தற்போதைய கொரோனா வைரஸ் வீரியமானது என்பதால், தொற்று பரவலின் வேகம் அதிகரிக்குமெனவும் அந்த ஆய்வில் தெரிவிக்கப்பட்டுள்ளது.
மினுவாங்கொடை,திவுலப்பிட்டிய,பேலியகொடை மீன் சந்தை மற்றும் பேருவளை துறைமுகத்தை அண்மித்த பகுதிகளில் அடையாளம் காணப்பட்ட கொரோனா நோயாளிகளிடமிருந்து பெற்றுக்கொள்ளப்பட்ட மாதிரிகளை அடிப்படையாகக் கொண்டு இந்த ஆய்வு நடத்தப்பட்டுள்ளது.
இலங்கை விடயத்தில் அமெரிக்காவுக்கும் சீனாவிற்கும் இடையிலான கருத்துமோதல்கள் பொதுவெளியிலும் தீவிரமடைந்துவரும் நிலையில் இலங்கைகான சீனாவின் புதிய தூதுவர் ட்சீ சென்ஹொங் இன்று மாலை 6.30 மணியளவில் வந்தடைந்துள்ளார்.
1988ம் ஆண்டு சீனாவின் வெளிநாட்டு சேவையில் இணைந்த வெளியுறவுத் துறையில் பல்வேறு பதவிகளை வகித்துள்ளதுடன் 2014ம் ஆண்டு தொடக்கம் 2017ம் ஆண்டுவரை பஹ்ரேய்ன் நாட்டுக்கான சீனத்தூதுவராக ட்சீ சென்ஹொங் பதவிவகித்துள்ளார். இலங்கையின் தூதுவராக நியமிக்கப்பட்ட வேளை அவர் சர்வதேச கற்கைகளுக்கான சீனா நிலையத்தின் தலைவராக பதவிவகித்திருந்தமை குறிப்பிடத்தக்கது.
இன்று மாலை கட்டுநாயக்க விமானநிலையத்தை வந்தடைந்தபின்னர் அவர் ஊடகங்களுக்கு விடுத்த செய்தியைத் தாங்கிய சீனத்தூதரக அறிக்கை இதோ:..
இலங்கைக்கான சீனாவின் புதிய தூதர் ட்சீ சென்ஹொங்கின் உரை
（2020ஆம் ஆண்டு அக்டோபர் 30ஆம் நாள், கொழும்பு சர்வதேச விமான நிலையம்）
அன்புள்ள இலங்கை நண்பர்கள், சக நாட்டவர்கள்：
இலங்கை வந்தடைந்தும் இந்து மாக்கடலின் முத்து என போற்றப்படும் இலங்கையின் அழகு, உற்சாகம் மற்றும் நட்புறவை ஆழ்ந்த முறையில் உணர்ந்து கொள்கின்றேன். அன்புணர்வோடு மனமுருகினேன். சீன அரசு மற்றும் மக்களின் நம்பிக்கைக்கு தோள் கொடுத்து நட்பார்ந்த இலங்கைக்கான தூதராக வருகின்றேன். நான் பொறுப்பேற்க வேண்டிய கடமை மிகவும் முக்கியமானதாகவும் பிரகாசமாகவும் உள்ளது.
சீனாவுக்கும் இலங்கைக்கும் இடையேயான நட்புறவு வாழையடி வாழையாக நிலவி வருகிறது. இருதரப்பும் ஒன்றுக்கு ஒன்று நேர்மையாக உதவியளித்து, தலைமுறை தலைமுறையாக நட்பார்ந்து பழகும் நெடுநோக்கு ஒத்துழைப்புக் கூட்டாளிகளாகும். இருநாட்டுத் தூதாண்மை உறவு நிறுவப்பட்ட பிறகு, குறிப்பாக 2014ஆம் ஆண்டில் சீன அரசுத் தலைவர் ஷிச்சின்பிங் இலங்கையில் பயணம் மேற்கொண்டதிலிருந்து, பல்வேறு துறைகளில் இருநாட்டு ஒத்துழைப்பு மற்றும் பரிமாற்றம் பெரும் சாதனைகளைப் பெற்று, சர்வதேச மற்றும் பிராந்திய விவகாரங்களில் நெருக்கமான தொடர்பு மற்றும் ஒருங்கிணைப்பை நிலைநிறுத்தி வருகின்றன. நீண்ட வரலாறுடைய இருநாட்டுறவு இன்னும் பசுமையாக உள்ளது. பரஸ்பர நெடுநோக்கு நம்பிக்கை அதிகரித்து வருகிறது. இவ்வாண்டில் கோவிட்-19 நோய்த் தடுப்புக்கான கூட்டுப் போராட்டத்தில் இருநாட்டுறவு மேலும் உயர்ந்து, நாடுகளுக்கிடையே நட்பார்ந்த உறவுக்கு முன்மாதிரியாக மாறியுள்ளது.
இலங்கைக்கான சீனாவின் புதிய தூதராக, சீன மற்றும் இலங்கை பணியாளர்களுடனும் நண்பர்களுடனும் இணைந்து பாடுபட்டு, இருநாட்டு அரசுத் தலைவர்களின் ஒத்த கருத்துக்களை உணர்வுப்பூர்வமாகச் செயல்படுத்தி, சீனாவுக்கும் இலங்கைக்கும் இடையே ஒன்றுக்கு ஒன்று உதவியளித்து நட்பார்ந்து பழகும் நெடுநோக்கு ஒத்துழைப்பு கூட்டாளியுறவை முன்னேற்றி, ஒரு மண்டலம் மற்றும் ஒரு பாதையின் கூட்டு கட்டுமானம் மற்றும் பல்வேறு துறைகளிலான ஒத்துழைப்புகளின் மூலம் இருநாட்டு மக்களுக்கு மேலும் பெரும் மனநிறைவைக் கொண்டு வந்து, பிராந்திய அமைதி, நிதானம், வளர்ச்சி மற்றும் செழுமையை முன்னெடுத்துச் செல்வதை எதிர்பார்க்கின்றேன்.
அனைவருக்கும் மீண்டும் நன்றி！
பிற்குறிப்பு
இரண்டு வாரகால தனிமைப்படுத்தலுக்குப் பின்னர் அவர் இலங்கைக்கான சீனத்தூதுவர் பதவியைப் பொறுப்பேற்றுக்கொள்வார் என சீனத்தூதரகத்தின் டுவிட்டர் தளத்தில் தெரிவிக்கப்பட்டுள்ளது.
 |
| படம் : டுவிட்டர் |
கொரோனா தொற்றாளர்களின் எண்ணிக்கை கடந்த சில வாரங்களாக சடுதியாக அதிகரித்துள்ள நிலையில் இலங்கை பேராபத்தை நோக்கிச் சென்றுகொண்டிருக்கின்றதா? என்ற கேள்வி பாமர மக்கள் தொடக்கம் புத்திஜீவிகள் வரை பல்வேறு மட்டத்திலும் எழுப்பப்பட்டுக்கொண்டிருக்கின்றது.
விசேட மருத்துவர்கள் பலரைத் தொடர்பு கொண்டு கேட்டபோது அவர்கள் தமது உயர்ந்த தொழிலின் தார்மீக கோட்பாட்டின் படியோ என்னவோ நேரடியாக இந்தக் கேள்விக்கான பதிலைத் தெரிவிக்கவில்லை. ஒருவர் பாரதூரமான நோய்க்குள்ளாகி அவரது உயிர் பிழைக்க 99 வாய்ப்பில்லாத போதும் எஞ்சியுள்ள ஒரு வீதத்தை மனதிற்கொண்டு கடவுளிடம் பிரார்த்தியுங்கள் நாம் எம்மால் இயன்றமட்டும் முயற்சிக்கின்றோம் என்று கூறுபவர்களல்லவா வைத்தியர்கள். அந்தவகையில் தான் தற்போது இலங்கையில் கொரோனா தொற்றின் ஆபத்தின் உண்மையான தாற்பரியம் தொடர்பாகவும் நேரடியான பதில்களைப் பெற்றுக்கொள்ளமுடியவில்லை.
ஆனால் அண்மையில் வெளியான புள்ளிவிபரங்கள் அதிகாரிகளால் தெரிவிக்கப்பட்ட கருத்துக்கள் உலகளாவிய உதாரணங்களைக் கருத்தில் கொண்டால் இலங்கையில் கொரோனாவின் உண்மை நிலைமை என்ன என்பது தொடர்பாக ஒரு புரிந்துணர்வைப் பெற்றுக்கொள்ள முடியும்.
கொரோனா வைரஸ் பரவல் பற்றிய உத்தியோக பூர்வமுடிவுகள் வெளியிடும் www.covid19.gov.lk இணையத்தள தரவுகளின் படி இதுகாலவரையில் இலங்கையில் கண்டறியப்பட்ட கொரோனா தொற் றாளர்களின் எண்ணிக்கை 9,701 எனக் குறிப்பிடப்பட்டுள்ளது. இவர்களில் 4,142 பேர் ஏற்கனவே குணமடைந்துள்ள நிலையில் தற்போது கொரோனா வைரஸால் பாதிக்கப்பட்டு சிகிச்சை பெற்றுவருகின்றவர்களின் எண்ணிக்கை 5,630 ஆகவுள்ளது.
நேற்றையதினம் பலியான மூவர் உட்பட இதுவரை மொத்தமாக 19 பேர் கொரோனாவால் இலங்கையில் பலியாகியுள்ளதாக அரசாங்க தகவல்கள் தெரிவிக்கின்றன. ஆனால் இதுவரை கொரோனாவால் பலியான இலங்கையர்களின் எண்ணிக்கை வெளிநாடுகளில் இறந்தவர்களையும் சேர்த்து கணக்கெடுத்தால் இதனைவிட பலமடங்கு அதிகமாகும். இம்மாதம் 5ம் திகதி இலங்கை வெளிநாட்டு வேலைவாய்ப்பு பணியகத்தின் தரவுகளின் படி இலங்கையைச் சேர்ந்த புலம்பெயர் பணியாளர்கள் 64 பேர் கொரோனாவிற்கு பலியாகியிருந்தமை சுட்டிக்காட்டத்தக்கது.
இன்றைய தினம் வெளியான தரவுகளுக்கு அமைவாக தற்போது வைத்தியசாலைகளில் சிகிச்சை பெற்றுவரும் கொரோனா தொற்றாளர்களின் எண்ணிக்கை 5,630 ஆகவுள்ளது. இந்தத் தொகையைப் பார்க்கின்றபோது இலங்கையில் கொரோனா தொற்றாளர்களைப் பராமரிப்பதற்காக ஏற்கனவே ஒதுக்கிவைக்கப்பட்டிருந்த படுக்கைகளின் அளவைவிட இருமடங்கைத்தாண்டியுள்ளது .
கடந்த ஒக்டோபர் 17ம் திகதி கொவிட்-19 தடுப்பிற்கான தேசிய செயற்பாட்டு நிலையத்தால் வெளியிடப்பட்ட தரவுகளுக்கு அமைவாக இலங்கையில் காணப்படும் கொரோனா தொற்றாளர்களுக்காக ஒதுக்கப்பட்ட வைத்தியசாலை படுக்கைகளின் எண்ணிக்கை 2,075 ஆக இருந்தது. அப்படியிருக்கையில் தற்போது 5,630 பேர் சிகிச்சை பெற்றுவருவதாக கூறப்படுகையில் ஏற்கனவே சுகாதாரக் கட்டமைப்பின் எல்லையைத் தாண்டி விட்டமை புலனாகும்.
இத்தாலி போன்ற சிறந்த சுகாதாரக் கட்டமைப்பைக் கொண்ட நாடுகளில் கூட அவர்களது வைத்தியசாலை படுக்கைகளின் அளவை விட தொற்றாளர்கள் எண்ணிக்கை அதிகரித்தமைகாரணமாகவே அதிகளவில் பல்லாயிரக்கணக்கான மரணங்கள் சம்பவித்தமை சுட்டிக்காட்டத்தக்கது. இதன் காரணமாகவோ என்னமோ எதிர்வரும் நாட்களில் அதிக உயிரிழப்புக்கள் பதிவாகக்கூடும் என தொற்று நோய் விஞ்ஞானப் பிரிவின் பணிப்பாளர் விசேட மருத்துவ நிபுணர் சுதத் சமரவீர தெரிவித்திருந்தார்.
கொரோனா பரிசோதனைகளை நடத்தும் பிசிஆர் இயந்திரம் பழுதடைந்துள்ளமையினால் பரிசோதனை முடிவுகளை வெளியிடுவதில் சிக்கல் நிலை உருவாகியுள்ளதாக பொது சுகாதார பரிசோதகர்கள் சங்கத்தின் தலைவர் உபுல் ரோஹண இன்று தெரிவித்திருந்தார். ஏற்கனவே 20,000 வரையான பிசிஆர் பரிசோதனை முடிவுகள் இதனால் தேங்கிக்கிடக்கின்றன. அந்த முடிவுகளும் வந்திருந்தால் எண்ணிக்கை பல ஆயிரங்களால் அதிகரித்திருக்கும் சாத்தியத்தை நிராகரித்துவிடமுடியாது. அதுஒருபுறமிருக்க பிசிஆர் பரிசோதனைகளை அடுத்து வீடுகளில் தனிமைப்படுத்திக்கொள்ளுமாறு கேட்கப்பட்டவர்களது முடிவுகள் வெளியாவதில் தாமதம் காணப்படும் நிலையில் அவர்களது அயலில் குறுக்குத்தொற்று ஏற்படவாய்ப்புக்கள் உண்டு என சுட்டிக்காட்டப்படுகின்றது
.
அதனைத்தவிர மேல்மாகாணத்தில் கொரோனா தொற்றாளர்கள் அதிகரித்துவரும் நிலையில் இன்று நள்ளிரவுமுதல் ஊரடங்கு நடைமுறைக்கு வரவுள்ள நிலையில் இம்மாகாணத்தில் பணியாற்றும் பலரும் தமது ஊர்களுக்கு கிளம்பிச் சென்று கொண்டிருப்பதால் தத்தம் பகுதிகளுக்கும் கொரோனாவை எடுத்துச் செல்லும் வாய்ப்புக்கள் உள்ளதாக எச்சரிக்கப்படுகின்றது. ஏற்கனவே மினுவங்கொடை கொத்தணியால் ஒரளவிற்கு நாட்டின் பலபகுதிகளிலும் பரவியிருந்த கொரோனா பேலியகொடை மீன் சந்தைக் கொத்தணியின் காரணமாக நாட்டின் 23 மாவட்டங்களுக்கும் பரவியுள்ளநிலையில் தற்போது மேல் மாகாணத்தில் இருந்துபெருந்தொகையானவர்கள் கிளம்பிச்சென்றுகொண்டிருப்பது நிலைமையை மோசமாக்கக்கூடும் என்பதில் சந்தேகத்திற்கிடமில்லை..
இலங்கையில் புதிய கட்ட கொரோனா வைரஸ் பரவல் அதிகரித்திருக்கும் நிலையில் எதிர்வரும் நாட்களில் அதிக உயிரிழப்புக்கள் பதிவாகக்கூடும் என சுகாதார அதிகாரிகள் தெரிவித்துள்ளனர்.
மினுவங்கொடை மற்றும் பேலியாகொடை கொத்தணியோடு தொடர்புடைய மேலும் பல தொற்றாளர்கள் நாட்டின் பல பாகங்களில் இருந்தும் இனங்காணப்பட்டுவருவதாக தொற்று நோய் விஞ்ஞானப் பிரிவின் பணிப்பாளர் விசேட மருத்துவ நிபுணர் சுதத் சமரவீர சுட்டிக்காட்டியுள்ளார்.
பேலியாகொடை கொத்தணியானது மினுவங்கொடை கொத்தணி போன்றோ அதற்கு முன்னர் கண்டறியப்பட்ட கொத்தணிகள் போன்றோ அன்றி வித்தியாசமானது. ஏனெனில் அதன் பரவல் வீச்செல்லை பெரிதாக அமைந்துள்ளது. பேலியாகொடை மீன் சந்தையே நாட்டின் ஏனைய பகுதிகளுக்கான மீன் விநியோகத்தின் மத்திய ஸ்தானமாக விளங்குவதே இதற்கு காரணமாகும்.
பேலியாகொடை சந்தையுடன் தொடர்புடைய தொற்றாளர்களை இனங்காணப்பதற்காக மேலும் பிசிஆர் பரிசோதனைகள் மேற்கொள்ளப்படுவதாக தெரிவித்த விசேட வைத்தியர் சுதத் சமரவீர தற்போது தனிமைப்படுத்தல் நடைமுறை பின்பற்றப்படுவதாக தெரிவித்தார்.
இலங்கை சுகாதார மேம்பாட்டுப் பணியகத்தின் தரவுகளின் படி இதுவரை இலங்கையில் கொரோனா தொற்றுக்குள்ளானவர்களின் எண்ணிக்கை 8,870 ஆக பதிவாகியுள்ளதுடன் இதில் 4,075 பேர் குணமடைந்து வீடுகளுக்கு சென்றுள்ளனர். தற்போது 4,776 பேர் நாட்டின் பலபாகங்களிலுமுள்ள கொரோனா சிசிச்சை நிலையங்களில் தங்கவைக்கப்பட்டு சிசிச்சையளிக்கப்பட்டுவருகின்றனர். இதுவரை இலங்கையில் 19 பேர் கொரோனா வைரஸால் உயிரிழந்துள்ளமை குறிப்பிடத்கத்கது.
இலங்கைக்கு நேற்றைய தினம் வருகைதந்த அமெரிக்க இராஜாங்கச் செயலாளர் மைக் பொம்பியோ இன்றுகாலை வெளிவிவகார அமைச்சர் டினேஸ் குணவர்த்தனவை சந்தித்த பின்னர் நடத்திய ஊடகவியலாளர் சந்திப்பின்போது,
"A strong sovereign Sri Lanka is a powerful strategic partner for the US in the world stage and can be beacon for a free and open Indo-Pacific. Adds that China is a predator and the US comes as a friend and partner."
" இலங்கை உலக அரங்கில் அமெரிக்காவின் வலுவான கேந்திர முக்கியமிக்க பங்காளர். திறந்ததும் சுதந்திரமுமான இந்து சமுத்திரப் பிராந்தியத்தின் கலங்கரை விளக்கமாக திகழ்கின்றது. சீனா சூறையாடுபவன் . அமெரிக்கா நண்பனாகவும் பங்காளராகவும் திகழ்கின்றது" என்று தெரிவித்திருந்தார்.
predator என்பதற்கு பொருள் சூறையாடுபவன் என்றோ பிறவிலங்குகளை வேட்டையாடிக் கொன்று தின்னும் விலங்கு என்று பொருள்படும் இதற்கு சீனத்தூதரகம் கடுமையான பொருள் பொதிந்த நகைச் சுவைப் பதிவை அதன் டுவிட்டர் தளத்தில் வெளியிட்டிருந்தது
"மன்னிக்கவும் இராஜாங்க அமைச்சர் பொம்பியோ. நாம் இலங்கைக்கும் சீனாவிற்கும் இடையிலான நட்புறவையும் ஒத்துழைப்பையும் வலுப்படுத்துவதில் பிஸியாக இருக்கின்றோம். உங்களது ஏலியன் எதிர் பிறிடேட்டர் விளையாட்டுக்கான அழைப்பில் எமக்கு அக்கறையில்லை. என்றும் போல அமெரிக்கா இரட்டைப் பாத்திரத்தை ஒரே நேரத்திலேயே விளையாட முடியும்" என்று சீனத்தூதரகத்தின் டுவிட்டர் தளத்தில் பதிவிடப்பட்டுள்ளது.
பின்னணிக் குறிப்பு
ஹொலிவுட் சுப்பர்ஸ்டார் ஆர்னோல்ட் ஸ்வாஸ்னேகர் நடித்த Predator என்ற படம் 1987ம் ஆண்டில் வெளியாகிருந்தது. அதில் கண்ணுக்குப் புலப்படாது மனிதர்களை வேட்டையாடி கொடூரமாகக் கொல்லும் நவீன தொழில்நுட்பத்துடன் இரண்டறக்கலந்த விலங்கை ஆர்னோல்ட் கொன்றொழிப்தே மையக்கதை .
அதேபோன்று 2004ம் ஆண்டில் வெளியான Aliens Vs Predator விஞ்ஞான புனைக்கதை திகில் திரைப்படத்திலும் இதேவிதமான கதைக்கருவே இருந்தது. அதன் இரண்டாம் பாகம் 2007ல் வெளியாகியிருந்தது. Aliens Vs Predator என்ற பெயரிலான வீடியோ கேம்களின் மூன்று பாகங்கள் ஏற்கனவே வெளியாகியுள்ளமை குறிப்பிடத்கத்கது.
Isaac GoldbergDiplomacy is to do and say the nastiest things in the nicest way.
. இந்த விஜயம் தொடர்பாக கருத்துவெளியிட்டிருந்த அமெரிக்க முதன்மை பிரதி உதவி இராஜாங்க செயலர் டீன் தொம்ஸன், வெளிநாட்டு உறவுகள் தொடர்பாக 'இலங்கை கடினமானதும் ஆனால் தேவையானதுமான தீர்மானங்களை' இலங்கை மேற்கொள்ள வேண்டும் என்று கோரியிருந்தார்.
' இராஜதந்திரம் என்பது மிக மோசமானவற்றைச் செய்வதானாலும் கூறுவதானாலும் இனிமையாக கூறுவதென பிரபல அமெரிக்க எழுத்தாளர் ஐசக் கோல்ட் பேர்க் ஒருமுறை கூறியிருந்தார்.
எதிரி நாட்டு இராஜதந்திரியானாலும் ஒரு நாட்டிற்கு வருகை தரும் போது நாட்டிலுள்ள தலைவர்களோடு எத்தகைய பாரதூரமான கடும் சொற்பதங்கள் உள்ளடங்கங்கள் தாங்கிய விடயதானத்தைப் பேசினாலும் வெளியரங்கில் சிரித்து இங்கிதமாகப் பேசி பூசி முழுகிச் செல்வதுண்டு. ஆனால் இந்த விஜயம் தொடர்பான தகவல் வெளியானது முதலே அதிரடியான கருத்துக்களும் சமிக்ஞைகளுமே வெளிப்படுத்தப்பட்டுள்ளதைக் காணமுடிகின்றது.
அமெரிக்க ஜனாதிபதித் தேர்தலுக்கு இன்னமும் சில நாட்களே உள்ள நிலையில் டொனால்ட் ட்ரம்ப் தோல்வியடைந்தால் தற்போதைய அழுத்தங்களில் இருந்து மீள வழியுண்டு என இலங்கை ஆட்சியாளர்களில் ஒருதரப்பினர் எதிர்பார்க்கக்கூடும். ஆனால் இலங்கை மீது ஜெனிவாவில் கடுமையான அழுத்தங்களைக் கொடுத்தது டொனால்ட் ட்ரம்பின் குடியரசுக்கட்சி நிர்வாகம் அல்ல. மாறாக ஜனாதிபதித் தேர்தல் அவரை எதிர்த்துநிற்கும் ஜோ பைடனின் ஜனநாயகக்கட்சி நிர்வாகம். அப்படிப்பார்க்கும் போது யார் ஜனாதிபதி ஆனாலும் இலங்கைக்கு கடுமையான அழுத்தம் வருவதற்கு வாய்ப்புண்டு. ஏனெனில் இலங்கையைப் போன்று ஆட்சிகள் மாறுகின்ற போது கொள்கைகள் மாறுவது போன்று குறிப்பாக வெளியுறவுவிடயங்களில் மாற்றங்கள் அமெரிக்காவில் மாற்றம் அடைவதில்லை. அந்தவகையில் இலங்கை மீதான அழுத்தங்கள் தொடர்வதற்கான ஆபத்து அதிகமாக உள்ளது என்றால் மிகையல்ல.
கடந்த 15 ஆண்டு காலப்பகுதியில் குறிப்பாக 2009 ஆண்டு யுத்தம் நிறைவுபெற்றபின்னர் இலங்கையின் வெளியுறவுக் கொள்கையை உற்றுநோக்கினால் இந்து சமுத்திரப் பிராந்தியத்தில் கேந்திர ஸ்தானத்திலுள்ள இலங்கையின் மீது அதிக ஆர்வத்தைக் கொண்டுள்ள வல்லரசுளின் விருப்பங்களை சமநிலைப்படுத்தி சமாளிப்பதற்கான தொடர்ச்சியான விரக்தி மிக்க முயற்சிகள் என்றும் வர்ணிக்க முடியும் .
என்னதான் பெரும் வல்லரசுகளுடனான உறவுகளை சமநிலைப்படுத்திக்கொள்ள இலங்கை பகிரத முயற்சிகளை மேற்கொண்டாலும் அது நீண்டகாலத்திற்கு சாத்தியப்படமாட்டாது. இதற்கு இலங்கையின் மிக மோசமான பொருளாதார நிலையும் முக்கியகாரணமாக அமைந்துள்ளது.
மீனுக்கு தலையையும் பாம்புக்கு வாலையும் காட்டி கடந்த காலத்தில் சமாளித்தது போன்று இனியும் செய்வது மிகக் கடினம் .எனவே இலங்கை விரும்பாவிடினும் கூட சீனாவிற்கும் அமெரிக்காவிற்கும் இடையிலான வல்லாதிக்கப் போட்டியில் ஒரு வல்லரசின் பக்கத்தை எடுக்க வேண்டிய நிர்ப்பந்ததிற்குள்ளாகியுள்ளதென்பதில் சந்தேகத்திற்கிடமில்லை.
-ஆரோ
இலங்கைக்கு தேவையற்ற பிரச்சனைகளைக் கொண்டுவரவேண்டாம் என அமெரிக்க இராஜாங்க செயலர் மைக் பொம்பியோவின் விஜயத்தை முன்னிட்டு இலங்கைக்கான சீனத்தூதரகம் விடுத்துள்ள அறிக்கையில் தெரிவிக்கப்பட்டுள்ளது.
அந்த அறிக்கை பின்வருமாறு
அமெரிக்க முதன்மை பிரதி உதவி இராஜாங்க செயலர் டீன் தொம்ஸன் இராஜாங்க செயலாளரின் எதிர்வரும் விஜயம் தொடர்பாக நடத்திய ஊடகவியலாளர் மாநாட்டில் சீனா-இலங்கை உறவு தொடர்பாக பகிரங்கமாக வலியுறுத்தல் விடுத்ததுடன் தலையீடு செய்தமை மட்டுமன்றி வெளிநாட்டு உறவுகள் தொடர்பாக 'கடினமானதும் ஆனால் தேவையானதுமான தீர்மானங்களை' இலங்கை மேற்கொள்ள வேண்டும் என்று கோரியிருந்தமையானது இராஜதந்திர நெறிமுறைகளை அப்பட்டமாக மீறுவதாகும்.
அடுத்த நாள், சீன வெளியுறவு அமைச்சகத்தின் செய்தித் தொடர்பாளர் கடுமையாக பதிலளித்து, அமெரிக்க அதிகாரியின் கருத்துக்கள் பனிப்போர் மனநிலையால் நிரம்பியுள்ளன என்றும் மேலாதிக்க மனப்பான்மை தோல்வியடையும் என்றும், இது மற்ற நாடுகளில் தன்னிச்சையாக தலையிடும் அமெரிக்க நடைமுறையை முழுமையாக அம்பலப்படுத்தியுள்ளது உள்நாட்டு மற்றும் வெளியுறவுக் கொள்கைகள் மற்றும் சிறிய மற்றும் நடுத்தர நாடுகளை பக்கங்களைத் தேர்வு செய்ய கட்டாயப்படுத்துகிறது.
உள்ளூர் மற்றும் சர்வதேச ஊடக விசாரணைகளில், தூதரகம் மேலும் பின்வருமாறு கூறுகிறது:
1). சீனா மற்றும் இலங்கை மக்கள் கிட்டத்தட்ட இரண்டாயிரம் ஆண்டுகளாக நட்பு பரிமாற்றங்களின் வரலாற்றைக் கொண்டுள்ளனர். ஒருவருக்கொருவர் உறவுகளைக் கையாள எங்களுக்கு போதுமான ஞானம் உள்ளது மேலும் ஆணையிட மூன்றாம் தரப்பு தேவையில்லை. 1950 களில் இரு நாடுகளும் ஒருவருக்கொருவர் இராஜதந்திர உறவுகளை ஏற்படுத்துவதற்கு முன்பே, நாங்கள் அமெரிக்க முற்றுகை மற்றும் பொருளாதாரத் தடைகளை மீறி, வரலாற்று ரப்பர்-அரிசி ஒப்பந்தத்தில் கையெழுத்திட்டோம். இன்று 21 ஆம் நூற்றாண்டில், எந்தவொரு வெளி சக்திகளின் வற்புறுத்தலுக்கும் இரு நாடுகளும் அடிபடுவது சாத்தியமில்லை. இலங்கை மக்களின் நேர்மையான நண்பராக, தீவு மற்ற நாடுகளுடன் ஆரோக்கியமான உறவை வளர்ப்பதைக் கண்டு சீனா மகிழ்ச்சியடைகிறது. எவ்வாறாயினும், சீனா-இலங்கை உறவுகளை விதைப்பதற்கும் தலையிடுவதற்கும் மற்றும் இலங்கையை வற்புறுத்துவதற்கும் கொடுமைப்படுத்துவதற்கும் வெளியுறவுத்துறை செயலாளரின் வருகையை அமெரிக்கா பெறுவதை நாங்கள் உறுதியாக எதிர்க்கிறோம். அமெரிக்கா சர்வதேச சமூகத்தின் நியாயமான அழைப்புகளை எதிர்கொள்ளும், சீனா-இலங்கை உறவுகளின் பிரபலமான தளத்தை எதிர்கொள்ளும். இலங்கை மக்களின் உண்மையான தேவைகளை எதிர்கொள்ளும். 'கடினமான ஆனால் தேவையான முடிவுகளை எடுக்கும்' என்று நம்பப்படுகிறது. 'மற்றும் பிற நாடுகளின் உள்நாட்டு மற்றும் வெளிநாட்டு விவகாரங்களில் தன்னிச்சையாக தலையிடுவதற்கான அசிங்கமான நடைமுறைகளை சரிசெய்யவும்.
11). அதே நேரத்தில், உண்மையான நண்பர்கள் தங்களை மறுபக்கத்திலுள்ளவர்களின் நிலைநின்று நோக்க வேண்டும் என்று நாங்கள் அமெரிக்காவிற்கு உண்மையாக அறிவுறுத்துகிறோம். தற்போது, கோவிட் -19 வெடித்ததிலிருந்து இலங்கை மிகக் கடுமையான சவாலை எதிர்கொள்கிறது மேலும் உள்ளூர் சுகாதார அமைப்பு இனி இறக்குமதி செய்யப்படும் எந்த ஆபத்துகளையும் தாங்க முடியாது. அதன் சொந்த உறுதிப்படுத்தப்பட்ட வழக்குகள் 8.8 மில்லியனை எட்டியதும், இறப்பு எண்ணிக்கை 230 ஆயிரத்தை தாண்டியதும் அமெரிக்கா ஒரு பெரிய தூதுக்குழுவையும் முன்கூட்டிய குழுவையும் இலங்கைக்கு அனுப்பியுள்ளது. மேலும் வருகைக்காகவும் வெளிவரும் சாலை கட்டுமானத்திற்காகவும் பல்வேறு கோரிக்கைகளை விடுத்துள்ளது. பொது மக்கள் தொடர்ந்து கேள்வி எழுப்புகிறார்கள்: இந்த அணுகுமுறை நாடு மீதான உங்கள் மரியாதையை உண்மையிலேயே நிரூபிக்கிறதா? உள்ளூர் தொற்றுநோய் தடுப்பு மற்றும் கட்டுப்பாட்டுக்கு இது உதவுமா? இது இலங்கை மக்களின் நலன்களுக்காகவா?
111). சமீபத்தில், ஒரு உயர்மட்ட சீனக் குழுவும் இலங்கைக்கு விஜயம் செய்தது. இலங்கையின் தொற்றுநோய்க்கு எதிரான போராட்டம் மற்றும் பொருளாதார புத்துயிர் பெறுவதற்கு தேவையான உதவிகளையும் ஆதரவையும் கொண்டு வந்தது. மேலும், தொற்றுநோய் ஏற்கனவே சீனாவில் திறம்பட கட்டுப்படுத்தப்பட்டிருந்தாலும், அபாயங்களைக் குறைப்பதற்கும், புரவலன் நாட்டை மதிப்பதற்கும், சீனக் குழு அதன் செயல்பாடுகளையும் பணியாளர்களையும் முடிந்தவரை குறைத்து, இலங்கையின் தொற்றுநோய் தடுப்பு வழிகாட்டுதல்களைக் கண்டிப்பாகக் கடைப்பிடித்து, உறுதியாகத் தவிர்த்தது புரவலன் நாட்டிற்கு ஏதேனும் சிக்கல் வருவதைத் தவித்திருந்தோம் . இராஜாங்க செயலாளரின் வருகைக்காகவும் மற்றும் சிறிய மற்றும் நடுத்தர நாடுகளுடனான உறவுகளை கையாளுவதற்காகவும் சில குறிப்புகளை வழங்குவோம் என்று நம்புகிறோம் இந்த நடைமுறைகளை அமெரிக்காவுடன் பகிர்ந்து கொள்ள நாங்கள் தயாராக இருக்கிறோம்."எனவும் அந்த அறிக்கையில் தெரிவிக்கப்பட்டுள்ளது.
கொரோனா தொற்றுக்குள்ளானதான இனங்காணப்பட்டவர்களுடன் நேரடியான முதற்தொடர்பைக் கொண்டவர்கள் இன்று முதல் அவர்தம் வீடுகளிலேயே சுயதனிமைப்படுத்தலுக்குட்பட வேண்டும் என கொவிட்-19 தடுப்பு தேசிய செயலணியின் தலைவரும் இராணுவத் தளபதியுமான லெப்டினற் ஜெனரல் சவேந்திர சில்வா தெரிவித்துள்ளார்.
இனிமேல் இத்தகையவர்கள் தனிமைப்படுத்தல் நிலையங்களுக்கு அனுப்பிவைக்கப்படமாட்டார்கள் எனவும் அவர் சுட்டிக்காட்டியுள்ளார்.
இதேவேளை இன்று (26) இதுவரை 280 பேருக்கு கொரோனா தொற்று உறுதி செய்யப்பட்டுள்ளது.
தனிமைப்படுத்தல் நிலையங்களில் இருந்த 15 பேரும் கொரோனா நோயாளர்களுடன் நெருங்கிய தொடர்பில் இருந்த 265 பேருக்கும் தொற்று உறுதிப்படுப்பட்டுள்ளது.
அமெரிக்க இராஜாங்க செயலர் மைக் பொம்பியோ இரண்டு நாட்கள் உத்தியோகபூர்வ விஜயத்தை மேற்கொண்டு நாளை இலங்கை வரவுள்ள நிலையில் அவரது விஜயம் நாட்டிற்கு பேராபத்தானது என தேசிய புத்திஜீவிகள் அமைப்பு எச்சரித்துள்ளது.
எதிர்காலத்தில் யாருடன் முன்னோக்கிச்செல்லவேண்டும் என்பதை இலங்கை தீர்மானிக்க வேண்டும் என்று அமெரிக்கா விடுத்துள்ள கோரிக்கை எதிர்காலம் தொடர்பாக பாரிய அச்சுறுத்தலாக அமைந்துள்ளது என இன்று முற்பகல் இடம்பெற்ற ஊடகவியலாளர் மாநாட்டில் அந்த அமைப்பு சுட்டிக்காட்டியுள்ளது .
https://www.facebook.com/watch/?v=806512353481685
இதேவேளை அமெரிக்க இராஜாங்க செயலாளர் மைக்பொம்பியோ விடுக்கவுள்ள வேண்டுகோளை இலங்கையின் அரச தலைவர்கள் பணிவுடன் நிராகரிப்பார்கள் என வெளிவிவகார அமைச்சின் சிரேஸ்ட அதிகாரியை மேற்கோள்காட்டி நியுஸ்இன்ஏசியா செய்தி வெளியிட்டுள்ளது.
நியுஸ் இன் ஏசியா மேலும் தெரிவித்துள்ளதாவது.
28ம் திகதி இலங்கைக்கு விஜயம் மேற்கொள்ளவுள்ள அமெரிக்க இராஜாங்க செயலாளர் மைக்பொம்பியோ இலங்கை தலைவர்களிடம் முகத்திற்குநேரே சீனாவுடனான உறவுகள் குறித்து மீள்பரிசீலனை செய்யுமாறு வேண்டுகோள் விடுக்கவுள்ளார்.
அமெரிக்கா முன்வைக்கின்ற சாத்தியப்பாடுகளை பரிசீலிக்குமாறும் உள்நாட்டு வெளிநாட்டு கொள்கைகள் தொடர்பில் அமெரிக்கா முன்வைக்கின்ற ஆலோசனைகளை ஏற்றுக்கொள்ளுமாறும் மைக்பொம்பியோ இலங்கை தலைவர்களை கேட்டுக்கொள்ளவுள்ளார்.
இலங்கை ஜனாதிபதியும் பிரதமர் மற்றும் வெளிவிவகார அமைச்சரும்இ இலங்கையின் தீர்மானங்களும் கொள்கைகளும் மக்கள் வழங்கிய ஆணையின்அடிப்படையிலும்இ இசட்டம் மற்றும் அரசமைப்பு நாட்டின் நலன்கள் ஆகியவற்றின் அடிப்படையிலும் அமைந்துள்ளன என மைக்பொம்பியோவிடம் தெரிவிக்கவுள்ளனர்.
அதேவேளை உலகிலும் பிராந்திய அளவிலும் இலங்கை அனைத்து நாடுகளுடனும் நட்புறவை பேணும் எனவும் அவர்கள் மைக்பொம்பியோவிடம் தெரிவிக்கவுள்ளனர்.
இலங்கையை எப்படி ஆட்சிசெய்யவேண்டும் என்பதை வெளிநாடுகளை சேர்ந்தவர்கள் தெரிவிக்கவேண்டியதில்லை என இலங்கையின் அரச தலைவர்கள் பணிவுடன் மைக்பொம்பியோவிற்கு தெரிவிக்கவுள்ளனர் என வெளிவிவகார அமைச்சக அதிகாரிகள் தெரிவித்துள்ளார்.
எதிர்காலத்தில் சீனாவின் நிதியுதவியுடனான தி;ட்டங்களை முன்னெடுக்கவேண்டாம் என இலங்கையை கேட்டுக்ககொள்ளவுள்ள மைக்பொம்பியோ இருதரப்பு இணக்கத்துடனான திட்டங்களை முன்னெடுப்பதற்கு வேறு எந்த நாட்டையோ அல்லது ஸ்தாபனத்தையோ முன்னெடுக்குமாறு இலங்கையை கேட்டுக்கொள்ளவுள்ளார்.
480 மில்லியன் டொலர் MCC உடன்படிக்கையை ஏற்றுக்கொள்ளுமாறும் மைக்பொம்பியோ இலங்கையின் அரசதலைவர்களை கேட்டுகொள்ளவுள்ளார்.
எம்.சி.சி உடன்படிக்கையை இலங்கை முற்றாக நிராகரிக்கவேண்டும் அல்லது மறு ஆய்விற்கு உட்படுத்தவேண்டும் என இலங்கை ஜனாதிபதி நியமித்த ஆணைக்குழு பரிந்துரை செய்துள்ளது.
SOFA உடன்படிக்கை இலங்கையின் அரசமைப்பிற்கும் சட்டங்களுக்கும் முரணானது என்பதால் சர்ச்சைக்குரிய சோபா உடன்படிக்கை குறித்து ஆராயப்போவதில்லை என வெளிவிவகார அமைச்சக பேச்சாளர் தெரிவித்துள்ளார்.
சீனாவிற்கு எதிராக கூட்டணியான குவாட்டிற்குள் இலங்கையை உள்வாங்குவதற்கான முயற்சிகள் குறித்து கருத்து வெளியிட்ட வெளிவிவகார அமைச்சின் சிரேஸ்ட அதிகாரி 30வருட யுத்தத்திலிருந்து சமீபத்திலேயே விடுதலையாகியுள்ள இலங்கை இன்னொரு சர்வதேச மோதலின் களமாக மாறுவதை விரும்பவில்லை என மைக்பொம்பியோவிடம் நாங்கள் தெரிவிப்போம் என வெளிவிவகார அமைச்சகத்தின் சிரேஸ்ட அதிகாரி தெரிவித்துள்ளார்.
இந்து சமுத்திரத்திலும் ஏனைய பகுதிகளும் சுதந்திரமான நடமாட்டம் உறுதிசெய்யப்படுவதை இலங்கை ஏற்றுக்கொள்கின்றது என அமெரிக்க இராஜாங்க செயலாளரிடம் இலங்கை தலைவர்கள் தெரிவிப்பார்கள் எனவும் அந்த அதிகாரி குறிப்பிட்டுள்ளார்.
சீனாவின் முதலீடுகளை இலங்கை ஏற்றுக்கொள்ளகூடாது என அமெரிக்கா வேண்டுகோள் விடுக்கவுள்ளது என்பது குறித்து கருத்துவெளியிட்டுள்ள இலங்கையின் வெளிவிவகார அமைச்சக அதிகாரி அமெரிக்கா உட்பட அனைத்து நாடுகளும் இலங்கையில் முதலீடுவது வரவேற்கப்படுகின்றது அமெரிக்கா சீனாவின் முதலீடுகளின் அளவிற்கு முதலீடு செய்யுமென்றால் அதனை வரவேற்போம் என குறிப்பிட்டுள்ளார்.
மீன்களை சமைத்து உண்டாலும் கூட உண்பதன் மூலம் கொரோனா வைரஸ் தொற்று பரவுவதாக, சமூகத்தில் பரவியுள்ள வதந்திகளை நம்ப வேண்டாம் என சுகாதார அமைச்சு மக்களை கேட்டுக்கொண்டுள்ளது.
அவ்வாறான தகவலை விஞ்ஞானபூர்வமாக உறுதிப்படுத்துவதற்கான எவ்வித ஆதாரமும் இல்லை சுகாதார அமைச்சு அறிக்கையூடாக தெரிவித்துள்ளது.
எனினும், மீனை சமைக்கும் போதும் களஞ்சியப்படுத்தும் போதும் முகத்தை தொடுவதை தவிர்க்குமாறு அமைச்சு அறிவுறுத்தியுள்ளது.
கொரோனா வைரஸ், மீனின் எப்பாகத்திலும் இருக்கலாம் என்ற காரணத்தினால் இந்த அறிவுறுத்தல் விடுக்கப்பட்டுள்ளது.
இதன் பின்னர் பயன்படுத்திய பாத்திரங்கள் மற்றும் கைகளை நன்றாக கழுவ வேண்டும் எனவும் கேட்டுக் கொள்ளப்பட்டுள்ளது.
எவ்வித காரணமுமின்றி மீன் விற்பனை நிலையத்தை மூடுவதை தவிர்க்குமாறும் சுகாதார அமைச்சு தனது அறிக்கையூடாக குறிப்பிட்டுள்ளது.
சமூக இடைவௌியை பேணுதல்இ கைகளை கழுவுதல் முகக்கவசம் அணிதல் உள்ளிட்ட சுகாதார நடைமுறைகளுடன் வர்த்தக நிலையங்களை நடாத்திச் செல்ல முடியும் எனவும் சுகாதார அமைச்சு மேலும் தெரிவித்துள்ளது.
இலங்கையில் மட்டுமன்றி உலகின் பல நாடுகளிலும் கொரோனா வைரஸின் தாக்கம் வீரியமடைந்துள்ள நிலையில் கொரோனா வைரஸை அழிக்க முடியாது என்றும் அதன் பாதிப்பு எப்போதும் இருக்கும் என்றும் பிரிட்டனின் அரசு ஆலோசனைக் குழுவைச் சேர்ந்த விஞ்ஞானி தெரிவித்துள்ள கருத்து பரபரப்பைக் கிளப்பியுள்ளது.
கொரோனா தொற்று உலகின் 190-க்கும் மேற்பட்ட நாடுகளைக் கடுமையாக பாதித்துள்ளது. கடந்த மார்ச் மாதம் முதல் பல்வேறு நாடுகளும் கொரோனா தொற்று பாதிப்பிற்கு எதிராகப் போராடி வருகின்றன.
இந்நிலையில், பிரிட்டனின் அரசு ஆலோசனைக் குழுவின் விஞ்ஞானி ஜான் எட்மண்ட்ஸ் தெரிவித்துள்ள கருத்து அதிர்ச்சியைக் கிளப்பி உள்ளது.
இந்த வைரஸுடன் நாம் எப்போதும் வாழ வேண்டி இருக்கும். இது ஒழிக்கப்பட வாய்ப்பில்லை.' என அவர் கருத்து தெரிவித்துள்ளார்.
தடுப்பூசிகளை எதிர்காலத்தில் அதிகளவு பயன்படுத்த வாய்ப்பிருப்பதால், நாம் அவற்றை கவனமுடன் கையாள வேண்டும் என தெரிவித்துள்ள எட்மண்ட்ஸ் பிரிட்டன் கொரோனா தடுப்பூசி விவகாரத்தில் புத்திசாலித்தனமாக செயல்பட்டுள்ளது எனக் குறிப்பிட்டுள்ளார்.
பிரிட்டன் இதுவரை 6 கொரோனா தடுப்பூசி விநியோக ஒப்பந்தங்களில் கையெழுத்திட்டுள்ளது.
பிரிட்டனில் இதுவரை 873,800 பேருக்கு கொரோனா தொற்று உறுதி செய்யப்பட்டுள்ளதுடன் 44,896பேர் உயிரிழந்துள்ளனமை குறிப்பிடத்தக்கது.
இலங்கையில் கடந்த சில நாட்களாக தினந்தோறும் ஒன்பதாயிரம் வரையில் சராசரியாக பிசிஆர் பரிசோதனைகள் மேற்கொள்ளப்பட்டுவரும் நிலையில் அந்தளவுதொகையை கையாளமுடியாது ஆய்வுகூடங்கள் திணறுவதால் முடிவுகள் வெளிவருவதில் தாமதங்கள் நிலவுவதாக நம்பத்தகுந்த வட்டாரங்களில் இருந்து அறியமுடிகின்றது.
ஆய்வுகூடங்களில் ஒரு நாளில் இத்தனை பிசிஆர் பரிசோதனைதான் செய்யமுடியும் என்ற வரையறை இருப்பதால் மேற்கொள்ளப்பட்ட பரிசோதனை முடிகள் வெளிவருவதில் தாமதம் காணப்படுகின்றது எனவும் சுட்டிக்காட்டப்படுகின்றது.
இது தொடர்பாக இன்றையதினம் குளோப் தமிழ் நேர்காணலில் நிகழ்நிலை பங்கேற்ற அரச மருத்துவ அதிகாரிகள் சங்கத்தின் சிரேஷ்ட அங்கத்தவர் டொக்டர் ரட்ணசிங்கம் தணிகைவாசன் கருத்துவெளியிடுகையில்
அமெரிக்க இராஜாங்க செயலர் மைக் பொம்பியோ இலங்கைக்கு இம்மாதம் 27ம் 28ம் திகதிகளில் விஜயம் செய்வதை அமெரிக்க இராஜாங்கத் திணைக்களமும் இன்று இலங்கை வெளிவிவகார அமைச்சும் உறுதிப்படுத்தியுள்ளன.
அமெரிக்காவில் ஜனாதிபதி நவம்பர் 3ம் திகதி நடைபெறவுள்ள நிலையில் அதற்கு சில நாட்களே இருக்கும் நிலையிலும் கொரோனா வைரஸ் கோரத்தாண்டவம் ஆடும் நிலையிலும் எதற்காக பொம்பியோ இலங்கைக்கு வருகின்றார் என்ற கேள்வி பல்வேறு தளங்களிலும் எழுப்பப்படுகின்றது.
அமெரிக்க உயர்மட்டத்தூதுக்குழுவின் விஜயத்தின் முன்பாக இலங்கையில் முன் ஆயத்தப் பாதுகாப்பு பணிகளில் ஈடுபடுவதற்காக அமெரிக்க துருப்பினரை ஏற்றிவந்துள்ள அமெரிக்க விமானப்படை விமானங்கள்
வெளிவிவகார அமைச்சர் தினேஷ் குணவர்தனவின் அழைப்பின்பேரில்தான் அமெரிக்க இராஜாங்க செயலாளர் மைக் பொம்பியோ எதிர்வரும் 27 மற்றும் 28 ஆம் திகதிகளில் இலங்கைக்கு விஜயம் மேற்கொள்ளதாக வெளிவிவகார அமைச்சின் அறிக்கையில் தெரிவிக்கப்பட்டுள்ளது. அதில் மைக் பொம்பியோவின் வருகையின்போது இரு நாடுகளுக்கும் இடையிலான உறவுகள் குறித்து நாட்டின் தலைவர்களுடன் அதிகாரப்பூர்வ கலந்துரையாடல்களை நடத்துவார் என வெளிவிவகார அமைச்சு குறிப்பிட்டுள்ளது.
சம்பிரயாதத்திற்காகவும் அரசியல் நாகரீகத்திற்காகவும் இப்படியாக அறிக்கைகள் விடுக்கப்படுவது இராஜதந்திர சேவையை அறிந்தவர்களுக்கு விளங்கும்.
சீனாவின் முன்னாள் வெளிவிவகார அமைச்சரும் சீன கம்யூனிசக் கட்சியின் மத்திய குழுவின் முக்கியஸ்தருமான யாங் யிசி தலைமையிலான தூதுக்குழு இம்மாத முற்பகுதியில் அவசர விஜயமொன்றை மேற்கொண்டு சென்று சில வாரங்களுக்குள்ளேளே அமெரிக்க இராஜாங்கச் செயலர் மைக் பொம்பியோவின் விஜயம் இடம்பெறுகின்றமை சுட்டிக்காட்டத்தக்கது. இதன் போது பொம்பியோ மட்டும் வருகைதரவில்லை மாறாக அமெரிக்க பாதுகாப்பு செயலர் மார்க் எஸ்பரும் வருகை தரவுள்ளமை குறிப்பிடத்கக்கது.
இந்து பசுபிக் பிராந்தியத்தில் புவிசார் வல்லாதிக்கத்தை உறுதிப்படுத்துவதற்கு முக்கிய கேந்திரஸ்தானத்தில் இருக்கும் இலங்கையில் தமது ஸ்தானத்தை வலுப்படுத்த முனையும் முக்கிய வல்லரசுகள் வெளிப்படையாகவே இலங்கையில் முட்டிமோதும் நிலையில் இந்த விஜயங்கள் இடம்பெறுகின்றன.
இதன் போது மிலேனியம் சலேஞ்ச் ஒப்பந்தம் உட்பட முக்கிய ஒப்பந்தங்களை கைச்சாத்திடுவதற்கு இலங்கைக்கு அமெரிக்கா அழுத்தம் கொடுப்பதற்கு அதிக வாய்ப்புக்கள் உள்ளன.
அமெரிக்க தூதுவர் இம்மாதத்தில் இலங்கையின் ஆங்கிலப்பத்திரிகையொன்றுக்கு வழங்கிய நேர்காணலில் சீனாவை கடுமையாக விமர்சித்திருந்தார். இலங்கையுடனான நகர்வுகளில் சீனா வெளிப்படைத்தன்மையுடன் நடந்துகொள்ளவேண்டும் உட்பட கடும் வார்த்தைப் பிரயோகங்களை வெளியிட்டிருந்தார்.
அமெரிக்காவின் உயர் இராஜதந்திரிகடங்கிய தூதுக்குழு வருகை தருவதற்கு முன்பாக இலங்கை ஆட்சியாளர்களுக்கு தமது எதிர்பார்ப்புக்களை வெளிப்படுத்தும் வகையிலான முன்னறிப்பாகவும் அவரது நேர்காணலை நோக்க முடியும். மைக் பொம்பியோ, மார்க் எஸ்பர் ஆகிய முக்கிய இராஜதந்திரிகள் இலங்கையின் ஆட்சியாளர்களைச் சந்திக்கும் போது வெறுமனே நினைவுக் கேடயங்களைப் பகிர்ந்துசென்றுவிடப்போவதில்லை. மிகவும் காத்திரமான கசப்பான செய்திகளையும் தாங்கி வருவார்கள் என்பதை முன்நகரும் அரசியல் போக்கை வைத்து உணர்ந்துகொள்ள முடிகின்றது.
இன்று வெள்ளிக்கிழமை மாத்திரம் இதுவரையில் 866 கொரோனா தொற்றாளர்கள் இனங்காணப்பட்டுள்ள நிலையில் இலங்கை தீர்க்கமான கட்டத்தில் உள்ளதாக சுகாதார அமைச்சு அறிவித்துள்ளது. ஆனாலும் நிலைமை இன்னமும் கட்டுப்பாட்டின் கீழ் உள்ளது என அமைச்சு மேலும் தெரிவித்துள்ளது.
கொரோனா வைரஸ் பரவல் இலங்கையில் பதிவுசெய்யப்பட்ட ஜனவரி மாதம் முதலான காலப்பகுதியில் ஒரு நாளில் பதிவுசெய்யப்பட்ட அதிக எண்ணிக்கையான கொரோனா தொற்றாளர்கள் இன்று வெள்ளிக்கிழமையே பதிவானமை குறிப்பிடத்தக்கது.
கடந்த சில நாட்களாக தினந்தோறும் இனங்காணப்படும் கொரோனா தொற்றாளர்களின் எண்ணிக்கை சடுதியாக அதிகரித்துவருகின்ற நிலையில் தற்போது நிலைமை தீர்க்கமான கட்டத்தில் உள்ளதென்பதை பொதுமக்கள் விளங்கிக்கொள்ள வேண்டும் என பொதுச் சுகாதார சேவைகளின் பிரதி பணிப்பாளர் நாயகம் டொக்டர் ஹேமந்த ஹேரத் தெரிவித்தார்.
இலங்கையில் COVID-19 தொற்றாளர்களின் எண்ணிக்கை 7,000 தை தாண்டியுள்ளது-(7,153) வைத்தியசாலைகளில் சிகிச்சை பெறுவோரின் எண்ணிக்கை 3,495 ஆக அமைந்துள்ளது.
நாட்டின் நிலைமை தீர்க்கரமான கட்டத்தில் இருந்தாலும் இன்னமும்நிலைமை முற்றாக கட்டுப்பாட்டை மீறிச் செல்லவில்லை என அவர் மேலும் தெரிவித்தார்
பொதுமக்கள் தமது முழுமையான ஒத்துழைப்பை வழங்க மறுத்தால் நிலைமை கட்டுக்கடங்காது செல்வதற்கு வாய்ப்பிருப்பதாக அவர் மேலும் சுட்டிக்காட்டியுள்ளார்.
அதிகாரிகளால் விடுக்கப்பட்ட அனைத்து வழிகாட்டல்களையும் பின்பற்றுவதை பொதுமக்கள் உறுதிசெய்யவேண்டும் எனவும் அவர் குறிப்பிட்டார் .
மக்கள் தமது நடமாட்டத்தைக் குறைத்துக்கொள்ளவேண்டும் ஏதேனும் அத்தியாவசியத்தேவையைத் தவிர்த்து மக்கள் வீட்டில் இருந்து வெளியே செல்வதைத் தவிர்த்துக்கொள்ளவேண்டும் என்றும் அவர் வேண்டுகோள் விடுத்துள்ளார்.
கொழும்பின் பல பகுதிகள் உட்பட இதுவரை 49 பொலிஸ் பிரிவுகளில் தனிமைப்படுத்தல் ஊரடங்குச் சட்டம் அமுல் செய்யப்பட்டுள்ளமை குறிப்பிடத்கத்கது.
20 ஆவது அரசியலமைப்பு திருத்தத்தின் இரண்டாம் வாசிப்பு மீதான வாக்கெடுப்பு நிறைவுபெற்றுள்ளது.
20 ஆவது அரசியலமைப்பு திருத்தத்திற்கு ஆதரவாக 156 வாக்குகளும் எதிராக 65 வாக்குகளும் அளிக்கப்பட்டுள்ளன.
இதில் எதிர்க்கட்சியைச் சேர்ந்த எட்டு பாராளுமன்ற உறுப்பினர்கள் அடங்குகின்றனர். அவர்களின் விபரம் வருமாறு
1) டயானா கமகே- ஐக்கிய மக்கள் சக்தி தேசியப்பட்டியல் உறுப்பினர்
2) நஸீர் அஹமட்-ஸ்ரீலங்கா முஸ்லிம் காங்கிரஸ்
3) ஏ.ஏ.எஸ்.எம். ரஹீம் - முஸ்லிம் தேசியக் கூட்டமைப்பு
4) பைஸால் காஸீம்- முஸ்லிம் காங்கிரஸ்
5) எச்.எம்.எம். ஹாரிஸ் - முஸ்லிம் காங்கிரஸ்
6) எம்.எஸ். தௌபீக் -முஸ்லிம் காங்கிரஸ்
7) அரவிந்த குமார்- தமிழ் முற்போக்கு முன்னணி
8) இட்ஸாக் ரஹ்மான் - அகில இலங்கை மக்கள் காங்கிரஸ்
பாராளுமன்றத்தில் மொத்தமாக 225 உறுப்பினர்கள் இருக்க வேண்டியநிலையில் ஐக்கிய தேசியக்கட்சியும் தேரர்களது கட்சியும் தமது தேசியப்பட்டியல் உறுப்பினர்களை இன்னமும் நியமிக்காத நிலையில் எஞ்சிய 223 உறுப்பினர்களில் இன்றைய வாக்களிப்பில் 213 பாராளுமன்ற உறுப்பினர்களே பங்கேற்றிருந்தனர். இன்றைய வாக்களிப்பில் முன்னாள் ஜனாதிபதி மைத்திரிபால சிறிசேன சமூகமளித்திருக்கவில்லை என்பது குறிப்பிடத்தக்கது.
20 ஆவது திருத்தம் தொடர்பான இரண்டாம் நாள் விவாதத்தினையடுத்து வாக்கெடுப்பு இடம்பெற்றது.
நீதி அமைச்சர் அலி சப்ரி பாராளுமன்றத்தில் நேற்று (21) சட்டமூலத்தை சமர்ப்பித்திருந்தார்.
அதற்கமைய நேற்று முதல் 20 ஆவது திருத்த சட்டமுலம் தொடர்பில் விவாதம் இடம்பெற்று வந்தது.
இந்த திருத்த சட்டமூலத்தில் பல திருத்தங்களை மேற்கொள்ள வேண்டும் என எதிர்க்கட்சியினர் வலியுறுத்தியமை குறிப்பிடத்தக்கது.
இலங்கையின் பல்வேறு பகுதிகளில் இருந்து கொரோனா தொற்றாளர்கள் இனங்காணப்பட்டுள்ளதாக கடந்த சில நாட்களாக அறிவிப்புக்கள் வெளியாகிவரும் நிலையில் நாட்டில் சமூகப்பரவல் ஏற்பட்டுவிட்டதா ? என்ற கேள்வி பல்வேறு தரப்பினர் மத்தியிலும் எழுந்துள்ளது.
மட்டக்குளி, முகத்துவாரம், புளூமென்டல், கிரேண்ட்பாஸ் மற்றும் வெல்லம்பிட்டிய ஆகிய பகுதிகளுக்கு உடன் அமுலுக்கு வரும் வகையில் தனிமைப்படுத்தல் ஊரடங்கு சட்டம் அமுல்படுத்தப்படுவதாக கொவிட் -19 தடுப்பு செயலணியின் தலைவரான இராணுவத் தளபதி லெப்டினன் ஜெனரல் ஷவேந்திர சில்வா இன்று காலை அறிவித்திருந்தார்.
மினுவங்கொடையில் ஆரம்பித்து கம்பஹா முழுதும் விஸ்தரித்து கொழும்பில் மக்கள் செறிவுமிக்க பகுதிகளில் ஊரடங்கு அமுலாகிவிட்டது. தற்போது களுத்துறை தனிபமாவட்டத்தின் பல பகுதிகளும் தனிமைப்படுத்தலுக்கு உட்பட்டுள்ளதாக அறிவித்தல் வெளியாகியுள்ளது. இதனைத்தவிர நாட்டின் பலபகுதிகளில் இருந்தும் கொரோனா தொற்றாளர்கள் இனங்காணப்பட்டுவருகின்றனர். இலங்கையின் பிரதம தொற்றநோயியல் வைத்தியர் சுகத் சமரவீரவின் கருத்துப்படி ஏற்கனவே 13 மாவட்டங்களில் கொவிட்-19 பரவிவிட்டது. எஞ்சிய மாவட்டங்களிலும் வைரஸ் பரவலுக்கான அதிக வாய்ப்புக்கள் உள்ளன அவர் தெரிவித்திருக்கின்றார்.
பல்வேறு பகுதிகளில் இருந்து புதிய கொரோனா தொற்றாளர்கள் இனங்காணப்பட்டுள்ள போதிலும் இன்னமும் நாட்டில் கொரோனா சமூகப்பரவலாக மாறவில்லை என சுகாதார அமைச்சர் பவித்திரா வன்னியாராச்சி தெரிவித்துவருகின்றமை தொடர்பாக எதிர்கட்சிகளும் ஊடகவியலாளர்களும் சமூகவியலாளர்களும் தமது கருத்துக்களை தெரிவித்துவருகின்றனர்.
இந்த நிலையில் இது சமூகத் தொற்றாக என்று அறிந்துகொள்வதற்காக சமுதாய மருத்துவ விசேட நிபுணர் முரளி வல்லிபுரநாதனிடம் வினவியபோது அவர் அளித்த பதில்
"பிசிஆர் பரிசோதனையின் போது இனங்காணப்படும் கொரோனா தொற்றாளர்களை எந்தவொரு கொரோனா கொத்தணியோடேனும் தொடர்புபடுத்தக்கூடியதாக இருக்கும் வரை அதனை சமூகப்பரவல் என்று கூறமுடியாது. மாறாக எழுந்தமனமாக செய்யப்படும் பரிசோதனைகளின் போது கொவிட்-19 தொற்று உறுதிசெய்யப்படுபவர்களோடு பழகியவர்கள் தொடர்பில் இருந்தவர்களிடமும் நடத்தப்படும் சோதனைகளின் போது அவர்களை எந்தவொரு கொரோனா கொத்தணியொடும் தொடர்புபடுத்த முடியாவிடின் அதனை சமூகப்பரவல் என்று கூறமுடியும்."
'இலங்கையில் அடையாளப்படுத்தப்பட்ட கொரோனா கொத்தணியைத் தாண்டி நாட்டின் பல பகுதிகளிலும் எழுந்தமனமாக சமூகப்பரவலாக கொரோனா பரவிவிடும் இடத்தை அதனால் நோய்வாய்படுபவர்களை அதிதீவிர சிகிச்சைப் பிரிவில் அனுமதிக்கப்படவேண்டிய நிலை இருந்தால் அதனைச் சமாளிப்படுத்து சுகாதாரத்துறைக்கு முடியாது . இந்நிலையில் வைரஸ் பரவலைக் கட்டுப்படுத்தும் உபாயமே வெற்றியளிக்கக்கூடியது' என அவர் சமுதாய மருத்துவ விசேட மருத்துவர் முரளி வல்லிபுரநாதன் மேலும் தெரிவித்தார்.
சில தினங்களுக்கு முன்னர் சமுதாய மருத்துவ விசேட நிபுணர் டொக்டர் முரளி வல்லிபுரநாதன் குளோப் தமிழுக்கு வழங்கிய விரிவான நேர்காணல் இதோ
முத்தையா முரளிதரனின் வாழ்க்கை சுயசரிதை திரைப்படத்தை எடுப்பதற்கு வாய்ப்புக்கிடைத்தால் அதனை த் தயாரிப்பதற்கு தயாராக உள்ளதாக இலங்கைத் திரைப்படத் தயாரிப்பாளர் பவதாரணி ராஜசிங்கம் தெரிவிக்கின்றார்.
குளோப் தமிழுக்கு வழங்கிய நேர்காணலிலேயே அவர் இதனைத் தெரிவித்தார்.
மோஸன் போஸ்டர் வெளியான நிலையில் '800' திரைப்படத்தில் விஜய் சேதுபதி நடிப்பதற்கு கடும் எதிர்ப்புக்கள் வெளியான நிலையில் முரளிதரனின் வேண்டுகோளை அடுத்து சேதுபதி விலகிக்கொண்டார். இந்த நிலையில் படம் வேறுநடிகர்களைக் கொண்டு வெளிவருமா அன்றேல் படம் கைவிடப்படுமா என்பது நிச்சயமற்றதாக உள்ளது. இந்த நிலையில் முரளிதரன் படத்தை தயாரிப்பதற்கு வாய்ப்பு வந்தால் அதனை தயாரிக்க தயாராக உள்ளதாக அவர் மேலும் தெரிவித்தார்.
சில தசாப்தங்களுக்கு முன்னர் இலங்கையின் பிரபல கிரிக்கட் வீரராக திகழ்ந்த மகா தேவா சதாசிவத்தின் வாழ்க்கை சுயதரிதைப்படத்தை தயாரிப்பது தொடர்பாக ஆராயப்பட்டு வருவதாகவும் இதற்காக கடந்த இரண்டு வருடங்களாக ஆராய்ச்சி இடம்பெற்று வருவதாகவும் அவர் மேலும் குறிப்பிட்டார்.
முத்தையா முரளிதரனின் வாழ்க்கை சுயசரிதை திரைப்படமான '800'ல் விஜய் சேதுபதி நடிப்பதை உறுதிப்படுத்தி ஒக்டோபர் 13ம் திகதி வெளியான மோஷன் போஸ்டருடன் ஆரம்பித்த சர்ச்சை இன்றைய தினத்தோடு பெரிதும் அடங்கிவிடும் என எதிர்பார்க்கப்படுகின்றது.
இன்றைய தினம் வெளியிட்ட அறிக்கையில் தமிழ் நாட்டின் தலைசிறந்த கலைஞர்களில் ஒருவரான விஜய் சேதுபதியின் கலைப் பயணத்தில் தேவையற்ற தடங்கல் வரக் கூடாது என்பதனால் திரைப்படத்தில் இருந்து விலகிக்கொள்ளுமாறு முரளிதரன் வேண்டுகோள் விடுத்திருந்தார்.முரளியின் இன்றைய அறிக்கை வெளிவருவதற்கு சில மணிநேரத்திற்கு முன்னரே தாம் '800' நடிப்பது நிச்சயம் என விஜய் சேதுபதியை மேற்கோள் காட்டி செய்தி வெளியாகியிருந்தமை குறிப்பிடத்தக்கது.
'800' படத்தில் நடிக்க ஒப்புதல் தெரிவித்து விட்டு எழுந்த பெரும் எதிர்ப்பையடுத்து செய்வதறியாத திணறியிருந்த விஜய் சேதுபதிக்கு முத்தையா முரளிதரன் இன்று விடுத்த அறிக்கை கௌரவமாக படத்தில் இருந்து விலகுவதற்கான வாய்ப்பை வழங்கியது என்றால் மிகையல்ல.
முத்தையா முரளிதரனின் திரைப்படத்தில் விஜய்சேதுபதி நடிக்கவுள்ளாக கடந்த ஜுலை மாதத்திலேயே செய்திகள் வெளிவந்தபோதும் அந்தவேளை எதிர்ப்புகள் வெளியிடப்படவில்லை . ஆனால் மோஷன் போஸ்டர் வெளியாகி படத்தில் விஜய் சேதுபதி நடிப்பது ஒக்டோபர் 13ம் திகதி உறுதியானபோதே எதிர்ப்புக்கள் வலுப்பெறத்தொடங்கின.
பொதுமக்கள், திரைத்துறையினர், அரசியல் பிரமுகர்கள் என பல்வேறு தரப்பிலிருந்தும் வெளிப்படுத்தப்பட்ட கணிசமான எதிர்ப்பை அடுத்து இந்தத் திரைப்படத்தில் இருந்து உடனடியாக விலக வேண்டிய நிர்ப்பந்தம் உருவாகியிருப்பினும் முத்தையா முரளிதரன் என்ற பெரும் விளையாட்டுவீரனை களங்கப்படுத்திவிடக்கூடாது என்ற நாகரிகம் காரணமாக விஜய் சேதுபதி '800' படத்தில் இருந்து வெளியேறும் முடிவை தாமாக அறிவிக்காது தாமதப்படுத்தியிருக்கக்கூடும்
மோஷன் போஸ்டரைப் பார்த்தபோது முரளியின் முகபாவனை மற்றும் உடல்மொழியுடன் கச்சிதமாக பொருந்தியிருந்த விஜய் சேதுபதியை தமது திரைப்படத்தில் தக்கவைப்பதற்கு தயாரிப்பு நிறுவனம் கடும் பிரயத்தனத்தை எடுத்தமை புலனாகும். தயாரிப்பு நிறுவனம் திரைப்படம் தொடர்பாக தமது நிலைப்பாட்டை வெளிப்படுத்தி ஓர் அறிக்கையை கடந்த 14ம்திகதி வெளியிட்டிருந்தது.இது ஒரு விளையாட்டு சுயசரிதைப்படம் என்றும் எந்த சமூகத்திற்கும் சார்பாக அரசியல்கருத்துக்களை முன்வைக்கும் படமல்ல என்றும் தெளிவுபடுத்தியிருந்தது.
இதன் பின்னர் முத்தையா முரளிதரன் நீண்ட தன்னிலை விளக்க அறிக்கையை கடந்த 16ம்திகதி வெளியிட்டிருந்தார்.
48வயதான முத்தையா முரளிதரன் 1992ம் ஆண்டு முதல் 2011ம்ஆண்டு வரையான தனது சர்வதேச கிரிக்கட் வாழ்வில் சாதித்த சாதனைகளை குறிப்பாக டெஸ்ற் கிரிக்கட்டில் 800 விக்கட்டுக்களைக் கைப்பற்றிய சாதனைகளை எளிதாக யாராலும் முறியடித்துவிடமுடியாது. அந்த சாதனைகளுக்காக அவர் கொண்டாடப்படவேண்டியவர். ஆனால் கிரிக்கட் களத்திற்கு வெளியே அவர் தெரிவித்த கருத்துக்கள் இன்றைய நிலைக்கு அவரை தள்ளிவிட்டுள்ளது என்பதில் சந்தேகமில்லை.
வாயில் இருந்து வெளிப்படும் வார்த்தைகள் தொடர்பாக நாம் அவதானமாக இருக்கவேண்டும். அதுவும் நாம் பிரபலம் பெற்றவராக இருப்பின் எமது வார்த்தைகள் செயற்பாடுகள் ஒவ்வொன்றும் உன்னிப்பாக அவதானிக்கப்படும் என்பதை உணர்ந்துகொள்ளவேண்டும்.
மினுவங்கொடை ஆடைத்தொழிற்சாலை பணியாளருக்கு கொரோனா தொற்று இனங்காணப்பட்டதைத் தொடர்ந்து ஆடைத்தொழிற்சாலைப்பணியாளர்கள் மனிதத்தன்மையற்ற நிலையில் மிகவும் மோசமான முறையில் இராணுவத்தினரால் நடத்தப்பட்டதாக மனித உரிமைகள் ஆணைக்குழுவிடம் முறைப்பாடு செய்யப்பட்டுள்ளது. அவர்களது முழுமையான அறிக்கை பின்வருமாறு:
சமிலா துஷாரி, சந்ரா தேவநாராயண, அஷிலா தந்தெனிய மற்றும் அருட்சகோதரி நொயெல் கிறிஸ்டின் பெர்ணாண்டோ ஆகிய நாங்கள் மிகப் பெரும்பான்மையாகப் பெண்களைக் கொண்ட சுதந்திர வர்த்தக வலயத் தொழிற்சாலை ஊழியர்களுடன் பரந்த அளவிற்குப் பணியாற்றும் நிறுவனங்களைப் பிரதிநிதித்துவம் செய்கின்றோம். இப்பாராதூரமான பிரச்சினையினை மனித உரிமைகள் ஆணைக்குழுவின் கவனத்திற்குக் கொண்டுவந்து தன்னிச்சையான முறையில் சட்டவிரோதமாகத் தொழிலாளர்கள் சுற்றிவளைக்கப்பட்டு குரூரமாகவும் மனிதாபிமானமற்ற முறையிலும் அல்லது அவமானப்படுத்தும் முறையிலும் நடத்தப்பட்டமை தொடர்பிலும் அரசியலமைப்பின் உறுப்புரைகள் 11, 12(1), 12(2), 13(1), 13 (2), 14(1) (h) ஆகியவற்றின் கீழ் உத்தரவாதப்படுத்தப்பட்ட நடமாட்ட சுதந்திரம் கட்டுப்படுத்தப்பட்டமை தொடர்பிலும் பொருளாதார மற்றும் சமூக அந்தஸ்து ஆகியவற்றின் அடிப்படையில் சட்டத்தின் சமமான பாதுகாப்பு மட்டுப்படுத்தப்பட்டு பாகுபாடு காட்டப்பட்டமை தொடர்பிலும் விசாரணை ஒன்றினை முன்னெடுப்பதற்காக நாங்கள் இந்த முறைப்பாட்டினை இலங்கை மனித உரிமைகள் ஆணைக்குழுவிடம் சமர்ப்பிக்கின்றோம்.
கொவிட் 19 தொற்றினைத் தடுப்பதற்கான தேசிய செயற்பாட்டு மையத்தின் (NOCPCO) தலைவரான லெப்டினன்ட் ஜெனரல் சவேந்திர சில்வாவுக்கு எதிராகவும் 98 தொழிலாளர்களையும் சுற்றிவளைப்பதற்காகச் சென்ற இராணுவ அதிகாரிகளுக்கு எதிராகவும் இந்த முறைப்பாடு சுற்றிவளைக்கப்பட்ட 98 தொழிலாளர்களின் சார்பில் முன்வைக்கப்படுகின்றது. தேசிய செயற்பாட்டு மையத்தின் தலைவர் என்கின்ற ரீதியிலும் இராணுவத் தளபதி என்கின்ற ரீதியிலும் லெப்டினன்ட் ஜெனரல் சவேந்திர சில்வா பிரதிவாதியாகக் கருதப்படுகின்றார். இவரின் பணிப்புரை இன்றி இராணுவ அதிகாரிகள் இந்த நடவடிக்கையினை நடத்தியிருக்க முடியாது. சமூகமளித்த இராணுவ அதிகாரிகள் ஒவ்வொருவரினதும் பெயர்களை நாம் எதிர்காலத்தில் அறிந்துகொண்டால் அவற்றினை இலங்கை மனித உரிமைகள் ஆணைக்குழுவிடம் சமர்ப்பிப்பதற்கான உரிமையினை நாம் கொண்டுள்ளோம்.
முறைப்பாட்டிற்கான பின்புலம்
2020 ஒக்டோபர் 05 ஆம் திகதி, மினுவாங்கொடையிலுள்ள பிரெண்டிக்ஸ் ஆடைத் தொழிற்சாலையின் 1394 ஊழியர்கள் கொவிட் 19 தொற்றினைக் கண்டறியும் பரிசோதனைக்கு உட்படுத்தப்பட்டனர். இவர்களுள் 567 ஊழியர்களுக்குத் தொற்று இருப்பது அடுத்த நாள் உறுதிசெய்யப்பட்டது. எவ்வாறாயினும் இற்றைவரையில் இக்கொத்தணி 1500 இனை விட அதிகரித்துள்ளது (குடும்ப உறுப்பினர்கள், உறவினர்கள் மற்றும் இக்கொத்தணியுடன் நெருங்கிய தொடர்பினைக் கொண்டவர்கள்). கொவிட் 19 தொடர்பான சகல கட்டாய அரசாங்க ஒழுங்குவிதிகளையும் தான் பின்பற்றியதாக பிரெண்டிக்ஸ் வெளியிட்ட உத்தியோகபூர்வ அறிக்கையில் குறிப்பிடுகின்றது.
ஆடைத் தொழிற்சாலை ஊழியர்களும் மனிதவலுத் தொழிலாளர்களும் பெரும் எண்ணிக்கையில் ஓரிடத்தில் அருகருகில் நெருக்கமாகப் பணியாற்றுகின்ற காரணத்தினாலும் மிக நெருக்கமாகப் பகிரப்பட்ட தங்குமிட வசதிகளில் வசிப்பதாலும் வைரசின் துரித பரவலால் பாதிக்கப்படக்கூடிய உயர் சாத்தியத்தினைக் கொண்டுள்ளனர். மனித வலுத் தொழிலாளர்களுக்கு தொழிற்சங்கப் பிரதிநிதித்துவம் இல்லாத காரணத்தினாலும் இவர்களுக்கான பொறுப்பினை எத்தொழில்வழங்குனரும் ஏற்றுக்கொள்ளத் தயாராக இல்லாத காரணத்தினாலும் இவர்கள் அதிகளவில் பாதிக்கப்படக்கூடிய சாத்தியத்தினைக் கொண்டுள்ளனர்.
ஒக்டோபர் 11 ஆம் திகதி ஞாயிற்றுக்கிழமை இரவு 10.30 மணியளவில், கட்டுநாயக்கவிலுள்ள லியனகேமுல்லயைச் சேர்ந்த ஆடைத் தொழிந்சாலையின் தொழிலாளர்கள் 45 பேர் (25 பெண்கள், 1 கர்ப்பிணிப் பெண் மற்றும் 2 சிறார்கள் உள்ளடங்கலாக) இராணுவத்தினால் சுற்றிவளைக்கப்பட்டு களுத்தறையிலுள்ள தற்காலிக தனிமைப்படுத்தல் நிலையத்திற்கு பஸ்சில் அழைத்துச் செல்லப்பட்டனர். அருகிலுள்ள விடுதியில் கொவிட் தொற்று உறுதியான தொழிலாளர்கள் வசித்த காரணத்தினால் இவர்களையும் தனிமைப்படுத்தவேண்டியுள்ளது என இத்தொழிலாளர்களிடம் கூறப்பட்டது. அவர்களை வெயாங்கொடக்கு அழைத்துச் செல்வதாகவே அவர்களிடம் கூறப்பட்டது. ஆனால் கடைசியிலே அவர்கள் களுத்தறையில் தனிமைப்படுத்தப்பட்ட இடமொன்றில் விடப்பட்டுள்ளனர். அந்த இடத்தில் தொலைபேசிச் சமிக்ஞையும் பலவீனமானதாகக் காணப்படுகின்றது.
''எமது பொருட்களை எடுத்துக்கொண்டு பஸ்சில் ஏறுவதற்கு சில நொடிகளே எமக்கு வழங்கப்பட்டது. ஒரு மாற்று ஆடையினைக் கூட எம்மால் பொதி செய்து எடுத்துச் செல்ல முடியவில்லை. சீப்பினைக் கூட எடுத்துவைக்க முடியவில்லை! முழுப் பிரதேசமும் சுற்றிவளைக்கப்பட்டுள்ளதால் தப்பியோட முயற்சிக்கவேண்டாம் என இராணுவம் எம்மிடம் கூறியது. இராணுவம் எங்களைக் கைதிகளைப் போலவே நடத்தியது. எங்களை ஏதோ தேசத்துரோகம் செய்தவர்களைப் போலவே நடத்தினார்கள்' – தொழிலாளர் ஒருவர் கூறியது.
அன்றைய தினம் நள்ளிரவு 12.30 மணியளவில் (12 ஆம் திகதி அதிகாலை) அவரிவத்தயினைச் சேர்ந்த 35 பெண்களும் 1 பிள்ளையும் அடங்கிய 53 பேர் தூக்கத்தில் இருந்து எழுப்பப்பட்டு இதே விதமாக அழைத்துச் செல்லப்பட்டனர். 'இரவில் வந்த இராணுவத்தினர் எமக்கு அவசியமான பொருட்களைப் பொதி செய்து பஸ்சில் ஏறுவதற்கு 10 நிமிடங்களையே வழங்கினர். இராணுவத்தினர் எங்களிடம் தாங்கள் பல இரவுகள் தூங்காமல் மிகவும் களைப்படைந்திருப்பதால் தங்களைக் காக்கவைக்க வேண்டாம் எனக் கூறினர். நாங்கள் அளவுக்கதிகமாக வேலை செய்திருந்தோம். 2 நாட்களுக்கு முன்புதான் எனக்குக் கொரொனா இல்லை என்று பரிசோதனை முடிவுகள் வந்திருந்தன. அவர்களிடம் இதனைக் கூறுவதற்குக் கூட எனக்கு அவகாசம் வழங்கப்படவில்லை. அவர்கள் யாரையும் பேச அனுமதிக்கவில்லை. அவர்கள் எம்மை பஸ்சினுள் திணித்துக் கூட்டிச் சென்றனர்' – தொழிலாளர் ஒருவர் கூறியது.
அவர்கள் மேலும் தொழிலாளர்களை அழைத்துச் செல்வதற்காக கட்டுநாயக்க, சீதுவ, நீர்கொழும்பு மற்றும் ஆமந்தொலுவ பிரதேசங்களுக்குச் சென்றனர். கடைசியில் நாங்கள் கட்டுநாயக்கவை விட்டு ஒக்டோபர் 12 ஆம் திகதி அதிகாலை 5.30 மணிக்கே புறப்பட்டோம்.
இறுதியாக நாங்கள் 12 மணித்தியாலங்களின் பின்னர் பிப 12.30 இற்கே களுத்தறையினை அடைந்தோம். போய்ச்சேரும் வரை எங்களுக்கு உணவோ அல்லது ஒரு துளி நீரோ கூட வழங்கப்படவில்லை. அங்கே சென்றதும் எங்களுக்குச் சிறிது உணவளித்தனர். ஆனால் அந்த உணவு சாப்பிட முடியாததாக இருந்தது. தனிமைப்படுத்தலுக்கான இடம் துப்பரவு செய்யப்படாமல் இருந்தது. கழிப்பறைகள் நீர் நிறைந்து அழுக்காகக் காணப்பட்டன. 13 ஆம் திகதி வரை எம்மை சுகாதாரப் பணியாளர்களோ அல்லது பொதுச் சுகாதார அதிகாரிகளோ பார்வையிடவில்லை. இங்கே இராணுவத்தினர் மட்டுமே இருந்தனர். நிலையத்தில் அனுமதிக்கையில் யாருக்கும் பிசிஆர் பரிசோதனை நடத்தப்படவில்லை. 'வைத்தியர் ஒருவர் எம்மைப் பார்க்க வருவார் என்ற வதந்தி அடிபட்டது. ஆனால் இதுவரை எங்களுக்கு உத்தியோகபூர்வமாக எதுவும் அறிவிக்கப்படவில்லை' – தொழிலாளர் ஒருவர் கூறியது.
இன்று தொழிலாளர்களுக்குச் செருப்பு, சவர்க்காரம் மற்றும் சலவைத் தூள் போன்ற அடிப்படைப் பண்டங்கள் வழங்கப்பட்டுள்ளன. தனிமைப்படுத்தல் நிலையத்தில் தற்போது 400 முதல் 500 வரையான தொழிலாளர்கள் தங்கவைக்கப்பட்டுள்ளனர். சில அறைகளில் 6 முதல் 7 தொழிலாளர்கள் வரை தங்கியுள்ளதாகவும் சில அறைகளில் 3 முதல் 5 வரையான தொழிலாளர்கள் தங்கியுள்ளதாகவும் அவர்கள் குறிப்பிட்டனர். 30 தொழிலாளர்களுக்கு 2 குளியலறைகளும் 2 கழிப்பறைகளும் 2 வாஷ் பேசினும் வழங்கப்பட்டுள்ளன (4 வாஷ் பேசின்கள் இருந்தாலும் 2இல் மட்டுமே நீர் வருகின்றது).
நிலையத்தினை விட்டு யாருக்கும் செல்ல முடியாது என அவர்களிடம் கூறப்பட்டுள்ளது. யாராவது ஒரு தொழிலாளருக்குத் தொற்று ஏற்பட்டால் அது அனைவருக்கும் விரைவாகத் தொற்றிவிடும் எனத் தொழிலாளர்கள் அஞ்சுகின்றனர்.ஏனெனில் தற்காலிகத் தனிமைப்படுத்தல் நிலையத்தி்ல் உரிய சுகாதார மரபொழுங்குகள் எவையும் நடைமுறையில் இல்லை.
'அறையின் தரை தூசி படிந்துள்ளது. கழிப்பறைகள் அழுக்காக உள்ளன. எங்களுக்கு இவ்வாறு வாழ்ந்து பழக்கமில்லை. இதனால் எங்கள் அறைகளையும் கழிப்பறைகளையும் நாங்களே துப்பரவு செய்தோம். நாங்கள் இப்படியே இங்கே தொடர்ந்து வாழ்ந்தால் எங்களுக்குக் கொரொனா வராவிட்டாலும் துப்பரவற்ற இந்தச் சூழலின் காரணமாக எங்களுக்கு வேறு நோய்கள் வந்துவிடும். இச்சூழ்நிலையினை இவர்கள் சிறந்த முறையில் முகாமைத்துவம் செய்யாவிட்டால் நாங்கள் வாக்களித்த அரசாங்கத்தினை மாற்றும் நிலைக்கு நாங்கள் தள்ளப்படுவோம்' - தொழிலாளர் ஒருவர் கூறியது.
'எனக்கு மாரடைப்பு வந்திருக்கின்றது. என் இதயத்தில் இரண்டு அடைப்புக்கள் உள்ளன. நான் பல்வேறு மருந்து மாத்திரைகளையும் பாவிக்கின்றேன். இங்கே இருப்பதால் எனக்குக் கொரொனா வந்தால் நான் பிழைப்பது சந்தேகம்தான். இந்த இடம் நாய்கள் வாழக் கூடத் தகுதியற்றது! இவர்களுக்கு வாக்களித்ததற்கு எங்களையே நாங்கள் அடித்துக்கொள்ளவேண்டும் போலிருக்கின்றது' - தொழிலாளர் ஒருவர் கூறியது.
''நாங்கள் அனைவரும் சுய தனிமைப்படுத்தலுக்குத் தயாராக இருந்தோம். அருகிலுள்ள வாடகை வீட்டில் இரண்டு சகோதரிகளுக்குத் தொற்று உறுதியானதால் நாங்கள் சுய தனிமைப்படுத்தலுக்காக 20000 ரூபா பெறுமதியான பொருட்களைக் கொள்வனவு செய்து வீட்டில் தங்கியிருக்கத் தயாராக இருந்தோம். நாங்கள் அனைவரும் மிக அவதானத்துடனேயே இருந்தோம். இரண்டு சகோதரிகளும் கூடத் தங்களைப் பரிசோதிப்பதற்காக நீர்கொழும்பு வைத்தியசாலைக்குத் தனிப்பட்ட முறையில்தான் சென்றனர். ஏனெனில் அவர்களின் உடல்நிலை நலிவுற்றிருந்தது. அவர்களுக்குத் தொற்று இருப்பது தெரியவந்ததும் அவர்கள் தங்களைச் சுய தனிமைப்படுத்திக் கொண்டனர். எங்களுக்கு நோய்த் தொற்று இல்லாதபோதும் நாங்கள் அனைவரும் சுய தனிமைப்படுத்தலுக்குத் தயாராகவே இருந்தோம். அரசாங்கம் அனைவரையும் பரிசோதித்துஇ தொற்று உள்ளவர்களைத் தனிமைப்படுத்தி ஏனையவர்களைச் சுய தனிமைப்படுத்தலுக்கு அனுமதித்திருக்கவேண்டும். ஏனெனில் எங்களுக்கென இணைப்பு வாடகை வீடுகளும் கழிப்பறைகளும் உள்ளன. அவர்கள் (அரசாங்கமும் இராணுவமும்) தாங்கள் அனைத்தையும் சரியான முறையில் முகாமைத்துவம் செய்வதாக நினைத்துக்கொண்டு பாதுகாப்பு முன்னெச்சரிக்கை பற்றி எங்களுக்கு உபதேசம் செய்து எங்களை அடைத்துவைக்கின்றனர். ஆனால் எங்களை பஸ்சினுள் ஆடு மாடுகள் போல அடைத்து துப்பரவற்றதும் பாதுகாப்பற்றதுமான தனிமைப்படுத்தல் மையங்களில் விடும்போது இந்தப் பாதுகாப்பு மரபொழுங்குகள் எதுவும் பிரயோகிக்கப்பட்டதாகத் தெரியவில்லை'- தொழிலாளர் ஒருவர் கூறியது
அரசாங்கத்தின் ஒழுங்குவிதிகளைப் பின்பற்றுவதற்கும் தனிமைப்படுத்தலைப் பின்பற்றுவதற்கும் நாங்கள் எதிரப்புத் தெரிவிக்கவில்லை. உரிய செயன்முறைகள் பின்பற்றப்படவேண்டும் என்றும் எங்களைக் கையாள அனுப்பப்படுபவர்கள் (இராணுவம்) எங்களை மனிதாபிமானத்துடனும் கௌரவத்துடனும் நடத்தப் பயிற்றப்பட்டவர்களாக இருக்கவேண்டும் என்றே நாம் கேட்கின்றோம்.
நீங்கள் நள்ளிரவில் வந்துஇ பஸ்சில் ஏறுவதற்கு எங்களுக்கு 10 நிமிடங்கள் மாத்திரம் தந்துஇ நாம் எங்கே அழைத்துச் செல்லப்படுகின்றோம் மேலும் ஏன் அழைத்துச் செல்லப்படுகின்றோம் என எமக்குக் கூறாமல் எம்மை அழைத்துச் செல்ல முடியாது. கொலைகாரனைக் கைது செய்கையில் கூட அவனிடம் கைதுக்கான காரணத்தினை நீங்கள் கூறவேண்டும் என்றே எதிர்பார்க்கப்படுகின்றது. இந்த அடிப்படை மரியாதையினைக் கூட ஏன் எங்களுக்குத் தரவில்லை': - தொழிலாளர் ஒருவர் கூறியது
'பெண்களாகிய எம்மை அவர்கள் நள்ளிரவில் ஆடு மாடுகளைப் போல் ஏற்றிச் சென்றது மட்டுமல்லாது எங்களை எங்கே கூட்டிச் செல்கின்றனர் என்றோ அல்லது ஏன் கூட்டிச் செல்கின்றனர் என்றோ கூட எம்மிடம் கூறவில்லை. நாங்கள் எங்கே அழைத்துச் செல்லப்படுகின்றோம் என்பதை அறிந்துகொள்ளும் உரிமை கூட எமக்கில்லையா? எங்களுக்கு என்ன நடக்கப்போகின்றது என்பதை அறியும் உரிமை கூட எமக்கில்லையா? நாங்கள் இந்த நாட்டின் கடுமையான உழைப்பாளர்கள். நாங்கள் யாசகர்களல்ல! நாங்கள் சட்டவிரோதச் செயல் எதையும் செய்யவில்லை. நாங்கள் அரசாங்கத்திற்குச் சுமையாக இருப்பவர்களல்ல. அவர்கள்தான் எம்மில் தங்கி வாழ்கின்றனர். வரட்டும் அவர்கள் அடுத்த முறை எங்களிடம் வாக்குக் கேட்டு! அவர்களுக்குத் தேர்தல் காலத்தில்தான் நாங்கள் தேவை. அவர்கள் எங்களைக் கேவலமான முறையில் நடத்துவதால்தான் நாம் இவ்வாறு பேசுகின்றோம்' என அவர்கள் கூறினர்.
நாம் இவ்வாறு நடத்தப்படுவதற்கான காரணம் நாங்கள் முக்கியமானவர்களாகவோ அல்லது செல்வந்தர்களாகவோ கருதப்படாமையினால் ஆகும். எங்கள் தவறினால் எங்களுக்குக் கொரொனா வரவில்லை. எனவே எங்களைப் பழிவாங்குவதைப் போல் அவர்கள் எம்மை நடத்தக்கூடாது. இதைத்தானா நாங்கள் எமது அரசாங்கத்திடம் இருந்து எதிர்பார்க்கவேண்டும்?' என அவர்கள் கோபத்துடன் கேட்டனர்.
அண்மைய நெருக்கடியினை அரசாங்கமும் இராணுவமும் கையாண்ட விதம், குறிப்பாகப் பெண் தொழிலாளர்கள் இவர்களினால் கையாளப்பட்ட விதம் சிக்கல்மிக்கதாகும். தெளிவான தகவல்களோ அல்லது விழிப்புணர்வோ இல்லாமைஇ பாதுகாப்பற்ற போக்குவரத்துஇ துப்பரவற்ற தனிமைப்படுத்தல் வசதிகள் மற்றும் தொழிலாளர்களைப் பஸ்களில் ஏற்ற முன்னரும் தனிமைப்படுத்தல் நிலையங்களில் அனுமதிக்க முன்னரும் பிசிஆர் பரிசோதனை நடத்தப்படாமை ஆகியவை பின்பற்றப்படவேண்டும் என அரசாங்கம் கூறிவரும் அடிப்படை கொவிட் 19 ஒழுங்குவிதிகளின் தெளிவான மீறல்களாகும்.
பிரதிவாதிகளால் மீறப்பட்ட அடிப்படை உரிமைகள்:
இராணுவத்தின் பின்வரும் செயற்பாடுகள் பின்வரும் அடிப்படையில் அடிப்படை உரிமைகள் மீறலாக அமைகின்றன:-
1. ஆடைத் தொழிற்சாலைத் தொழிலாளர்கள் 98 பேரையும் சுற்றிவளைத்து கைதுசெய்து, அழைத்துச்சென்று, களுத்தறையில் உள்ள பெயர் குறிப்பிட்டுக் கூறப்படாத ஓரிடத்தில் தடுத்துவைத்தமை உறுப்புரைகள் 12(1), 13(1) மற்றும் 13(2) ஆகியவற்றினை மீறியுள்ளது.
2. 98 தொழிலாளர்களும் தடுத்துவைக்கப்பட்டுள்ள 'தனிமைப்படுத்தல் மையங்கள்' சட்டரீதியாக உருவாக்கப்பட்டவை அல்ல என்பதால் இவ்வாறான மையங்களில் இவர்களைத் தடுத்துவைத்திருப்பது சட்டத்தினால் உருவாக்கப்பட்ட செயல்விதிகளுக்கு அமைவானது அல்ல என நாம் குறிப்பிடுகின்றோம். எனவே பெயர் குறிப்பிடப்படாததும் சட்டவிரோதமானதுமான தனிமைப்படுத்தல் மையங்களில் இவர்களைத் தடுத்துவைத்திருப்பது உறுப்புரைகள் 12(1), 13(2), 14(1)(h) ஆகியவற்றினை மீறுகின்றமையாகும்.
3. பெண் தொழிலாளர்களின் விடுதிகளினுள் ஆண் இராணுவ உத்தியோகத்தர்கள் நுழைந்து இச்சட்டவிரோத மற்றும் தன்னிச்சையான கைதினையும் தடுத்துவைப்பினையும் நிகழ்த்தியுள்ளனர். இது உறுப்புரைகள் 12(1), 13(2) ஆகியவற்றின் மீறலாகும்.
4. பரிசோதனைகளை மேற்கொள்ளாது தொழிலாளர்களைச் சுகாதாரக் கேடுமிக்க தனிமைப்படுத்தல் மையங்களில் ஒன்றுசேர்த்து வைத்திருப்பது கொவிட் 19 தொற்றுக்குள்ளாகும் ஆபத்தினை அதிகரிக்கின்றமை உறுப்புரை 11 இனை மீறுகின்ற செயலாகும். ஏனெனில் தொழிலாளர்கள் இராணுவ அதிகாரிகளினால் மனோரீதியான சித்திரவதைக்கு உள்ளாக்கப்பட்டுள்ளதுடன் மனிதாபிமானமற்ற முறையில் அல்லது அவமானமிகு முறையில் நடத்தப்பட்டுள்ளனர்.
5. இக்குறிப்பிட்ட தனிமைப்படுத்தல் நிலையத்தினை விட்டு இந்த 98 தொழிலாளர்களும் வெளியேறுவது தடைசெய்யப்பட்டுள்ளது. இதற்காக அவர்களுக்கு எக்காரணமும் வழங்கப்படவில்லை. இது உறுப்புரை 14(1)(h) இனை மீறுகின்றமையாகும்.
6. இந்த 98 தொழிலாளர்களும் மனிதாபிமானமற்ற முறையில் நடத்தப்பட்டுள்ளதுடன் அவர்களது அவசியமான பொருட்களைப் பொதிசெய்வதற்குக் கூடப் போதிய நேரம் வழங்கப்படாது, பஸ்களில் திணிக்கப்பட்டு, பெயர் தெரியாத இடங்களில் சுகாதாரக் கேடான சூழ்நிலையில் வைக்கப்பட்டுஇ உண்பதற்கு ஒழுங்காக உணவு கூட வழங்கப்படாதுஇ எந்த ஒரு மனிதனும் நடத்தப்படக்கூடாத விதமாக நடத்தப்பட்டுள்ளனர். மேலே குறிப்பிட்ட அனைத்து மீறல்களுக்கும் அப்பால் தொழிற்சாலைத் தொழிலாளர்கள் என்கின்ற இவர்களின் பொருளாதார வகுப்புக் காரணமாக இவர்கள் பாகுபாட்டுக்கு உட்படுத்தப்பட்டமையால் உறுப்புரை 12(2) உம் மீறப்பட்டுள்ளது.
இச்சட்டவிரோதமானதும் தன்னிச்சையானதுமான சுற்றிவளைப்பும் தடுத்துவைப்பும் மேற்கொள்ளப்பட்ட முறையின் காரணமாக கொவிட் தொற்றுக்கு உள்ளாகும் அச்சுறுத்தலைத் தொழிலாளர்கள் கொண்டுள்ள காரணத்தினால் பிரதிவாதிகளான லெப்டினன்ட் ஜெனரல் சவேந்திர சில்வா மற்றும் இலங்கை இராணுவ அதிகாரிகளின் நடத்தை தொடர்பாக விசாரிக்குமாறு நாம் இலங்கை மனித உரிமைகள் ஆணைக்குழுவினை வேண்டுகின்றோம்.
சமிலா துஷாரி - தபிந்து கலெக்டிவ சிறிலங்காஇ கட்டுநாயக்க
சந்ரா தேவநாராயண – ரிவொலியூசனரி எக்சிஸ்டென்ஸ் போர் ஹியூமன் டிவலப்மன்ட் (சுநுனு)இ கட்டுநாயக்க
அஷிலா தந்தெனிய - .ஸ்டேன்ட்அப் மூவ்மென்ட் லங்காஇ கட்டுநாயக்க
அருட்சகோதரி நொயெல் கிறிஸ்டின் பெர்ணாண்டோ – சரம்பிமனி கேந்திரய
