அவசியம் என்கிறார்கள் நிபுணர்கள்.'

'முதல் டோஸ் கொரோனா தடுப்பு மருந்தைப் பெற்றுக் கொண்ட உடன்,யாரும் முகக்கவசத்தை பயன்படுத்தாமல் இருக்கும் தவறையோ அல்லது சமூக இடைவெளியை பின்பற்றாமல் இருக்கும் தவறையோ செய்ய வேண்டாம் என மக்களைக் கேட்டுக் கொள்கிறேன். காரணம் இரண்டாவது டோஸ் மருந்து செலுத்திக் கொண்ட பிறகு தான் போதுமான நோய் எதிர்ப்புத் திறன் உடலில் மேம்படும்' என்றார் பிரதமர் மோதி.

இந்தியா தன் முதற்கட்ட தடுப்பூசி வழங்கும் திட்டத்திலேயே 3 கோடி மக்களுக்கு கொரோனா தடுப்பூசியை செலுத்தவிருக்கிறது. இரண்டாவது கட்டமாக 30 கோடி பேருக்கு தடுப்பூசி வழங்கப்படும் என்று அவர் மேலும் கூறினார்.

கொரோனா வைரஸ் பெருந்தொற்றால் இந்தியாவின் சுகாதார மற்றும் முன்கள பணியாளர்கள் சந்தித்த சவால்கள் குறித்து பேசிய பிரதமர் நரேந்திர மோதி அப்போது உணர்ச்சிவசப்பட்டதாக ஏ.என்.ஐ முகமை செய்தி வெளியிட்டுள்ளது.

கொரோனாவிலிருந்து இந்தியாவின் 130 கோடிக்கும் மேற்பட்ட மக்களை காப்பதுதான் இந்த திட்டத்தின் நோக்கம்.

கோவிஷீல்ட் மற்றும் கோவேக்சின் என இரண்டு கொரோனா தடுப்பூசிகளின் லட்சக்கணக்கான டோஸ் மருந்துகள் ஏற்கனவே இந்தியாவின் பல இடங்களுக்கும் அனுப்பப்பட்டிருக்கிறது.

முதலில் இந்தியாவில் இருக்கும் சுகாதாரப் பணியாளர்கள் முன்களப் பணியாளர்கள் மற்றும் நோய்த்தொற்றால் எளிதில் பாதிக்கக் கூடிய வாய்ப்புள்ளவர்களுக்கு தடுப்பூசி வழங்கப்படும்.

உலகிலேயே அமெரிக்காவுக்குப் பிறகு இந்தியாவில்தான் அதிக அளவில் கொரோனாவால் பாதிக்கப்பட்டிருக்கிறார்கள்.

இந்த திட்டத்தின்படிஇ இந்தியாவில் இருக்கும் ஒரு கோடி சுகாதாரப் பணியாளர்களுக்கு முதல் கட்டமாக தடுப்பூசி வழங்கப்படும். அவர்களைத் தொடர்ந்து காவல் துறையினர் ராணுவ வீரர்கள் நகராட்சிப் பணியாளர்கள் போன்ற முன்களப் பணியாளர்களுக்கு வழங்கப்படும்.

'நீங்கள் எதையாவது விரும்பும்போது அதை அடைய உங்களுக்கு உதவ பிரபஞ்சம் அனைத்தும் சதி செய்கின்றன.'

 

நீங்கள் எதையாவது விரும்பும்போது  அதை அடைய உங்களுக்கு உதவ பிரபஞ்சம் அனைத்தும் சதி செய்கின்றன

 

 என்பது அல் கெமிஸ்ட் உட்பட உலகப்புகழ் பெற்ற நாவலை எழுதிய  பிரேசிலிய எழுத்தாளர் பாவுலோ கொகெலோவின் பிரபல்யமான கூற்று . இது நம்ம நடராஜன் வாழ்வில் எத்தகைய உண்மையானது என்பது கடந்த சில மாதங்களாக நடக்கும் நிகழ்வுகளைப் பார்க்கும் போது வெள்ளிடைமலையாகும். 

136 கோடி இந்தியர்கள் இருக்கும் இந்த நாட்டில் இந்திய கிரிக்கெட் அணியில் இடம் பெறுவதே பலருக்கும் பெரிய கனவாக உள்ளது.

1931ம் ஆண்டு முதல் டெஸ்ற் கிரிக்கட் தொடக்கம் சர்வதேசப் போட்டிகளில் விளையாடிவரும் இந்திய கிரிக்கெட் வரலாற்றில் இப்படி ஒரு சம்பவம் நடந்ததே இல்லை.

சர்வதேச நாடுகளுக்கான இந்திய கிரிக்கட் சுற்றுப்பயணமொன்றில் டிடுவன்டி  ஒருநாள் போட்டி டெஸ்ற் போட்டி என அனைத்து கிரிக்கட் வகையாறாக்களிலும் ஒரே தொடரிலேயே அறிமுகமான இந்திய வீரர் என்ற பெருமைமிகு சாதனைக்கு சொந்தக்காரராகியிருக்கின்றார் டி. நடராஜன் என அறியப்படும் தங்கராசு நடராஜன்.

வெறுமனே அறிமுகமானது மட்டுமன்றி தனது முதலாவது போட்டியிலேயே விக்கட்டுக்களையும் வீழ்த்தி அனைவரையும் திரும்பிப்பார்க்கவைத்துள்ளார் நம்ம நடராஜன். 

தமிழ் நாட்டின் சேலம் மாவட்டத்தின் சின்னப்பம் பட்டி என்ற குக்கிராமத்தைச் சேர்ந்த நடராஜன் ஐந்தாம் ஆண்டுமுதல்  வீதியில் டென்னிஸ் போட்டிகளில் விளையாடிவந்தபோதும் அவரது 20வது வயதிலேயே   லெதர் போலில் விளையாடத்தொடங்கியிருக்கின்றார். தமிழ் நாட்டின் 4த் டிவிஸன் போட்டிகளில் விளையாடத்தொடங்கிய அவர் 2015ம் ஆண்டு முதல் தமிழ் நாடு அணியில் விளையாடிவருகின்றார். தொடர்ந்து தமிழ் நாடு பிரீமியர் லீக் போட்டிகளில் யோக்கர்களால் கலக்கிய நடராஜன் 2017ம் ஆண்டில் கிங்ஸ் எக்ஸ்  அணிக்காக ஐபிஎல் ஏலத்தில் வாங்கப்பட்டபோதும் காயங்காரணமாக ஆற்றலை வெளிப்படுத்த முடியவில்லை. பின்னர் 2018ம் ஆண்டில்  சன்ரைஸர் ஹைதரபாத் அணியில் உள்வாங்கப்பட்டார். 

அனுபவம் வாய்ந்த இந்திய மற்றும் வெளிநாட்டு பந்துவீச்சாளர்களால் நிறைந்திருந்த சன் ரைஸர்ஸ் அணியில் ஆரம்பத்தில் அவருக்க இடம்கிடைக்கவில்லை. காயங்காரணமாக பந்துவீச்சாளர்கள் காயமுற்றதால் கடந்த 2020ம் ஆண்டில் ஐபிஎல் போட்டிகளில் ஆரம்பமுதலே அசத்தினார் நடராஜன். அவரது யோக்கர் பந்துகளுக்கு இரையானவர்களில் ஏபிடிவிலியஸர்ஸும் அடக்கம் 

அனுபவம் வாய்ந்த இந்திய மற்றும் வெளிநாட்டு பந்துவீச்சாளர்களால் நிறைந்திருந்த சன் ரைஸர்ஸ் அணியில் ஆரம்பத்தில் அவருக்க இடம்கிடைக்கவில்லை. காயங்காரணமாக பந்துவீச்சாளர்கள் காயமுற்றதால் கடந்த 2020ம் ஆண்டில் ஐபிஎல் போட்டிகளில் ஆரம்பமுதலே அசத்தினார் நடராஜன். அவரது யோக்கர் பந்துகளுக்கு இரையானவர்களில் ஏபிடிவிலியஸர்ஸும் அடக்கம் 

ஐபிஎல் போட்டிகளில் காண்பித்த அசாத்திய ஆற்றல் வெளிப்பாடு கடந்த ஒக்டோபர் மாதத்தில் அவுஸ்திரேலியாவிற்கு விஜயம் மேற்கொண்ட இந்திய அணியுடன் பயணிக்கும் சந்தர்ப்பத்தை நடராஜனுக்கு வழங்கியது. ஆனால் அணி வீரர்களின் வலைப்பயிற்சியின் போது அவர்களுக்கு பந்துவீசும் நான்கு பேரில் ஒருவர் என்ற சந்தர்ப்பமே கிடைத்தது. 

எந்த வாய்ப்புக் கிடைத்தாலும் அதுவேதனது கடைசிவாய்ப்பு என்று இருக்கும் திறமையை குறிப்பாக அச்சொட்டாக யோக்கர் வீசும்  ஆற்றலை காண்பித்த நடராஜனுக்காக வழிகள் திறந்தன. வாய்ப்புக்கள் குவிந்தன. முதலில் டிடுவின்றி அணியில் இடம்பிடித்திருந்த  சக தமிழக வீரர் வருண் சக்கரவர்த்தி காயமுற்றநிலையில்  வருண் சக்கரவர்த்திக்கு பதில் டி20 அணியில் சேர்க்கப்பட்டார். அப்போதும் அவர் போட்டிகளில் ஆடுவது உறுதியாகவில்லை. இதற்கிடையே ஒருநாள் போட்டி அணியில் சேர்க்கப்பட்டார்.  

ஒருநாள் அணி டி20 அணி என வரிசையாக இரண்டு வித போட்டிகளில் அறிமுகம் ஆனார். அடுத்ததாக டெஸ்ட் தொடருக்கான அணியில் கூடுதல் வீரராக சேர்க்கப்பட்டு உத்தேச வீரர்கள் பட்டியலில் இணைந்தார். அடுத்ததாக பல வேகப் பந்துவீச்சாளர்கள் இந்திய அணியில் காயமடைந்த நிலையில் நான்காவது டெஸ்ட் போட்டியில் அவர் இன்று அறிமுகம் ஆனார்.ஒரே சுற்றுப்பயணத்தில் மூன்று வித கிரிக்கெட் அணிகளிலும் அறிமுகம் ஆன முதல் இந்திய வீரர் நடராஜன் தான். அந்த அரிய சாதனையை அவர் செய்துள்ளார். அது மட்டுமின்றி தான் அறிமுகம் ஆன போட்டிகளில் எல்லாம் குறைந்தது 2 விக்கெட்கள் வீழ்த்தி அசத்தி இருந்தார்.

நீங்கள் இருக்கின்ற சூழ்நிலை எவ்வளவு கடினமாக இருந்தாலும் விடாமுயற்சியும் கடின உழைப்பும்  இருந்து விட்டால் சவால்களையும் தடங்கல்களையும்  தாண்டி உங்களை வெற்றிபெறவைக்க பிரபஞ்சமும் பல்வேறு வழிகளில் கைகொடுக்கும் என்பதற்கு நடராஜனின் வாழ்க்கை நம் கண்முன்னே உள்ள மிகச்சிறந்த உதாரணம் என்றால் மிகையல்ல. அவரது வெற்றிக்கு வாழ்த்துக்கள் ,

முதியவர்களால் ஆதிக்கம் செலுத்தப்படும் அரசியலில் மேயர் பதவியில் அமரும் 21வயது மாணவி

 

அரசியல் என்றாலே தெற்காசியப்பிராந்தியத்தில் வயது முதிர்ந்தவர்களால் ஆதிக்கம் செலுத்தப்படும் வேளையில் இந்தியாவின் கேரளமாநிலத்தில் நம்பிக்கை அளிக்கும் முன்னுதாரணம் இடம்பெற்றுள்ளது. 

 கேரளா மாநிலத்தில் நடைபெற்ற உள்ளாட்சி தேர்தலில் முடவன்முகல் தொகுதி உறுப்பினராக ஆக தேர்வான ஆர்யா ராஜேந்திரன் என்ற 21 வயது மாணவியை மேயர் பதவிக்கு மார்க்சிஸ்ட் கம்யூனிஸ்ட் கட்சி தேர்வு செய்திருக்கிறது.

திருவனந்தபுரம் நகரில் உள்ள ஆல் செயின்ட்ஸ் கல்லூரியில் பி.எஸ்.சி. கணிதவியல் துறையில் இரண்டாம் ஆண்டு படித்து வருகிறார் ஆர்யா ராஜேந்திரன். இவர், இந்திய மாணவர் சங்கத்தின் மாநில குழு உறுப்பினராக இருக்கிறார்.

இந்நிலையில் கேரளாவின் திருவனந்தபுரத்தில் நடைபெற்ற உள்ளாட்சி தேர்தலில் 100 இடங்களில் 51 இடங்களில் மார்க்சிஸ்ட் கம்யூனிஸ்ட் கட்சி வெற்றி பெற்றது.

அங்கு 35 இடங்களுடன் எதிர்கட்சி வரிசையில் பாரதிய ஜனதா கட்சி உள்ளது. காங்கிரஸ் மற்றும் ஐக்கிய ஜனநாயக முன்னணி 10 இடங்களுடன் மூன்றாமிடத்தில் உள்ளன. மாநகராட்சியில் நான்கு சுயேச்சை  உறுப்பினர்கள் உள்ளனர்.

ஐந்தாவது தடவையாகவும் ஐபிஎல் சம்பியனானது மும்பை இந்தியன்ஸ்

டுபாயில் டெல்லி கப்பில்ஸ் அணிக்கெதிராக  நடைபெற்ற ஐபிஎல் இறுதிப்போட்டியில் 5 விக்கட்டுக்களால் வெற்றிபெற்று மும்பை இந்தியன்ஸ் அணி ஐபிஎல் சம்பியன் பட்டத்தை தக்கவைத்துக்கொண்டது  . 

 ஐபிஎல் வரலாற்றில் ஐந்துமுறை சம்பியன் பட்டம் வென்ற அணி  என்ற பெருமையையும் பெருமையையும் மும்பை இந்தியன்ஸ் தனதாக்கிக்கொண்டது. 

இன்றைய போட்டியில் நாணயச் சுழற்சியில் வெற்றிபெற்றதையடுத்து முதலில் துடுப்பெடுத்தாடிய டெல்லி கப்பிடல்ஸ் ஒரு கட்டத்தில்  22 ஓட்டங்களுக்கு மூன்று விக்கட்டுக்களை இழந்து தடுமாறியது. இருப்பினும் ரிஷப் பாண்ட் மற்றும் அணித்தலைவர் ஷ்ரயாஸ் ஐயர் ஆகியோரின் சிறப்பான நான்காவது விக்கட்டுக்கான இணைப்பாட்டம் காரணமாக 20 ஓவர்கள் முடிவில் கௌரவமான 156 ஓட்டங்களைப் பெற்றது. பதிலளித்தாடிய மும்பை இந்தியன்ஸ் அணி எந்தவிதமான சிரமமும் இன்றி 5விக்கட்டுக்களை மாத்திரமே இழந்து 9 பந்துகள் மீதமிருந்தநிலையில் வெற்றி இலக்கை அடைந்தது.

இறுதிப் போட்டியில் சிறப்பாகத் துடுப்பெடுத்தாடி 68 ஓட்டங்களைப் பெற்று மும்பை இந்தியன்ஸ் அணியின் வெற்றிக்கு வழிகோலிய அணித்தலைவர் ரோஹித் சர்மா, ஐபிஎல் வரலாற்றில் வென்ற 6வது சம்பியன் பட்டம் இதுவாகும். 2009ம் ஆண்டு டெக்கான் சார்ஜஸ் அணிக்காக விளையாடியபோது வீரராக வெற்றிபெற்ற சர்மா, அதனைத்தொடர்ந்து மும்பை இந்தியன்ஸ் அணியில் இணைந்துகொண்டபின்னர் 2013, 2015, 2017, 2019 மற்றும் இம்முறை 2020லும் சம்பியன் பட்டம் வென்று அரிய சாதனையை நிகழ்த்தியுள்ளமை குறிப்பிடத்தக்கது. 

எஸ்.பி.பாலசுப்ரமணியம் உயிரிழப்புக்கு சீனாவே காரணம்; சர்வதேச நீதிமன்றத்தில் மனுத் தாக்கல்

 

16 மொழிகளில் 45,000 ற்கும் மேற்பட்ட பாடல்களைப் பாடிய பிரபல பின்னணி பாடகர் எஸ்.பி. பாலசுப்ரமணியம் அவர்களின் மறைவு இசை ஆர்வலர்களுக்கு ஈடுசெய்யமுடியாத பேரிழப்பு என்பதில ஐயமில்லை. இந்நிலையில் எஸ்.பி.பி உயிரிழந்தமைக்கு சீனாதான் காரணமென சர்வதேச நீதிமன்றத்தில் மனுவொன்று தாக்கல் செய்யப்பட்டுள்ளதாக தகவல் வெளியாகியுள்ளது.

ஆந்திர மாநிலம் விஜயவாடாவை சேர்ந்த உயர் நீதிமன்ற வழக்கறிஞரான சீனிவாச ராவ்இ  மறைந்த பாடகர் எஸ்.பி.பாலசுப்பிரமணியத்தின் தீவிர ரசிகர் ஆவார்.

இந்நிலையில் சீனிவாச ராவ் சர்வதேச நீதிமன்றத்தில் மனுவொன்றை தாக்கல் செய்துள்ளார். அதில் அவர் கூறியுள்ளதாவது, 'கடந்த 8 மாதங்களாக கொரோனா வைரஸ் தொற்றால் இந்தியாவின் பொருளாதாரம் சீர் குலைந்து விட்டது.

கொரோனா வைரஸை உருவாக்கி, பல நாடுகளுக்கு பரவச் செய்தது சீனாதான் என பல நாடுகள் குற்றம் சாட்டி வருகின்றன. ஆனால்இ இதுகுறித்து சீனா இதுவரை எந்த பதிலையும்  வழங்கவில்லை.

ஏற்கெனவே அமெரிக்கா, இந்தியா ஆகிய நாடுகளை பொருளாதார ரீதியாக வலுவிழக்கச் செய்ய வேண்டுமெனும் எண்ணம் சீனாவிற்கு உள்ளது.

ஆகையால்தான் கண்ணுக்கு புலப்படாத நுண் உயிர் கொல்லியை உலகம் முழுவதும் சீனா பரவச் செய்துள்ளது. இதனால்தான் பிரபல பாடகர் எஸ்.பி. பாலசுப்ரமணியம் உள்ளிட்ட முக்கிய பிரமுகர்கள் மற்றும் அப்பாவி மக்கள் உயிரிழந்துள்ளனர்.

எனவே சீனா மீது குற்றவியல் நடவடிக்கை மேற்கொள்ள வேண்டும்' என அவர் குறிப்பிட்டுள்ளார்.

1946ம் ஆண்டு ஜுன் மாதம் 4ம் திகதி பிறந்த எஸ்.பி .பி கடந்த செப்டம்பர் மாதம் 25ம்திகதி உயிரிழந்திருந்தமை குறிப்பிடத்தக்கது. 

எஸ்.பி.பி.யின் மறைவை அடுத்து அவரது நினைவுகளையும் பெருமையையும் தனித்துவத்தையும் மீட்டுப்பார்க்கும் வகையில் இலங்கைக்கான இந்துப்பத்திரிகையின் செய்தியாளர் மீரா ஸ்ரீனிவாசனுடன் நடத்திய நேர்காணல் இதோ...

மோடி அரசாங்கத்தின் அச்சுறுத்தல்களையடுத்து இந்தியாவில் செயற்பாடுகளை முடிவுறுத்துவதாக சர்வதேச மன்னிப்புச்சபை அதிர்ச்சி அறிவிப்பு

 

இந்தியாவில் மனித உரிமைகளை உறுதிப்படுத்தும் செயற்பாட்டில் ஈடுபட்டுவந்த  சர்வதேச மன்னிப்புச்சபையின் இந்திய கிளையானது அதன் செயற்பாடுகளை இடைநிறுத்துவதாக அறிவித்துள்ளது. இந்திய அரசாங்கம் தொடர்ச்சியாக அதன் செயற்பாடுகளுக்கு தடைகளை ஏற்படுத்தி அச்சுறுத்தல்களை விடுத்துவந்த நிலையிலும் வங்கிக்கணக்குகளை  முற்றிலுமாக முடக்கியுள்ள நிலையிலும் இந்த தீர்மானத்தை எடுக்க நேர்ந்ததாக சர்வதேச மன்னிப்புச்சபை அறிவித்துள்ளது. 

பாடும் நிலாவிற்கு பாரத ரத்னா ? தகுதிகள் என்ன?

 

பாடும் நிலா என ரசிகர்களால் பேரன்போடு அழைக்கப்படும் மறைந்த பின்னணி பாடகர் எஸ்.பி. பாலசுப்ரமணியத்துக்கு பாரத ரத்னா விருது வழங்கப்பட வேண்டும் என்று ஆந்திர பிரதேச முதலமைச்சர் ஜெகன் மோகன் ரெட்டி வலியுறுத்தியுள்ளார்.

இது தொடர்பாக பிரதமர் நரேந்திர மோதிக்கு ஆந்திர முதல்வர் ஜெகன் மோகன் ரெட்டி திங்கட்கிழமை அனுப்பியுள்ள கடிதத்தில், 'எஸ்.பி. பாசுப்ரமணியம் எங்களுடைய மாவட்டமான நெல்லூரில் பிறந்ததில் எங்களுடைய மாநிலம் அதிர்ஷ்டம் அடைகிறது. அவரது அகால மரணம், உலகளாவிய அவரது ரசிகர்களை கவலையில் ஆழ்த்தியிருக்கிறது. 50 ஆண்டுகளுக்கும் மேலான திரை இசை பாரம்பரியத்தில் எஸ்.பி.பி ஆழமான தாக்கத்தை ஏற்படுத்திச் சென்றிருக்கிறார்' என்று கூறியுள்ளார்.

தனது தாய்மொழியான தெலுங்கு, தமிழ், கன்னடம், மலையாளம்,ஹிந்தி உட்பட பல மொழிகளில் 40 ஆயிரத்துக்கும் அதிகமான பாடல்களை எஸ்.பி.பி பாடியிருக்கிறார். சிறந்த பின்னணி பாடகருக்கான தேசிய திரைப்பட விருதுகளை ஆறு முறை அவர் பெற்றிருக்கிறார். ஆந்திர பிரதேசத்தின் மாநில நந்தி விருதுகளை ஆறு முறையும், தமிழ்நாடு, கர்நாடகா ஆகிய மாநிங்களில் எண்ணற்ற விருதுகளையும் அவர் அம்மாநில அரசுகளிடம் இருந்து பெற்றிருக்கிறார். இது தவிர ஃபிலிம்ஃபேர் விருது, தென் மாநிலத்தின் சிறந்த பாடகருக்கான ஃபிலிம்ஃபேர் விருது ஆகியவற்றை பெற்றுள்ள எஸ்.பி.பி, 2016இல் சிறந்த திரைப்பிரபலங்களுக்கு வழங்கப்படும் வெள்ளி மயில் பதக்கத்தையும் பெற்றிருக்கிறார். 2001ஆம் ஆண்டில் அவர் பத்ம ஸ்ரீ விருதும், 2011ஆம் ஆண்டில் பத்ம பூஷண் விருதும் எஸ்.பி.பாலசுப்ரமணியத்துக்கு வழங்கி கெளரவிக்கப்பட்டுள்ளன என்று தனது கடிதத்தில் ஜெகன் மோகன் ரெட்டி கூறியுள்ளார்.

இந்திய இசை உலகில் இதற்கு முன்பு லதா மங்கேஷ்கர், புபேன் ஹசாரிகா, எம்.எஸ். சுப்புலட்சுமி, பிஸ்மில்லா கான், பீம்சென் ஜோஷி ஆகியோருக்கு ஏற்கெனவே பாரத ரத்னா விருதை இந்திய அரசு வழங்கியுருப்பதை சுட்டிக்காட்டிய அவர்இ இசை மற்றும் கலை உலகில் எஸ்.பி.பி ஆற்றிய தன்னிகரற்ற பங்களிப்பை கெளரவிக்கும் வகையில் அவருக்கு பாரத ரத்னா விருது வழங்க வேண்டும் என்றும் ஐந்து தசாப்தத்துக்கும் மேலாக அவர் வழங்கிய பங்களிப்பை அங்கீகரித்து நமது நினைவில் அவர் என்னும் நிலைத்திருக்க இந்த உயரிய அங்கீகாரம் அவருக்கு வழங்கப்பட வேண்டும் என்று ஆந்திர முதல்வர் ஜெகன் மோகன் ரெட்டி கடிதத்தில் வலியுறுத்தியுள்ளார்.

யாருக்கு பாரத ரத்னா விருது வழங்கப்படும்?

இந்தியாவில் சிறந்த குடிமக்களுக்கு அரசு அங்கீகாரம் தரும் வகையில், மூன்று பிரிவுகளில் பத்மஸ்ரீஇ பத்ம பூஷண், பத்ம விபூஷண் ஆகிய பத்ம விருதுகள் வழங்கி கெளரவிக்கப்படுகிறது.

இது மட்டுமின்றிஇ இனம், தொழில், பதவி, பாலினம் உள்ளிட்ட வேற்றுமையை பார்க்காமல், சமூகத்துக்கு வழங்கி வரும் சிறப்பான சேவையை வழங்குவோருக்கு பாரத ரத்னா என்ற உயரிய விருது வழங்கப்படுகிறது.

1954இல் இதற்கான விதிகள் முதல் முறையாக வகுக்கப்பட்டபோது, கலை, இலக்கியம், அறிவியல், பொது சேவைகள் ஆகியவற்றில் இருப்பவர்களுக்கு பாரத ரத்னா விருது வழங்கப்படலாம் என்று தெரிவிக்கப்பட்டது.

மேலும் இந்த விருதுக்கு தகுதி வாய்ந்தவர் கிடைக்காவிட்டால் அதை ஒவ்வொரு ஆண்டும் வழங்குவது கட்டாயமில்லை என்றும் அதே விதி கூறியது. மேலும் ஒரே ஆண்டில் அதிகபட்சமாக மூன்று பேருக்கு பாரத ரத்னா விருது வழங்கலாம் என்றும் கூறப்பட்டுள்ளது.

அதன்படி முதலாவது பாரத ரத்னா விருது 1954ஆம் ஆண்டில் சக்ரவர்த்தி ராஜகோபாலாச்சாரி, சர்வேபள்ளி ராதாகிருஷ்ணன், இந்திய விஞ்ஞானி சி.வி. ராமன் ஆகியோருக்கு பாரத ரத்னா விருது வழக்கப்பட்டது.

1997இல் இந்த விருது இந்திய குடியரசு முன்னாள் தலைவர் ஏ.பி.ஜே. அப்துல் கலாம் வழங்கப்பட்டது. பாரத ரத்னா விருதை இந்திய குடிமக்களுக்குத்தான் வழங்க வேண்டும் என்று பிரத்யேக விதிமுறை ஏதுமில்லை. இதனால் வேறு நாட்டில் பிறந்து, இந்திய குடியுரிமையை பெற்ற சிலருக்கும் இந்த விருது வழங்கப்பட்டிருப்பதை வரலாறு பதிவு செய்திருக்கிறது.

தனது கருணையால் உலகம் முழுவதும் அங்கீகாரம் பெற்ற அன்னை தெரசா (பூர்விக பெயர் ஆக்னஸ் கோன்ஜா போஜாஜியூ) அதில் ஒருவர்.

இவர் தவிர, பாஷ்தூனிய இயக்கத்தை வழிநடத்திய இந்தியர் அல்லாத அப்துல் கஃபார் கான், தென்னாப்பிரிக்காவில் நிறவெறிக்கு எதிராக போராடி அந்நாட்டின் முதலாவது குடியரசு தலைவராக இருந்த நெல்சன் மண்டேலா ஆகியோருக்கும் பாரத ரத்னா விருது வழங்கப்பட்டிருக்கிறது.

2009இல் இந்திய குரலிசைப் பாடகரும் கர்நாடகாவைச் சேர்ந்தவருமான பீம்சென் ஜோஷி, இந்திய கிரிக்கெட் முன்னாள் வீரர் சச்சின் டெண்டுல்கர், சர்வதேச புகழ் பெற்ற வேதியியல் சி.என். ராவ் என்றழைக்கப்படுஞம் விஞ்ஞானி சிந்தாமணி நாகேச ராமச்சந்திர ராவ், இந்திய கல்வியாளர் மதன் மோகன் மாளவியா, மறைந்த இந்திய முன்னாள் பிரதமர் அடல் பிஹாரி வாஜ்பேயி, மறைந்த இந்திய குடியரசு முன்னாள் தலைவர் பிரணாப் முகர்ஜி ஆகியோருக்கும் பாரத ரத்னா விருது வழங்கப்பட்டுள்ளது.

2019இல் சமூக சீர்திருத்தவாதியும் அரசியல் தலைவராகவும் திகழ்ந்த மகாராஷ்டிராவைச் சேர்ந்த நானாஜி தேஷ்முக், கல்வி, சுகாதாரம், கிராமப்புற தற்சார்பு ஆகியவற்றுக்கு வழங்கிய பங்களிப்புக்காக பாரத ரத்னா விருது வழங்கப்பட்டது. இதுவரை மொத்தம் 48 பேருக்கு பாரத ரத்னா விருது வழங்கப்பட்டுள்ளது.

அடிப்படையில் பாரத ரத்னா விருது, இலை வடிவில் காணப்படும். இதன் முன்பக்கம், ஹிந்தி மொழியில் பாரத ரத்னா என்ற எழுத்து பொறிக்கப்பட்டிருக்கும். பின்புறம், அசோக சின்னம் இடம்பெற்றிருக்கும். விதிகளின்படி இந்த விருதை வெள்ளை நிற ரிப்பனில் அணிய வேண்டும்.

இந்த விருதுடன் இந்திய குடியரசு தலைவர் கையொப்பமிட்ட ஒரு சான்றிதழ், வழங்கப்படும். இந்த விருதுடன் எந்தவொரு நிதி மானியம் வழங்கப்படாது.

அதேபோல, இந்திய அரசியலமைப்பின் விதியின் 18(1)-இல், பாரத ரத்னா விருது பெறுவோர் தனது அடைமொழியாக இந்த விருதை பெயருக்கு முன்னாள் போட்டுக் கொள்ளக் கூடாது என்று கூறப்பட்டுள்ளது. அதே சமயம், விருது பெற்றவர் விரும்பினால், தனது லெட்டர்பேட், விசிட்டிங் கார்டு, தற்குறிப்பு ஆகியவற்றில் அவசியம் என கருதினால், 'குடியரசு தலைவரால் பாரத ரத்னா விருது பெற்றவர்' அல்லது 'பாரத ரத்னா விருது பெற்றவர்' என்ற வார்த்தைகளை அவர் போட்டுக் கொள்ளலாம் என்று அந்த விதிகள் கூறுகின்றன.

மூலம்  -பிபிசி செய்திச் சேவை

கர்நாடக சங்கீதம் முறைப்படிகற்றிராத எஸ்.பி.பி இசையுலகை யால் கட்டியாளமுடிந்தது எவ்வாறு?

 

கர்நாடக இசையை முறைப்படி கற்காமல் சங்கராபரணத்தில் கர்நாடக இசையில் அமைந்த பாடல்களை கேள்வி ஞானத்தால் பாடி தேசிய விருதையும் தட்டிச் சென்ற பெருமைக்குரியவர் எஸ்பி பாலசுப்பிரமணியம். ஆயிரம் நிலவே வா.. ஓராயிரம் நிலவே வா என தேன் போன்ற குரலால் கோடிக்கணக்கான ரசிகர்களை தன் வசம் கட்டி போட்டு வைத்துள்ளவர் எஸ்பிபி எனப்படும் எஸ் பி பாலசுப்பிரமணியம்! ஆந்திர மாநிலம் நல்லூர் மாவட்டத்தில் 1946-ஆம் ஆண்டு ஜூன் மாதம் 4-ஆம் தேதி பிறந்தவர் ஸ்ரீபதி பண்டிதாரத்யுல பாலசுப்பிரமணியம். இவர் 1966ஆம் ஆண்டு தெலுங்கு திரைப்படம் ஒன்றில் முதல்முறையாக பாடத் தொடங்கினார். 

ஆந்திர மாநிலம் நல்லூர் மாவட்டத்தில் 1946-ஆம் ஆண்டு ஜூன் மாதம் 4-ஆம் திகதி பிறந்தவர் ஸ்ரீபதி பண்டிதாரத்யுல பாலசுப்பிரமணியம். இவர் 1966ஆம் ஆண்டு தெலுங்கு திரைப்படம் ஒன்றில் முதல்முறையாக பாடத் தொடங்கினார்.

உலக அளவில் அன்று பாட ஆரம்பித்தவர் கடந்த ஆண்டு வெளியான தர்பார் வரை பாடிவிட்டார். பல்லாயிரக்கணக்கான பாடல்களை பாடி உலக அளவில் அதிக எண்ணிக்கையிலான பாடல்களைப் பாடியதற்கான கின்னஸ் சாதனை புத்தகத்தில் இடம்பிடித்துள்ளார். பாடகர் மட்டுமல்லாமல் இசையமைப்பாளர், தயாரிப்பாளர், நடிகர் பின்னணிக் குரல் தருபவர் என பன்முகத் திறமை கொண்டவர்.

இவருக்கு 2001-ஆம் ஆண்டு பத்மபூஷண் விருது வழங்கப்பட்டது. இவருக்கு 2016-ஆம் ஆண்டு 47 ஆவது இந்திய சர்வதேச திரைப்பட விழாவில் இந்திய திரைப்பட பிரமுகர் விருது வழங்கப்பட்டது. இசையமைப்பாளர் எம் எஸ் விஸ்வநாதன் முதல் இன்றைய அனிருத் வரை பெரும்பாலான இசையமைப்பாளர்களுடன் சேர்ந்து பணியாற்றியுள்ளார்.

50 ஆண்டுகளாக தொடர்ந்து பின்னணி பாடி வரும் இவர் தமிழில் முதலில் பாடியது ஹோட்டல் ரம்பா திரைப்படத்தில் எம்எஸ்வி இசையில் எல் ஆர் ஈஸ்வரியுடன் இணைந்து 'அத்தானோடு இப்படியிருந்து எத்தனை நாளாச்சு' என்ற பாடலைப் பாடினார். எதிர்பாராத நிலையில் ஹோட்டல் ரம்பா திரைப்படம் வெளியாகவில்லை.

சாந்தி நிலையம் அடுத்தது சாந்தி நிலையம் படத்தில் 'இயற்கையெனும் இளையகன்னி' பாடலை பாடினார். ஆனால் இந்த பாடல் வெளிவரும் முன்பே எம்ஜிஆர் நடித்த அடிமைப் பெண் திரைப்படத்தில் பாடிய ஆயிரம் நிலவே வா பாடல் வெளியானது. இதுவரை 40 ஆயிரம் பாடல்களை பாடியுள்ளார். 6 முறை சிறந்த பின்னணி பாடகருக்கான தேசிய விருதுகளை பெற்றுள்ளார்..

இவர் 1981-ஆம் ஆண்டு தமிழக அரசின் கலைமாமணி விருது பெற்றிருக்கிறார். 1980 களில் ஒரே நாளில் 21 கன்னட பாடல்களை பாடியுள்ளார்.தமிழ் மொழியில் ஒரே நாளில் 19 பாடல்களையும் இந்தியில் 6 மணி நேரத்தில் 16 பாடல்களையும் பாடி சாதனை செய்தார். இவரது தந்தை எஸ் பி சம்பமூர்த்தி ஹரிஹத கலைஞராவார். எஸ்பிபிக்கு எஸ்பி சைலஜா, கிரிஜா உள்பட 5 சகோதரிகள், இரு சகோதரிகள் உள்ளனர். சைலஜாவும் 5000க்கும் மேற்பட்ட பாடல்களை தென்னிந்திய மொழிகளில் பாடியுள்ளார்.

கொழும்பில் நடைபெற்ற இந்தியாவின் 74வது சுதந்திர தின வைபவம்

இந்தியாவின்  74-வது சுதந்திர தினம், இன்று, ஒகஸ்ட் 15ம் திகதி கொண்டாடப்படுகிறது. கொழும்பிலுள்ள இந்திய தூதரகத்தின் சார்பில் கொழும்பு -7ல் உள்ள இந்திய இல்லத்தில் சுதந்திர தின விழா நிகழ்ச்சிகள் ஏற்பாடு செய்யப்பட்டிருந்தன. அணிவகுப்பு மரியாதை ஏற்கும் மேடை அருகே இலங்கைக்கான இந்தியத்தூதுவர் கோபால் பாக்லே .இந்திய தேசியக் கொடியை ஏற்றினார்.

உயிரோடு உணர்வுகளைச் சாகடிக்கும் போலிச் செய்திகள்

பிரபல பாடகர் எஸ்.பி. பாலசுப்ரமணியம் மருத்துவமனைப் படுக்கையில் இருந்தவாறு தனது கைகளை உயர்த்தி காண்பிக்கின்ற புகைப்படம் கடந்த சில மணித்தியாலங்களாக அவரது உடல்நிலை பற்றி வெளியான செய்திகளைப் படித்த பலருக்கும் நிம்மதியைக் கொடுத்திருக்கும் என்பது திண்ணம். 

கொரோனாவால் பாதிக்கப்பட்ட பிரபல பாடகர் எஸ்.பி.பாலசுப்பிரமணியத்தின் உடல்நிலை கவலைக்கிடமாக உள்ளதாக அவர் சிகிச்சை பெற்று வந்த  தனியார்  மருத்துவமனை நிர்வாகம்  உத்தியோக பூர்வமாக அறிக்கையொன்றை இன்று மாலை வெளியிட்டிருந்தது. 

இதனையடுத்து இணையத்தளங்களும் சமூக வலைத்தளங்களும் தம் இஷ்டப்படி எவ்வித ஊடக தர்மமும் இன்றி தகவல்களைப் பதிவேற்றம் செய்திருந்தார்கள். இதிலே அவரது உயிர் பிரிந்துவிட்டதாக பிரசுரிக்கப்பட்ட பதிவுகளும் அடங்கும். 

கொரோனா வைரஸ் பற்றி பரப்பப்பட்ட போலிச் செய்திகள்  காரணமாக இவ்வருடத்தின் முதல் மூன்று மாதங்களில் மாத்திரம் உலகின்  பல்வேறு பகுதிகளிலும் சுமார் 800 பேர் வரை உயிரிழந்திருந்ததாக ஆய்வொன்றில் இருந்து அறியவந்துள்ளதாக கடந்த 12ம் திகதி BBC  செய்திச் சேவை செய்திவெளியிட்டிருந்தது.American Journal of Tropical Medicine and Hygiene என்ற அமைப்பினால் மேற்கொள்ளப்பட்ட ஆய்வின் அடிப்படையிலேயே இந்தத்தகவல் வெளியாகியிருந்தது. சமூக வலைத்தளங்களில் வெளியான போலிச் செய்திகள் காரணமாக 5800 பேர் வரையில் வைத்தியசாலைகளில் அனுமதிக்கப்பட்டதாகவும் அந்தச் செய்தியில் மேலும் தெரிவிக்கப்பட்டிருந்தது

ஒருவர் கடுமையான சுகவீனமடைந்து அவர் வாழ்வதற்கு ஒரு சதவீதமான வாய்ப்பே இருந்தாலும் அவரைச் சார்ந்தவர்கள் பலரும் அவரது உயிரை எப்படியேனும் காப்பாற்றிவிடவேண்டும் எனவே போராடுவர் என்ற பொதுநலச் சிந்தனையில்லாத ஜடங்களாக பலரும் மாறிக்கொண்டிருப்பது கவலைக்கிடமானது. 

கடந்த மாதம் 19ம்திகதி யாழ் பல்கலைக்கழகத்தின் கிளிநொச்சி வளாகத்தில் யானைத்தாக்குதலுக்கு இலக்காகி கடுமையான காயங்களுக்குள்ளான விரிவுரையாளர் உயிரிழந்துவிட்டதாக மறுநாளான 20ம்திகதியே பல்வேறு இணையத்தளங்களும் செய்திகளை வெளியிட்டிருந்தமை நினைவிருக்கும் .

வென்டிலேற்றர் உதவியோடு தீவிர சிகிச்சைகளுக்கு உட்படுத்தப்பட்ட அந்தவிரிவுரையாளர் ஒகஸ்ட் 2ம்திகதியே உயிரிழந்ததாக அறிவிக்கப்பட்டது. 

ஃபேஸ்புக் போன்ற சமூக வலைத்தளங்களின் வருகையின் பின்னர் எவ்வித பொறுப்பும் இன்றி கிடைத்த ஆரம்ப தகவலை எப்படி படிமுறையாக பல இடங்களிலும் ஆராய்ந்து செய்தியாக்க வேண்டும் என்ற  தராதரம் இன்றி பதிவுகளை போடுகின்ற அவல நிலை ஏற்பட்டுள்ளது. 

தமக்கும் ஏதோ தெரியும் என்ற எண்ணத்தில் சிலர், நாமும் கருத்துக்கூறவேண்டும் என்ற நினைப்பில் சிலர், மற்றவர்கள் போடாத விடயத்தை போட்டு அவதானத்தைப் பெறவேண்டும் என்று சிலர், தமது பதிவுகளுக்கு அதிக லைக்குகளும் ஷெயார்களும் கிடைக்கவேண்டும் என்று சிலர் என பல்வேறு விதமானவர்கள் சமூக வலைத்தளங்களை ஆக்கிரமித்துள்ளனர். 

ஒருவரை உயிருடன் கொன்றேனும் அவதானத்தைப் பெறவேண்டும், தமது பதிவுகளுக்கு அதிக ஹிட்ஸ் எடுக்க வேண்டும் என்ற கேடுகெட்ட தரப்பின் மீது மட்டும் இவ்வாறான போலிச் செய்திகளுக்கான பொறுப்பை போட்டுவிட்டு நாம் கழன்றுவிடமுடியாது. எம்மில் எத்தனைபேர் சினிமாவிற்கும், தொலைக்காட்சி களியாட்ட நிகழ்ச்சிகளுக்கும்  கிசுகிசு பேச்சுக்களுக்கும் நேரத்தை அதிகமாக கொடுத்துவிட்டு போலிச்செய்திகளால் ஏமாற்றப்படும் பேர் வழிகளாக மாறிக்கொண்டிருக்கின்றோம். போலிச் செய்திகளை எப்படிக் கண்டுபிடிப்பது.? போலிச் செய்திகளில் இருந்து தவிர்ந்துகொள்வதற்கு எமது பக்கத்தில் என்ன செய்யவேண்டும் என அறிந்து செயற்படுவோமானால் எம்மையும் பாதுகாத்து எம்மைச் சார்ந்தவர்களையும் பாதுகாத்துக்கொள்ளமுடியும் என்பதை நினைவூட்ட விரும்புகின்றேன். 

இறுதியில் ஒருவிடயத்தை கூறுகின்றேன். எனக்கு இசையைப் பற்றி பெரிதாக தெரியாது. ஆனால் எஸ்.பி.பாலசுப்ரமணியம் பாடிய இடைக்காலப் பாடல்களைக் கேட்கும் போது எந்த விதமான சோகமான நிலையில் நான் இருந்தாலும் என்மனத்திற்கு ஆறுதலாக இதமாக வருடிக்கொடுக்கும் அவரது காந்தக்குரல். சில காலத்திற்கு முன்பாக எஸ். ஜனாகி அம்மையார் உயிரோடு இருக்கையிலேயே அவர் இறந்துவிட்டதாக குழி தோண்டிப் புதைக்க முனைந்தபோது அவர் இன்னமும் உயிரோடு இருக்கின்றார் என நம்பிக்கை தந்தவர் எஸ்.பி.பி.  தனது பாடல்களால் லட்சக்கணக்கானவர்களுக்கு நம்பிக்கையளிக்கும் எஸ்.பி.பி இன்னமும் பல ஆண்டுகள் வாழ வேண்டும் .இசை உலகை ஆளவேண்டும் என்று பிரார்த்திப்போமாக!

அருண் ஆரோக்கியநாதர்

போலிச் செய்திகளை எப்படிக் கண்டறிவது?